“მხოლოდ არჩევნების დროს ვახსენდებით”

ოზურგეთის მუნიციპალიტეტის სოფელ მაკვანეთში 595 კომლი ცხოვრობს. ჩვენს კითხვაზე, თუ რა პრობლემები აქვთ და რას ითხოვენ მაკვანეთელები ადგილობრივი ხელისუფლებისგან, გვითხრეს, რომ პირველ რიგში უამინდობის გამო, უშუქოდ დარჩენილი სოფელი ისევ უნდა განათდეს. ახლა  ეს პრობლემა, ნაწილობრივ გადაჭრილია.
_ წუხელ ქარი ამოვარდა და დღეს შუქი აღარ გვაქვს, _ გვითხრა ნუგზარ კალანდარიშვილმა, _ ენერგოკომპანია ცდილობს, შუქი აღუდგინოს სოფელს. ასე ხდება ყოველი ავდრის შემდეგ. ამ დიდთოვლობაზე ძირითადი გადამცემი კაბელი დაიწვა, ორი დღე შუქი არ გვქონდა და როგორც იქნა, აღადგინეს. თუმცა, წუხანდელი  ქარის შემდეგ,  შუქი ისევ არ გვაქვს.
თენგიზ ბაბილოძემ სხვა პრობლემის შესახებ შემოგვჩივლა: დაზიანებულია სოფლის შიდა გზები, არის უბანი, სადაც სასწრაფო სამედიცინო დახმარების მანქანა ვერ ადის, ეს არის ზეგანის უბანი: _ ამ უბანში სოფელმა, საკუთარი სახსრებით, აღდგომის სახელობის ეკლესია ააგო და იქ მისასვლელი გზის გაკეთება ვერაფრით ვერ მოახერხა. ახლომახლო სულ 15 ოჯახი ცხოვრობს და მათთან, უგზოობის გამო, ტრანსპორტი  ვერ მიდის. ამის შესახებ იცის სოფლის რწმუნებულმა, მაჟორიტარმა დეპუტატმაც.  ამ გზის შეკეთება სოფლის განვითარების შარშანდელ პროექტში ვერ მოხვდა.  კარგი იქნება, თუ წელს მაინც მოგვაქცევენ ყურადღებას და გაითვალისწინებენ ჩვენს თხოვნას. სოფელში  სხვა პრობლემებიც არსებობს _ სასმელი წყალი, გამრიცხველიანება, გაზიფიცირება… წელს მაინც ნუ დაგვტოვებენ უყურადღებოდ. მესმის, რომ ერთდროულად ყველა პრობლემას ვერ მოგვიგვარებს ხელისუფლება, მაგრამ ჩვენ ჩვენი ძალებითაც შევუწყობთ ხელს, დავეხმარებით, ოღონდ დავინახოთ, რომ გზას აკეთებენ და სახლთან მანქანით მისვლის საშუალება გვექნება.
სოფლის შუაში ჩამომავალ მდინარე აგიდაყვამ კალაპოტი თითქმის დატოვა, წყალმა იკლო და ოჯახებს პრობლემები შეექმნათ:
_ აგიდაყვას ერთი შენაკადი ჩვენს უბანში შემოდის. ამ მდინარეზეა დამოკიდებული ჩვენი სარწყავი და შიდა მეურნეობა, წისქვილები. რაც დაიწყო ახალი მშენებლობები შეკვეთილში, გააქვთ საამშენებლო მასალები, გააკეთეს კარიერები და  წყალმა ერთი მეტრით მაინც დაიწია. ფაქტობრივად, ყველა ეს ღელე დაშრა და გაზაფხულიდან უპატრონოდ დარჩება ჩვენი სარწყავი მიწები. მივმართეთ ადგილობრივ ხელისუფლებას, თუ საჭირო იქნება, ყველა გამოვა და იტყვის თავისი გასაჭირის შესახებ.  აუცილებელია დამბის  გაკეთება. ამისთვის მე თვითონ შევაგროვე 500 ცალი საბურავი და ვცდილობდი დამბის გაკეთებას, მაგრამ ვერ შევძელი _ დახმარება მჭირდება. სოფელი გვერდით დამიდგება და  სასარგებლო საქმესაც გავაკეთებ. ეს საკითხი ჩვენ შარშანაც დავაყენეთ, მაგრამ ხიდი გააკეთეს და აღარ დარჩა ფინანსები. არ მგონია, ეს ძალიან დიდ თანხებთან იყოს დაკავშირებული. არადა, სასიცოცხლო მნიშვნელობა აქვს _ ჩვენ სხვა წყალი არ გვაქვს სოფელში, _ გვითხრა ნუგზარ კალანდარიშვილმა.
სოფელში არის უბნები, სადაც სასმელი წყალი არც არტეზიულ ჭებში ამოდის და  არც წყაროს სახით მოდის:
_ ჩვენს უბანში საერთოდ დაშრა წყალი, სასმელი წყალი შორიდან მოგვაქვს. იქნებ, დაგვეხმაროთ და თქვენი გაზეთის საშუალებით მივაწვდინოთ ხმა ადგილობრივ ხელისუფლებას. ჩვენ საკუთარი ძალებით ვერ გავუმკლავდით პრობლემებს და ხელისუფლებამ, როგორც ჩანს, არ ჩათვალა საჭიროდ ამის მოგვარება. ზაფხულის პაპანაქება სიცხეში რომ სასმელი წყალი  არ ექნება ადამიანს, იქ არსებობა შესაძლებელია? _ გვითხრა მაკვანეთის მცხოვრებმა ქალბატონმა.
_ ბაგა-ბაღში ერთი საძინებელი და ერთი  დარბაზი რომ გავუკეთოთ ბავშვებს, თუ შეიძლება? დაიწყეს შენობის შეკეთება, მაგრამ ვერ დაასრულეს, მეორე სართული გასაკეთებელია. ცუდი პირობების გამო, ბავშვები ვერ დაჰყავთ მშობლებს. კარგი იქნება, ამ პრობლემას  თუ ყურადღებას მიაქცევს ადგილობრივი ხელისუფლება.
დაზიანებულია სოფლის შიდა გზები, გაზიფიცირება მხოლოდ საწყის ფაზაშია,  ინდივიდუალურ გამრიცხველიანებაზე ჯერ არავინ საუბრობს. მხოლოდ არჩევნების დროს ვახსენდებით, დაპირებებით გვავსებენ და ბოლოს, რა? არაფერი!  _ გვითხრა ერთ-ერთმა მაკვანეთელმა.