საკვებ პროდუქტზე ფასების ზრდის პარალელურად, სწრაფი ტემპით მატულობს საწვავის ფასიც _ 25 იანვარს, “გურია ნიუსმა” ოზურგეთში რამდენიმე ბენზინგასამართ სადგურზე საწვავის ფასები გადაამოწმა:
სუპერი 2 ლარი და 15 თეთრი ღირს, რეგულარი _ 1 ლარი და 95 თეთრი, პრემიუმი _ 2 ლარი და 10 თეთრი, დიზელი _ 2 ლარი.
_ ჯერჯერობით, არ იგრძნობა მომხმარებელთა კლება, _ გვითხრა “სოკარის” მენეჯერმა თადეოზ თალაკვაძემ, _ გაძვირების შესახებ ინფორმაციისთვის, ალბათ, ზემდგომებს უნდა მიმართოთ, სადაც სათავო ოფისებია. ჩვენ უბრალო მომხმარებლები ვართ. ჯერჯერობით, საწვავს კი ყიდულობს ხალხი.
_ 2 ლარის, 3 ლარის და ყველაზე დიდი, 5 ლარის ღირებულების ბენზინი შეიძინონ, _ ამბობს ერთ-ერთი ბენზინგასამართი სადგურის მეპატრონე.
სააქციო საზოგადოება ოზურგეთის სამგზავრო ავტოსადგურის დირექტორის მოადგილე დათო ლომჯარია “გურია ნიუსთან” საუბარში ამბობს, რომ ავტოტრანსპორტი მგზავრობის ღირებულების ძველ ფასს ინარჩუნებს:
_ გადავხედავთ, რა მდგომარეობაა სხვა სადგურებში, როგორი იქნება ფასები და შესაბამისად მოვიქცევით. ჩვენ ვმუშაობთ, ძირითადად, საქალაქთაშორისო პარიტეტის საწყისებზე. რა მოხდება სხვა ავტოსადგურებში, ჯერჯერობით, არ ვიცი. თუ გაძვირდება, ალბათ, მძღოლებიც გააძვირებენ. ავტოსადგური ფასს არ ადგენს _ ადგენენ მძღოლები, ავტოსადგური კი მძღოლებს ემსახურება. ჯერჯერობით, არ იგრძნობა მგზავრთა ნაკლებობა. იანვარში სადღესასწაულო დღეები მრავლადაა და ასე თუ ისე, მოძრაობა არის. ჩემი აზრით, როცა ძვირდება ბენზინი, ავტოსადგურში მგზავრთა რაოდენობა იმატებს, რადგან ადამიანებს არ აქვთ იმის საშუალება, რომ საკუთარი ტრანსპორტით გადაადგილდნენ.
ოზურგეთელი ტაქსის მძღოლები მიიჩნევენ, რომ მათი გულისტკივილის გამოხატვას აზრი არ აქვს:
_ რა ვიცი, რა გითხრათ? მე ახალდაწყებული მაქვს მუშაობა. ადამიანებს სახე წაშლილი აქვთ, ვის უნდა ტაქსი? უჭირს მოსახლეობას, ყველაფერი გაძვირდა, ტაქსით სიარულის ფუფუნების საშუალება ვის აქვს, თუ გამოუვალი მდგომარეობაში არ არის ვინმე?!
_ რა აზრი აქვს, რაიმეს თქმას, ბიძია, გამოსავალი იქნება რამე? არა მგონია.
_ საშუალება არ აქვს ხალხს, ტყუილად ვდგავართ. ჩვენც გავაძვირეთ მომსახურება, უკვე. რა უნდა ვქნათ, აბა? ჩემი წუწუნით რამე იქნება? მართალია, ყველაფერი გაძვირდა, მაგრამ ჩვეულებრივ ტაქსზე ნაკლები ღირს ჩვენი ტაქსით მომსახურება, _ ამბობს სააქციო საზოგადოება “ტრანსერვისის” ტაქსის ერთ-ერთი მძღოლი.
