შრომის, ჯანმრთელობისა და სოციალური დაცვის სამინისტროს სუბსიდიების სააგენტოს წარმომადგენლები, გასულ კვირას, განსაკუთრებით დიდი ოდენობით ბიუჯეტის კუთვნილი თანხების მითვისება-გაფლანგვის და სამსახურეობრივი უფლებამოსილების ბოროტად გამოყენების ფაქტზე დააკავეს.
დაკავებულთა შორის არიან სოციალური მომსახურების სააგენტოს, სადაზღვევო კომპანია “ალფას,””არქიმედეს გლობალ ჯორჯიას”, “ალდაგი ბი სი აის”, “იმედი ელის”, “ირაოს”, “აი სი ჯგუფის”, “ჯი პი აი ჰოლდინგის” თანამშრომლები.
საინფორმაციო სააგენტოების მიერ გავრცელებული ინფორმაციით, გამოძიებით დადგენილია, რომ აღნიშნულმა პირებმა ყალბი დოკუმენტების დამზადებითა და გამოყენებით, სადაზღვევო კომპანიების მიერ ჯანმრთელობის დაზღვევის სახელმწიფო პროგრამის ფარგლებში აღებული ვალდებულებების უგულებელყოფით და მატერიალური გამორჩენის მიღების მიზნით, არ დაარიგეს სოციალურად დაუცველი ფენებისთვის განკუთვნილი სადაზღვევო პოლისები და შესაბამისად, თავი აარიდეს გასაწევი სამედიცინო მომსახურების ხარჯებს, რის შედეგადაც უკანონოდ მიითვისეს განსაკუთრებით დიდი ოდენობით _ 5 მილიონ 700 ათას ლარზე მეტი სადაზღვევო პროგრამისთვის გამოყოფილი სახელმწიფო თანხა.
ასევე, გამოძიებით დადგენილია, რომ სადაზღვევო კომპანია “ალფას” სახელმწიფო პროგრამების შესყიდვებისა და მართვის სამსახურის უფროსმა გიორგი ამბროლიანმა და სახელმწიფო პროგრამების მენეჯერმა გივი წულეისკირმა საგამოძიებო სამსახურში მიმდინარე გამოძიებისას, სადაზღვევო კომპანია “ალფას” დაკითხულ თანამშრომლებზე ზემოქმედების მიზნით, განახორციელეს ამ უკანასკნელების მიმართ მუქარა და მოსთხოვეს, რომ საგამოძიებო სამსახურისთვის დაემალათ მათთვის ცნობილი ინფორმაცია, სადაზღვევო პოლისების დაგვიანებით დარიგების თაობაზე.
სატელევიზიო სიუჟეტში სადაზღვევო კომპანია “ალფას” ოზურგეთის ამბულატორიის ოფის-მენეჯერი დავით მახარაძე ამბობდა: “პოლისების დარიგება დაგვიანებით იმის გამო მოხდა, რომ ისინი ცენტრალური ოფისიდან დაგვიანებით ჩამოვიდა დეკემბერში”. ჩვენი წყაროს ინფორმაციით, ეს ჩანაწერი ძველია და არა _ ოპერატიული მასალა. თავად დავით მახარაძე ჟურნალისტებთან საუბარს ერიდება და კომენტარს არ აკეთებს.
ოზურგეთის ბავშვთა სამკურნალო ცენტრის დირექტორი დავით მდინარაძე “გურია ნიუსთან” საუბარში ამბობს, რომ გურიაში ტენდერი სადაზღვევო კომპანია “ალფას” აქვს მოგებული და მოქალაქეების თითქმის 90% ამ კომპანიაში დაეზღვია. ოზურგეთში “ალფას” და სამკურნალო ცენტრს არც თუ სახარბიელო ურთიერთობა აქვთ, რადგან სამი თვეა, ექიმების ხელფასები გაუცემელია, რისი მიზეზიც აღნიშნული კომპანიის მხრიდან თანხის გადმორიცხვის დაგვიანებაა:
_ საავადმყოფოების დაგვიანებით დაფინანსებამ ქრონიკული ხასიათი მიიღო. უკვე რამდენიმე თვეა, ხელფასს ვერ ვარიგებთ. გარდა ამისა, ჩვენ გვაქვს დადებული ხელშეკრულებები სხვადასხვა კომპანიებთან, რომლებიც დროულად ითხოვენ ხარჯების ანაზღაურებას, წინააღმდეგ შემთხვევაში, საკმაოდ სერიოზულ სანქციებს აწესებენ.
