(გურია ნიუსი, ოზურგეთი) _ სანამ ოზურგეთი იმ ქალაქების სიაში მოხვდება, სადაც ახალი წლის დღეებში საქართველოს ხელისუფლებას მსოფლიოში ცნობილი მომღერლები ჩაჰყავს, ანდრე ბოჩელი “ქათქათა ” ბათუმში მღერის და ჩვენი მთავრობა ტურიზმის განვითარების მიზნით, ტურისტების მოზიდვას შავიზღვისპირეთსა და მაღალმთიან სვანეთში ცდილობს, მანამ ჩვენს პატარა ქალაქში, ადგილობრივი ძალებით, სხვადასხვა სახის ღონისძიებები ჩატარდა _ 2011 წლის შემობრძანება, ოზურგეთელებს ადგილობრივმა მომღერლებმა მიულოცეს. ფეიერვერკის ფონზე ერთმანეთს საუკეთესო სურვილები უსურვეს, ხოლო პოლიციის მანქანაზე “შემოსკუპებულმა” თოვლის ბაბუამ საახალწლო საჩუქრები ბავშვებს გაუნაწილა. ჩვენ დავინტერესდით, თუ რა დაიხარჯა საახალწლო ღონისძიებებისთვის ოზურგეთში.
შვიდი დღის ლოდინის შემდეგ, ოზურგეთის მუნიციპალიტეტის გამგეობამ, როგორც იქნა, მოგვწერა, თუ რა დაიხარჯა 2010-2011 წლის 6 იანვრამდე ჩატარებული საახალწლო ღონისძიებებისთვის _ მთლიან ჯამში ამ თანხამ 58 300 ლარი შეადგინა.
როგორც ოფიციალურ წერილში ვკითხულობთ “23 200 ლარი დაიხარჯა საახალწლო განათების მონტაჟისთვის ქალაქის ტერიტორიაზე. ოზურგეთის მუნიციპალიტეტის კულტურის ცენტრს გამოეყო 9 700 ლარი თეატრალურ მოედანზე საახალწლო ნაძვის ხის, სცენის მონტაჟის, საახალწლო საჩუქრების, ფეიერვერკების შეძენის, ბანერის დამზადებისა და მომღერლების ჰონორარისთვის; მოსწავლე ახალგაზრდობის სახლს _ 4 500 ლარი ოზურგეთის დრამატულ თეატრში 1 იანვარს საახალწლო ღონისძიების ჩასატარებლად და საჩუქრების შესაძენად; ოზურგეთის საბავშვო თეატრს 31 დეკემბრის კარნავალის ფორმირებისთვის _ 1 000 ლარი; ოზურგეთის ისტორიულ მუზეუმს _ 2 300 ლარი შენობის საახალწლო განათებისთვის; ოზურგეთის სახელმწიფო დრამატულ თეატრს _ 3 300 ლარი შენობის საახალწლო განათებისთვის; ოზურგეთის კულტურის ცენტრს _ 2 600 ლარი საახალწლო ღონისძიების მოსაწვევების დამზადებისთვის(?!); მოსწავლე-ახალგაზრდობის სახლს _ 1 200 ლარი საახალწლო ღონისძიების (ტექნიკური მხარის) მომზადებისთვის; თეატრალურ სტუდია “ჩარლის” _ 500 ლარი საახალწლო სპექტაკლის დადგმისთვის”, _ გვატყობინებს გამგეობა.
