“ადგილობრივი ხელისუფლების მიერ ბიუჯეტის არასწორმა ფორმირებამ და არამიზნობრივმა განკარგვამ, რამდენიმე ათეული ათასი ლარის სახელმწიფო ქონება შეიწირა”, _ ეს განცხადება “თავისუფალი დემოკრატების” ოზურგეთის რაიონული ორგანიზაციის გამგეობის წევრმა, ნინო ლომჯარიამ 7 მარტს გამართულ პრესკონფერენციაზე გააკეთა.
“2011 წლის 5 მარტს, ხანძრის შედეგად, ადგილობრივი ხელისუფლების დაუდევრობის გამო, განადგურდა სახელმწიფო ქონება _ ოზურგეთის მუნიციპალური კულტურის ცენტრის შენობა და ინვენტარი, რისი ღირებულება მრავალ ათას ლარს აჭარბებს”, _ განაცხადეს პრესკონფერენციაზე “თავისუფალმა დემოკრატებმა”.
მათივე თქმით, ადგილი ჰქონდა რამდენიმე ანალოგიურ შემთხვევას, კერძოდ, ამავე შენობაში ხანძარი გაჩნდა, როგორც 2010 წლის 31 დეკემბერს, ასევე მანამდეც. ხსენებული ფაქტებიდან, ადგილობრივმა ხელისუფლებამ შესაბამისი დასკვნების გაკეთება და პრევენციული ღონისძიებების გატარება ვერ შეძლო. ასევე, ვერ შეძლეს ხანძრის ჩაქრობა ადგილზე მისულმა მეხანძრეებმა, რომლებიც უკვე დიდი ხანია, ადგილობრივი ხელისუფლებისგან უყურადღებობისა და დაუფინანსებლობის პირობებში, ფაქტობრივად, აღჭურვილობისა და ტექნიკის გარეშე არიან დარჩენილი.
_ ჩვენ ადგილობრივი ხელისუფლებისგან მოვითხოვთ, უარი თქვან საბიუჯეტო სახსრების არამიზნობრივ ხარჯვაზე. ბიუჯეტი, პრიორიტეტების მიხედვით, არ არის სწორად გათვლილი. ის ვერ უზრუნველყოფს ოზურგეთის მოსახლეობის ინტერესებს. მივმართავთ ოზურგეთის მუნიციპალიტეტის თვითმმართველობას, შეისწავლონ საკითხი და მათი კომპეტენციის ფარგლებში გაატარონ შესაბამისი ღონისძიებები კულტურის ცენტრის რეაბილიტაციისთვის. ამასთან, ოზურგეთის სახანძრო სამსახურს გამოეყოს შესაბამისი თანხები ტექნიკისა და აღჭურვილობის შესაძენად, _ თქვა ნინო ლომჯარიამ.
იგი ძვირადღირებული ავტომობილების შეძენის საკითხსაც შეეხო და ბიუჯეტის არამიზნობრივ ხარჯვაში ხელისუფლება კიდევ ერთხელ დაადანაშაულა: _ ოზურგეთის მუნიციპალიტეტის ბიუჯეტიდან, ბოლო პერიოდში, სამი ძვირადღირებული ავტომანქანის შესყიდვა მოხდა, რისთვისაც 85 ათასი ლარი დაიხარჯა. ეს არამიზნობრივი ხარჯია, _ დასძინა მან.
