“სახალხო კრება” ლანჩხუთში

(გურია ნიუსი, ლანჩხუთი) _ პარასკევს, ლანჩხუთში, წარმომადგენლობითი სახალხო კრების ადგილობრივი კომიტეტის დაფუძნება მოხდა. დაფუძნებას თბილისიდან ჩამოსული სტუმრები ესწრებოდნენ: სახალხო კრების თავმჯდომარე ნონა გაფრინდაშვილი, გურიის მხარის კურატორი მაია სალუქვაძე, მოძრაობა “თეთრების” ლიდერი თემურ შაშიაშვილი და საზოგადოებისთვის ცნობილი სახეები: ელიზბარ ჯაველიძე, ლუკა კურტანიძე, ზაზა სოფრომაძე, გურამ ფირცხალავა. შეხვედრას მოგვინებით შეუერთდა ირაკლი ბათიაშვილი.
შეხვედრა, რომელიც ემოციურ ფონზე, ხელისუფლების კრიტიკით მიმდინარეობდა, ერთ დროს “ნაციონალების” აღმასრულებელი მდივნის, მოგვიანებით კი ბადრი პატარკაციშვილის შტაბის უფროსის გია მაჭარაშვილის სახლში გაიმართა.
ნონა გაფრინდაშვილი: _ ჩვენი შეკრება მას შემდეგ მოხდა, რაც აღმოვაჩინეთ, რომ ხალხს ერთი და იგივე შეძახილი და მოთხოვნები მობეზრდა. საჭირო იყო კონკრეტული ნაბიჯების გადადგმა. ამიტომაც გადავწყვიტეთ, ხალხთან ერთად გვემოქმედა. ჩვენი პირველი შეკრება გასული წლის 25 ნოემბერს გაიმართა და მას შემდეგ აქტიურად ვმუშაობთ. გარკვეული კორექტირება იმ ფაქტმა შეიტანა ჩვენს წარმომადგენლობით სახალხო კრებაში, რომ “ეროვნული ფორუმი” ჩვენს მოძრაობას გაემიჯნა. თუმცა, მინდა გითხრათ, რომ ჩვენს რიგებში და ჩვენს გვერდით დღესაც ბევრი “ფორუმელი” დგას. საუბარი იყო აგრეთვე ნინო ბურჯანაძეზეც, რომ თითქოს მანაც დატოვა ჩვენი რიგები. ეს ასე არ არის _ ის დაფუძნებიდანვე ჩვენს გვერდით იდგა და ასეა დღესაც.
დღეს ლანჩხუთში ვაფუძნებთ წარმომადგენლობითი სახალხო კრების ადგილობრივ კომიტეტს. ჩვენ ყველა რაიონს მოვიცავთ და ყველგან გვექნება ადგილობრივი ოფისი. მალე შეიქმნება სახალხო წინააღმდეგობების კომიტეტები.
ქვეყანაში დღეს ძალიან ცუდი მდგომარეობაა, საჭიროა კონკრეტული ნაბიჯების გადადგმა. ჩვენ, პირველ რიგში, ვუსმენთ ხალხს, რათა საზოგადოების მთავარი სატკივარი გულთან მივიტანოთ და ერთად გადავწყვიტოთ ის პრობლემა, რასაც ეს ხელისუფლება ჰქვია.
