ყოველ წელს, ცხრა აპრილის დილას, ნინო თოიძის საფლავი ყვავილებით ივსება. ერთხელ იხსენებენ, ახალგაზრდა ქალს, რომელიც, 1989 წლის 9 აპრილს, გმირულად დაიღუპა.
წელს, ოზურგეთის მუნიციპალიტეტის სოფელ ლიხაურში ნინოს თოიძის საფლავზე უამრავი ყვავილი მიმოიფინა, მაგრამ ცხრა აპრილის სიმბოლო _ ტიტები არსად ჩანდა.
ნინო თოიძის პედაგოგი, მავლინა თოიძე იხსენებს, რომ განსაკუთრებული ადამიანი იყო: “მას არ შეეძლო ცუდის გაკეთება. იყო წარჩინებული მოსწავლე, ნიჭიერი ახალგაზრდა, იგი ჩემთვის განუმეორებელია და მე ის მეამაყება.
“იგი დიდი პატრიოტი იყო. რუსთაველზე ტანკები რომ შემოვიდნენ, ნინომ დაინახა, როგორ წაიქცა მისი მეგობარი აზა ადამია. მივარდა მასთან, წამოყენება უნდოდა, მაგრამ ვერ მოახერხა, რადგან ნიჩაბი ჩაარტყეს კეფაში. ღმერთს ვევედრები, რომ ასეთი დღე აღარასოდეს განმეორდეს”, _ ამბობს ნინოს და, ქეთინო თოიძე.
ოზურგეთის მუნიციპალიტეტის გამგებლის გიორგი ტაკიძის თქმით, ეს დღე საქართველოს უახლოეს ისტორიაში ყველაზე მტკივნეული და მნიშვნელოვანია: _ 22 წელია ვიხსენებთ ამ გმირებს. ყველა ჩვენთაგანის ვალია, მათ ხსოვნას სათანადო პატივი მივაგოთ.
9 აპრილს ნინო თოიძის საფლავი ყვავილებით “გურიის თავისუფალი დემოკრატების” წევრებმა შეამკეს.
“თავისუფალი დემოკრატების” წევრებმა, გია ცქვიტინიძემ და ზაზა ცინცაძემ თქვეს, რომ “ყველა ქართველმა პატივი უნდა მიაგოს იმ გმირებს, რომლებიც დაიღუპნენ საქართველოს დამოუკიდებლობისთვის ბრძოლაში. ჩვენმა ქვეყანამ თავი დააღწია რუსეთის ტყვეობას, მაგრამ დღეს პოლიციური რეჟიმის ქვეშ იმყოფება _ იგი არ არის თავისუფალი, თავისუფალი სიტყვა შეზღუდულია, პატიმრებს აწამებენ. ჩვენ ვალდებულნი ვართ, გავაგრძელოთ ბრძოლა დამოუკიდებლობისთვის და მივაღწიოთ იმ მიზანს, რასაც ნინო თოიძე და მისი მეგობრები შეეწირნენ!”