_ გქონდათ თუ არა სადაზღვევო კომპანიების წარმომადგენლებთან ამ პრობლემებზე საუბარი?
_ გვქონდა, მაგრამ შედეგი არ მოჰყოლია _ მათი დაპირებები სცილდება დაწესებულ ვადებს.
_ განსაკუთრებული პრობლემები რომელ სადაზღვევო კომპანიასთან გაქვთ?
_ გურიაში ტენდერი “ალფამ” მოიგო, შესაბამისად, მოქალაქეების ძალიან დიდი რაოდენობა ამ კომპანიაშია დაზღვეული. ამიტომ, “ალფას” უჭირს გადმორიცხვები. ყოველ შემთხვევაში, პრეზიდენტის გამოსვლისას გამოიკვეთა, რომ სახელმწიფო თავის დროზე აკეთებს ყველაფერს იმისთვის, რომ “ალფამ” გადარიცხოს თანხები. ბოლო წლებში ვამაყობდი იმით, რომ ჩვენთან იყო კარგი ანაზღაურება და ხელფასებს დროულად გავცემდით. წარმოიდგინეთ, ადამიანს ბანკიდან სესხი აქვს აღებული, იხდის პროცენტს, მე კი ხელფასს ვერ ვაძლევ.
_ რამდენია დავალიანება?
_ დეკემბრის თანხაც არ არის ჩამორიცხული. ვაპირებდი მედიის წარმომადგენლების ჩართვას ამ პროცესებში. რა უნდა მოსთხოვო თანამშრომელს, რომელსაც ხელფასს ვერ აძლევ? ლიტვაში გავეცანი ჯანდაცვის სისტემას. იქ დაბადებიდან გარდაცვალებამდე, მოქალაქეების ჯანმრთელობას სახელმწიფო აზღვევს. უკეთესი არ იქნება, რომ სახელმწიფომ დააზღვიოს ადამიანები? ეს უფრო საამაყო და მისაღებია.
“გურია ნიუსი” ოზურგეთის მუნიციპალიტეტის ცენტრალური კლინიკური საავადმყოფოს და ოზურგეთის მუნიციპალიტეტის სამშობიარო სახლის დირექტორებს დაუკავშირდა. კლინიკური საავადმყოფოს დირექტორის მოადგილე ფინანსურ საკითხებში, ირაკლი სირაძე ამბობს, რომ სადაზღვევო კომპანიებთან და კონკრეტულად, “ალფასთან,” მსგავსი პრობლემები არ აქვთ: _ არის ცოტათი ხელის შემშლელი ფაქტორები, მაგრამ სადაზღვევო კომპანიები ნორმალურად რიცხავენ თანხებს, _ გვითხრა სირაძემ.
სამშობიარო სახლის დირექტორმა დავით მდინარაძემ “გურია ნიუსთან” საუბრისას აღნიშნა, რომ იყო პერიოდი, როდესაც რამდენიმე სადაზღვევო კომპანიასთან ჰქონდათ ურთიერთობა და გადარიცხვები დროულად არ ხდებოდა: _ ახლა სიტუაცია შეიცვალა: პაციენტთა 90%-ზე მეტი დაზღვეულია სადაზღვევო კომპანია “ალფაში”. ამის შემდეგ, ჩვენ პრობლემები ამ კუთხით აღარ გვქონია, _ გვითხრა მდინარაძემ.
