“ნიუ-ენერჯის” მუშები გაფიცვით იმუქრებიან

“გურია ნიუსში” 3 თებერვალს გამოქვეყნებულ წერილს _ “ძარცვის ფაქტზე 8 პირი დააკავეს”, რამდენიმე ადამიანი გამოეხმაურა: ოზურგეთი-ნინოშვილი-ლესის გზის მშენებელი კომპანიის “ნიუ-ენერჯის” ერთ-ერთი მუშის დედა შეწუხებულია მშენებლობის კურატორის მერაბ დოლიძის მიერ გაჟღერებული ინფორმაციით, რომ მუშებს ხელფასებს დროულად აძლევენ.
რესპონდენტის თქმით, ასევე არ შეესაბამება სიმართლეს, რომ აღნიშნულმა კომპანიამ მუშებს საახალწლოდ პრემიის სახით, მეცამეტე ხელფასი მისცა. ის ირწმუნება, რომ მუშებს ხელფასი სექტემბრიდან არ მიუღიათ: _ ჩემი შვილი მუხლამდე ტალახში იდგა და ისე მუშაობდა ყოველ დღე. მუშებს ხუთი თვეა, ხელფასი არ მიუღიათ. თუ აქამდე მათ ღიად ვერ ისაუბრეს ამის შესახებ, ეს შიშის ფაქტორით იყო განპირობებული. ახლა კი, თუ ხელფასს არ მისცემენ, მუშები გაფიცვით იმუქრებიან, _ გვითხრა ქალბატონმა.
ანალოგიური რამ გვითხრა მშენებლობაზე მომუშავე სამმა პოროვნებამ.
“გურია ნიუსი” კიდევ ერთხელ დაუკავშირდა მერაბ დოლიძეს:
_ ბატონო მერაბ, “გურია ნიუსს” რამდენიმე მუშა დაუკავშირდა და თქვენს ინფორმაციას ტყუილი უწოდა.
_ დამისახელეთ, ვინ გამოგეხმაურათ.
_ ჩვენ ვიცავთ რესპონდენტის უფლებას და ვერ გეტყვით, ვინ დაგვირეკა.
_ თქვენ კარგად იცით ჩემი პასუხი, _ გვითხრა დოლიძემ და ტელეფონი გაგვითიშა.