თემურ შაშიაშვილი: _ სანამ თქვენთან შემოვიდოდი, ერთი აცანელი კაცი შემხვდა და ისეთი რამ მითხრა, რომ გაოცებული ვარ _ თურმე, ჩვენი კაცები და ქალები თურქეთში დადიან ჩაის საკრეფად! საქართველო აგრარული ქვეყანაა და სხვა ქვეყანაში ჩაის საკრეფად წასვლა არ უნდა გვჭირდებოდეს. ეს კიდევ ერთი დასტურია იმისა, თუ რა გზით მიემართება ჩვენი ქვეყნის ცხოვრება. ამას წინათ უცხოეთში ვიყავი და იქ ვთქვი, როგორი მდგომარეობაც არის ჩვენთან. გაუკვირდათ და მითხრეს, იმდენი მომღერლები ჩაგყავთ თქვენს ქვეყანაში, არ გვგონია, ასე გიჭირდეთო. უცხოეთში სჯერათ მიშას ტყუილების და იმისი, რომ თითქოს ყველაფერი კარგად არის. მაშინ, როდესაც პოლიციურ სახელმწიფოს აშენებ, არაფერი კარგი არ მოხდება. ისინი იმიტომ არიან მოსულები, რომ საქართველო გაანადგურონ. ვინ არის დღეს შინაგან საქმეთა მინისტრი?! კაცი, რომელიც არის არამართლმადიდებელი, არაქრისტიანი. ეს არის პოლიტიკური ტანკი, რომელზეც დღეს ზის მიხეილ სააკაშვილი. ეს ტანკი მუდამ მზად არის საომრად. ამათმა იყიდეს ტელევიზიები, გაზეთები და ყველგან გვიმტკიცებენ, რომ, თურმე, ყველაფერი კარგად ყოფილა.
მალე გავხსნით მხილების მუზეუმს, სადაც ამ ხელისუფლების მიერ ჩადენილ დანაშაულობებს გამოვფენთ. მათ დიდი ქონება ჩაიგდეს ხელში.
სტუმართა გამოსვლის შემდეგ, შეხვედრა კითხვა-პასუხის რეჟიმში გაგრძელდა. მასპინძლებმა ზოგიერთ სტუმარს მათივე ბიოგრაფია შეახსენეს. შეატყეს რა საუბარი დიდხანს გაგრძელდებოდა, სტუმრებმა თქვეს, გვეჩქარება და ჯობია, კომიტეტი დროულად დავაფუძნოთო. ამ განცხადებას შეკრებილებში რეპლიკები მოჰყვა: _ აქანე იმიზა ხართ ჩამოსულები, პაწა მოგვისმონოთ, თვარა, აქაურები ერთმანეთს ისედაც ქე ვნახულობთო. მასპინძლებმა მადლობაც გადაუხადეს პრეზიდენტ სააკაშვილს: “მადლობელი ვართ მისი, რადგან ჭადრაკის ცოცხალი ლეგენდა ნონა გაფრინდაშვილი და თქვენ თავი აქანე გვანახაო.”
შეხვედრის დასასრულს, სახალხო კრების ადგილობრივი კომიტეტი შეიქმნა, რომელშიც სხვადახვა პოლიტიკური პარტიის წარმომადგენლები გაერთიანდნენ: გია გურგენაძე, გელა კვერენჩხილაძე, ნოე ასკურავა, მაკა კვირკველია, ენვერ ანდღულაძე, გია მაჭარაშვილი და კოტე ქანთარია. მათ, მოგვიანებით, “თეთრების” ლიდერის თემურ შაშიაშვილის თხოვნით, მისი წარმომადგენელი ზაურ წილოსანიც შეუერთდა. კომიტეტს ლანჩხუთის ყოფილი პოლიცმაისტერი გია გურგენაძე უხელმძღვანელებს.
ადგილობრივების გარდა, დამფუძნებელ შეკრებას ესწრებოდა დაბა ჩოხატაურის ყოფილი გამგებელი და დღევანდელი ოპოზიციონერი მამია ბარამიძე. მან შეხვედრის ჩამოსულ ლიდერებს მიამადლა, ხომ ხედავთ, ყველგან დაგყვებითო და იქვე საკუთარი “ვალინკების” “პრეზენტაციაც” მოასწრო: ჩოხატაურში დიდი თოვლია და ნახევარი გზა ფეხით გამოვიარეო.
სტუმრებმა გურიის კოორდინატორს მაია სალუქვაძეს შეხვედრის კარგი ორგანიზებისთვის მადლობა გადაუხადეს.