“საგანგაშო სტატისტიკის მიხედვით, საქართველოს პირველი ადგილი უჭირავს”

გურიის “თავისუფალი დემოკრატების” ლიდერმა, ოზურგეთის მუნიციპალიტეტის საკრებულოს წევრმა თემურ სალუქვაძემ, პარტიის

ოზურგეთის განყოფილების ჯანდაცვისა და სოციალური მომსახურების ჯგუფის ხელმძღვანელად ოზურგეთის კლინიკური საავადმყოფოს ქირურგი, “თავისუფალი დემოკრატების” გამგეობის წევრი ტიტე მგელაძე წარადგინა.

_ საქართველოში, ნებისმიერი მიმართულებით, უამრავი პრობლემაა. ყველაზე მეტად დაუცველი დარჩა 18-წლამდე ასაკის ბავშვები. რამდენიმე წლის წინ, აღნიშნული კონტიგენტის სამედიცინო მომსახურების ხარჯებს 80%-იანი დაფინანსებით, სახელმწიფო უზრუნველყოფდა. დღეისთვის სიტუაცია რადიკალურად შეცვლილია _ 80%-იანი თანადაფინანსებით სარგებლობენ მხოლოდ 3-წლამდე ასაკის ბავშვები, ხოლო 18-წლამდე ასაკის ბავშვების, როგორც მწვავე, ისე გეგმიური მკურნალობის ხარჯებს 100%-ით პაციენტი ფარავს, _ ეს განცხადება ტიტე მგელაძემ 17 მარტს გამართულ პრესკონფერენციაზე გააკეთა.

იგი დღეს არსებულ სადაზღვევო პოლიტიკას შეეხო და აღნიშნა, რომ ამ მიმართულებით ბიუჯეტიდან ყოველთვიურად 15 მილიონამდე ლარი გამოიყოფა, ანუ დაზღვეულია მილიონამდე ადამიანი: _ აღნიშნული თანხების განკარგვა არ ხდება მიზანმიმართულად. საბიუჯეტო თანხების დიდი ნაწილი გადადის კერძო კომპანიების ხელში. სახელმწიფო ვალდებულია, მაქსიმალურად შეამციროს შუამავალ (სადაზღვევო) კომპანიათა როლი და ყოველი თეთრი დროულად უნდა იქნას მიწოდებული კონკრეტულ ადრესატამდე. ხშირია შემთხვევა, როცა ოჯახები საჭიროებენ სოციალურ დახმარებას, პოლისს და ა.შ. ისინი კი რატომღაც ამოღებული არიან სიღატაკის ზღვარს მიღმა მყოფ ოჯახთა მონაცემთა ბაზიდან, _ თქვა მგელაძემ.

მისი განმარტებით, დღეს უმძიმესი დემოგრაფიული პრობლემები დგას: _ ბოლო 10 წლის განმავლობაში, საშუალოდ ორჯერ შემცირდა შობადობა. რაც შეეხება ბავშვთა სიკვდილიანობას, ევროპის ქვეყნებს შორის, ამ საგანგაშო სტატისტიკის მიხედვით, პირველი ადგილი გვიჭირავს. ამას ბევრი მიზეზი აქვს _ ბოლო წლებში განვითარებული მძიმე მოვლენები, 2008 წლის აგვისტოს ომი და სხვა. “თავისუფალი დემოკრატების” უპირველესი ამოცანა ბავშვთა ასაკის მოსახლეობის, სამედიცინო მომსახურების 100%-იანი დაფინანსებაა, _ თქვა მგელაძემ.

ოზურგეთის მუნიციპალიტეტის სოფელ მთისპირში მცხოვრებ, ტრავმირებულ თამუნა შავაძის შესახებ “გურია ნიუსმა” არაერთხელ ისაუბრა და სპეციალური მიმართვაც კი გაავრცელა _ იგი ძვირადღირებულ ხანგრძლივ მკურნალობას საჭიროებს, რისი საშუალებაც მის ოჯახს არ გააჩნია. ამ საკითხის გადაჭრისკენ “თავისუფალმა დემოკრატებმა” კიდევ ერთხელ მოუწოდეს ხელისუფლებას და დასძინეს, რომ მეტი ყურადღებით მოეკიდონ აღნიშნულ საკითხს, რათა მოსახლეობის ის ნაწილი, რომელიც რეალურად საჭიროებს თანადგომას, არ დარჩეს დახმარების გარეშე: _ მივმართავთ მოსახლეობას _ ვინც ფიქრობს, რომ დარღვეულია მათი უფლებები და უკანონოდ არიან ამოღებულნი სოციალურად დაუცველ ოჯახების მონაცემთა ბაზიდან, დაგვიკავშირდნენ ჩვენ, რომ, გარკვეულწილად, დახმარება გავუწიოთ ამ პრობლემის მოგვარებაში.

თემურ სალუქვაძის თქმით, ბიუჯეტი სოციალურ სფეროზე უნდა იყოს ორიენტირებული: _ მე ბიუჯეტის ფორმირების პროცესში აქცენტს სოციალურ სფეროზე და პროგრამებზე ვაკეთებდი, რაც ხელისუფლებამ არ გაითვალისწინა. აქედან გამომდინარე, თავად ეს მიმართულება ძალიან მძიმე მდგომარეობაშია, კანონმდებლობაც დაუხვეწავია და ლაფსუსებით არის სავსე. ბატონ ტიტეს ძალიან ბევრი სამუშაო ექნება ამ კუთხით და ის თავის მოსაზრებებს და შეხედულებებს პერიოდულად წარმოგიდგენთ.