ოზურგეთის მუნიციპალიტეტის ხელმძღვანელობამ ახალი “აქცია” _ სკვერების გაყიდვა-გასხვისება წამოიწყო. იმ ნაკვეთის პრივატიზების შესახებ გადაწყვეტილება კი, სადაც ეგნატე ნინოშვილის ბიუსტი დგას, ოზურგეთის მუნიციპალიტეტის საკრებულომ უკვე მიიღო.
_ ოზურგეთის მუნიციპალიტეტის გამგეობას, ქალაქის განაშენიანებისა და კეთილმოწყობის გაუმჯობესების მიზნით, მიზანშეწონილად მიაჩნია, პრივატიზაციის წესით გასხვისდეს ეგნატე ნინოშვილის ქუჩაზე, 298 კვადრატული მეტრი მიწის ნაკვეთი (სადაც ეგნატე ნინოშვილის ბიუსტი დგას). გამგეობის მოსაზრებით, მიწა უნდა გასხვისდეს პირობით, რომ აშენდეს თანამედროვე ტიპის საზოგადოებრივი დანიშნულების შენობა, კაფე-ბარი, მარკეტი და ასე შემდეგ. გამგეობამ წარმოადგინა ლამაზი და კარგი პროექტი. რომლის თანახმადაც, იქაურობა აბსოლუტურად შეიცვლება. ამავე დროს, ჩადებულია პირობა, რომ ეგნატე ნინოშვილის ძეგლი გადავიტანოთ სხვა ადგილზე, რათა გურული კლასიკოსი მწერალი მომავალში უგულებელყოფილი არ დარჩეს _ ეს არ გვეკადრება. მაგრამ ვიტყვი, რომ ეს ლამაზი შენობა ნამდვილად დაამშვენებს იქაურობას და გმირთა მოედანს, _ ეს განცხადება ოზურგეთის მუნიციპალიტეტის ინფრასტრუქტურის განვითარების კომისიის თავმჯდომარემ თამაზ სალუქვაძემ, 2 მარტს, ოზურგეთის მუნიციპალიტეტის საკრებულოს სხდომაზე გააკეთა.
_ რაღაც, აღარაა ახლა ბიუსტები მოდაში და უნდა მოხდეს რაიმე კარგი მემორიალის აშენება, _ თქვა სალუქვაძემ. საგულისხმოა, რომ მიწის ნაკვეთის გასხვისება და მომავალი მშენებლობის ფოტომასალის წარმოდგენა ერთსა და იმავე სხდომაზე მოხდა.
ჩვენი წყაროს ინფორმაციით, აღნიშნული მიწის ფართობის მყიდველი ე.წ. “ავტორიტეტია”, რომელიც ერთ-ერთი საკმაოდ გავლენიანი მინისტრის ახლო მეგობარია. “ავტორიტეტი” 2008 წლის საპარლამენტო არჩევნების დროს მმართველ პარტიას ეხმარებოდა, მეტიც _ საარჩევნო უბნებს აკონტროლებდა. წყარო ამბობს, რომ ხელისუფლება მასთან სწორედ ამის გამოა ვალში.
ასევე, წყაროს თქმით, მას შემდეგ, რას “გურია ნიუსმა” საკრებულოს გადაწყვეტილება და ხელისუფლების ახალი პოლიტიკა გაახმოვანა, ეს პროცესი შეჩერდა. ამას ისიც ადასტურებს, რომ 28 მარტს, ოზურგეთის მუნიციპალიტეტის გამგეობის მიერ გამოცხადებულ აუქციონში რატომღაც აღნიშნული მიწის ნაკვეთი არ მოხვდა.
თუმცა, ამას არ ადასტურებენ ოზურგეთის მუნიციპალიტეტის გამგეობაში და ამბობენ, რომ “არსად არ ეჩქარებათ და როცა აუქციონის ორგანიზების მიზნით, საკრებულოს მიერ შექმნილი კომისია მიიღებს გადაწყვეტილებას, სწორედ მაშინ გამოცხადდება აუქციონი ამ ნაკვეთის გაყიდვის თაობაზე”.
