ოზურგეთში, ე.წ. ძველი აგრარული ბაზრის წინა შესასვლელის მარჯვენა მხარეზე მოქმედი ობიექტების წარმომადგენლები და მე-2 და მე-3 “ნავესის” მოვაჭრეები მათ მიმდებარე ტერიტორიაზე ახალი სავაჭრო ობიექტის აშენებას აპროტესტებენ.
როგორც ისინი ამბობენ, ყველანი საგადასახადო ინსპექციაში ინდმეწარმეებად არიან დარეგისტრირებულნი და შესაბამისად, და სამეწარმეო და ეკონომიკურ საქმიანობას ეწევიან.
მათი თქმით, დაგეგმილი კედლის ამოშენება და ახალი შენობის აშენება დაუშვებელია. რადგან მიიჩნევენ, რომ გზა ჩაიკეტება და მათთან მომხმარებელი მისვლას ვეღარ მოახერხებს.
ამის შესახებ მათ უკვე მიუმართავთ ადგილობრივ ხელისუფლებისთვის: “აღნიშნული ტერიტორია არის ერთადერთი სამანქანო გზა, რომლითაც ჩვენამდე შეუფერხებლად, თავისუფლად მოსვლა შეუძლია სატვირთო ავტომობილს _ 2010 წელს გაჩენილი ხანძრის დროს სწორედ ამ გზით მოვიდა სახანძრო ავტომანქანა. ჩვენი ღრმა რწმენით, ამ ტერიტორიაზე კედლის აშენება ან შენობის აღმართვა არის კანონით განსაზღვრული ნორმების დარღვევა. გთხოვთ, გაითვალისწინოთ ჩვენი ინტერესები და არ გასცეთ მშენებლობის ნებართვა აღნიშნულ ტერიტორიაზე,” _ ნათქვამია განცხადებაში.
_ წინააღმდეგ შემთხვევაში, იძულებული გავხდებით ქუდი დავიხუროთ და სახლებში წავიდეთ. მშენებლებს მფარველები ჰყავთ ხელისუფლებაში და “დიდ კაცთან პატარა კაცს, როდის გასვლია მართალი?” როცა მოვიდნენ, გვითხრეს, გადაწყვეტილია საქმეა, მაინც აშენდება, ტყუილად ყვირიხართო. ჩვენ არ დავუშვებთ. ამდენი ხალხი უმუშევარი დავრჩეთ. ძაღლადაც არ გვთვლიან! არის ამ ახალი შენობის ადგილი აქ? _ კითხულობენ მოვაჭრეები.
_ ეს შენობები არქიტექტურული თვალსაზრისით გამართულად გაკეთდა. ჩემი აშენებულია ეს ბაზარი, ადრე ბაზრის დირექტორი ვიყავი, _ ამბობს ვაჟა გურგენიძე და დასძენს, რომ ის გააკეთონ, რაც გასაკეთებელია, _ არქიტექტურულად არ არის გამართლებული აქ შენობის აშენება. 56 ობიექტია და ყველას საკუთარი მისასვლელი უნდა. ვნახოთ როდის იქნება პასუხი გამგეობიდან.
ოზურგეთის მუნიციპალიტეტის გამგეობის მთავარი სპეციალისტი ინფრასტრუქტურისა და მშენებლობის საკითხებში, თემურ მურვანიძე “გურია ნიუსთან” საუბარში აღნიშნავს, რომ გამგეობაში შესულია მინდია სალუქვაძის განცხადება, ქალაქ ოზურგეთში, გურიის ქუჩაზე სავაჭრო ფართის აშენებაზე, თუმცა, ნებართვა არ არის გაცემული: _ ეს მიწა სალუქვაძის კერძო საკუთრებაა _ მის საკუთრებაში ირიცხება არასასოფლო-სამეურნეო მიწის ნაკვეთის 72 კვადრატული მეტრი. საკუთარ მიწაზე რაიმეს მშენებლობის შეზღუდვის უფლება კი არ გვაქვს.
არასამთავრობო ორგანიზაციის “ახალგაზრდა მეცნიერთა კლუბის” გამგეობის თავმჯდომარე მინდია სალუქვაძე “გურია ნიუსთან” საუბარში ამბობს, რომ აღნიშნული ტერიტორია მისი კუთვნილებაა და სავაჭრო ცენტრის აშენებას გეგმავს:
_ეს ფართი იყო ყოფილი შპს “ოზურგეთის” საკუთრება, რომელიც დარჩა ქაღალდზე. შპს-ს, რომელიც გასულ, მძიმე წლებში უფუნქციოდ და უმოქმედოდ იყო, ხელმძღვანელობდა მამაჩემი.
ერთხელაც მოგვივიდა წერილი, რომ შპს-ს დაედო ვალი და საურავებთან ერთად შეადგინა გარკვეული თანხა. იგი გაიყიდა ჩვეულებრივად აუქციონის წესით, ორი წლის შემდეგ კი მყიდველისგან გამოვისყიდე და დავიბრუნე. ფართი 144 კვადრატია, ნახევარი ჩემია, ნახევარი _ სხვისი. მინდა, მოვაწესრიგო, გავალამაზო და ყველაფერი იყოს კანონიერად. მოდიან მოვაჭრეები პირდაპირ, ჯიქურ და მეუბნებიან, აქ მე უნდა ვიყოო. ეს იგივეა, მოვიდეს ვინმე თქვენთან სახლში და გითხრათ, აქ უნდა ვიჯდეო და დაიწყოს “სემიჩკის” გაყიდვა. იმიტომ, რომ უმუშევარია. როგორ ფიქრობთ, შეიძლება ასე?
მინდა მოვაწესრიგო ეს ტერიტორია, ინვესტორიც მყავს. მე ჩემს ტერიტორიაზე რასაც მინდა, იმას ავაშენებ. აზომვითი სამუშაოები ჩავატარე, დავაშავე რამე? ნებართვის მიღების შემდეგ დაიწყება მშენებლობა. ვერ ვხვდები, ჩაკეტვას რა უწოდებენ _ ჩემი მეზობელი სახელმწიფოა და ერთ სანტიმეტრზეც ვერ გადავალ, თუმცა არსებობს სამეზობლო პირობები.
_ თუ საიდუმლო არ არის, ვის ეკუთვნის ის ნახევარი 72 კვმ და ვინ არის ინვესტორი?
_ საიდუმლო არ არის, მაგრამ შეიძლება მას არ აწყობდეს ახლა ამის გამჟღავნება და აქედან გამომდინარე, ვერ გეტყვით. რას მირჩევთ, ასე დავტოვო ტერიტორია მოუწესრიგებელი, რომელიც ამოუშენებელი და უსახურია? მე მინდა მოვაწესრიგო და ამით რაიმეს ვაშავებ?
ჩვენი წყაროს ინფორმაციით, ინვესტორი და იმ 72 კვადრატული მეტრი ნაკვეთის მფლობელი, სასჯელაღსრულების სამინისტროს ერთ-ერთი მაღალჩინოსნის მამა ავთო მკურნალიძე და გურიის ვიცე-გუბერნატორის ლელა თავართქილაძის დის ქმარია.
