(გურია ნიუსი, ლანჩხუთი) _ თბილისში, “მართვეს” სპორტულ კომპლექსში, გაიმართა რესპუბლიკური პირველობა კარატე-დოში, სახელწოდებით “ოლიმპიური გამოწვევა”. ტურნირში საქართველოს ყველა რეგიონის კარატისტებთან ერთად ლანჩხუთის სპორტული კლუბის წევრებიც იღებდნენ მონაწილეობას.
ჩვენთან საუბარში კარატე-დოს გურიის ფედერაციის პრეზიდენტმა მერაბ თურქიამ თქვა: _ ბოლო დროს, ჩვენმა კარატისტებმა თავისი წარმატებებით ნამდვილად გაგვანებივრეს. ამჯერადაც წარმატებას მიაღწიეს და სხვადასხვა სინჯის 11 მედლის მოპოვება შეძლეს. 5 ოქრო, 4 ვერცხლი, 2 ბრინჯაო _ ეს არის ჩვენებურთა თბილისური მონაგარი. გიორგი კეჭეხმაძემ და ნიკა ჩხაიძემ ორ-ორი ოქროს მედლის მოპოვება შეძლეს, ასევე ოქროსმედალოსანი გახდა გუგა ივანაშვილი. ორი ვერცხლის მედალი დათო წილოსანმა მოიპოვა, მეორე ადგილს დასჯერდნენ: ვაკო დემურია და გიორგი ჩხაიძე. აღსანიშნავია, რომ ამ უკანასკნელმა აბსოლუტურ კატეგორიაში ბრინჯაოს მედალიც მოიპოვა. მესამე საპრიზო ადგილი გიორგისთან ერთად გოგიტა მახარაძემ მოიპოვა. თბილისში გამართული ტურნირი საქართველოს პირველმა ლედიმ სანდრა რულოვსმა და სპორტის მინისტრის მოადგილემ დავით ნამგალაურმა გახსნეს. ტურნირის დასრულების შემდეგ კი გამარჯვებულებს სამახსოვრო საჩუქრებიც გადასცეს.
უახლოეს მომავალში ჩვენი კარატისტები პრეზიდენტის თასისთვის ბრძოლაში ჩაერთვებიან, რომელიც ქალაქ ბათუმში გაიმართება.