ოზურგეთის მუნიციპალიტეტის საკრებულოს ოპოზიციონერი წევრი ლელა ნაცვალაძე: _ წინა მოწვევის საკრებულოზეც გამოიტანეს აღნიშნული მიწის ნაკვეთის პრივატიზაციის წესით გასხვისების საკითხი. მაშინდელმა საკრებულომ ამ საკითხის შესწავლა მოითხოვა და მხარი არ დაუჭირა აღნიშნული ტერიტორიის გასხვისებას. მაშინაც ითქვა, რომ ამის უკან მაღალჩინოსნების ინტერესები იდგა.
მაშინ, საკრებულოს ყოფილმა თავმჯდომარემ ვლადიმერ სურგულაძემ, ისევე, როგორც რამდენიმე სხვა საკითხში, პრინციპულობა გამოიჩინა და ეს პროცესი შეჩერდა. დღევანდელი ხელისუფლება კონკრეტული გადაწყვეტილებების დროს ტრადიციებს ღალატობს და უპრინციპობას ავლენს. მიმაჩნია, რომ ადგილობრივი ხელისუფლება ამგვარ გადაწყვეტილებებს ზეწოლის შედეგად იღებს, რაც კიდევ ერთხელ ადასტურებს, რომ თვითმმართველობა მართულია. გურიაშიც დაჰბერა ხელისუფლების სიომ _ ძეგლები და ბიუსტები აქეთ-იქეთ არბენინონ.
ხელისუფლების ქმედებიდან ჩანს, რომ ყველაფერი წინასწარ არის დაგეგმილი და აუქციონს კონკრეტულ პიროვნებებს არგებენ. მე თქვენს წყაროზე მეტი ინფორმაცია მაქვს და გეტყვით, რომ გურიაში მხოლოდ რამაზ ნიკოლაიშვილის ინტერესები კი არა, მისი ოჯახის ახლობლებისაც დგას და სწორედ მათ სურთ ამ ტერიტორიის შესყიდვა. რაც შეეხება “ავტორიტეტს”, ჩემთვის ასეთი “ავტორიტეტები”, პირიქით, უავტორიტეტონი არიან. ხელისუფლების და პოლიციის ბინძური შეკვეთების შემსრულებლები არაფერს წარმოადგენენ, არჩევნებში თანადგომას კი ყველას უფასებენ, _ მიაჩნია ლელა ნაცვალაძეს.
“სასწრაფოდ აღიკვეთოს საქართველოს დასახლებულ პუნქტებში გამწვანების ზონების, პარკების, ბაღებისა და სკვერების ხელყოფა, მათი საზღვრების ფარგლებში და მიმდებარე ტერიტორიებზე”, _ ვკითხულობთ საქართველოს პარლამენტის მიერ 1998 წლის 17 ივლისს მიღებულ დადგენილებაში. აქვეა მითითებული, რომ “საქართველოს პარკებში, ბაღებსა და სკვერებში, სადაც უკანონოდ აშენდა ან შენდება მათთვის შეუფერებელი ფუნქციის მქონე ნაგებობები, მკაცრად დაისვას იმ თანამდებობის პირთა პასუხისმგებლობის საკითხი, რომლებმაც გასცეს ბაღ-პარკების (განსაკუთრებით, კულტურის ძეგლთა კატეგორიის) ტერიტორიებზე ფართობების გამოყოფის ნებართვა მშენებლობებისა და სხვა მიზნით”. თუმცა, აქაც არის “გამოსავალი” _ ეს გადაწყვეტილება შევარდნაძის “ავადმოსაგონარი ეპოქის” პარლამენტმა მიიღო, მერე რა, რომ ის პარლამენტიც დღევანდელი ნაციონალებით იყო სავსე!
