შინაგან საქმეთა სამინისტროს, გურიის რეგიონის ოზურგეთის, ჩოხატაურის და ლანჩხუთის პოლიციის მთავარი სამმართველოების, დროებითი მოთავსების იზოლატორებში, საქართველოს სახალხო დამცველის ინფორმაციით, საპროტესტო აქციების დროს დაკავებული 26 პირია მოთავსებული.
2011 წლის 26-28 მაისს, საქართველოს სახალხო დამცველის რწმუნებულებმა მონიტორინგი განახორციელეს შინაგან საქმეთა სამინისტროს დროებითი მოთავსების იზოლატორებში, სადაც განთავსებულნი არიან 2011 წლის მაისში საპროტესტო აქციების დროს დაკავებული პირები. სახალხო დამცველის პრევენციისა და მონიტორინგის დეპარტამენტმა მონიტორინგი განახორციელა თბილისის, იმერეთის, აჭარის, გურიის, შიდა ქართლის, ქვემო ქართლის, მცხეთა-მთიანეთის და კახეთის დროებითი მოთავსების იზოლატორებში. მონიტორინგის დროს სახალხო დამცველის რწმუნებულები გაესაუბრნენ როგორც იზოლატორების ადმინისტრაციას, ასევე დაკავებულ პირებს, შეამოწმეს შესაბამისი დოკუმენტაცია.
“მონიტორინგის შედეგად გაირკვა, რომ დაკავებულთა უმრავლესობას მეტ-ნაკლებად სერიოზული ხასიათის დაზიანებები აღენიშნება. რამდენიმე დაკავებულ პირს აღენიშნება მძიმე კატეგორიის დაზიანებები, რაც ასევე დასტურდება დროებითი მოთავსების იზოლატორში შეყვანისას შევსებული გარეგნული დათვალიერების ოქმებით. დაკავებულები ზეპირ საუბარში აცხადებენ, რომ დაზიანებები მიღებული აქვთ, როგორც აქციის დაშლისას, ისე დაკავების შემდგომ, თუმცა ბევრმა მათგანმა უარი განაცხადა სახალხო დამცველის წარმომადგენლისთვის ამ ეტაპზე ახსნა-განმარტების მიცემაზე. სახალხო დამცველი აუცილებლად მიიჩნევს, სასამართლო სამედიცინო ექსპერტიზის დაუყოვნებლივ ჩატარებას დროებითი მოთავსების იზოლატორებში მოთავსებულ იმ პირთათვის, რომელთაც აღენიშნებათ სხვადასხვა კატეგორიის დაზიანებები და თითოეულ ფაქტზე შესაბამის რეაგირებას ითხოვს”, _ ეს ინფორმაცია სახალხო დამცველის ოფიციალურ ვებ-გვერდზე 28 მაისს განთავსდა.
ოზურგეთის პოლიციის მთავარი სამმართველოს დროებითი მოთავსების იზოლატორში, 27 მაისის მდგომარეობით მოთავსებული იყვნენ: ხვიჩა კვარაცხელია, ელგუჯა პაპუნაშვილი, ირაკლი წაქაძე, გიორგი ბუჯიაშვილი, ვლადიმერ ბუბულაშვილი, გივი ქურდიანი, ზაზა ხაჩიძე და აიდმირ ლაგვილავა.
ჩოხატაურის პოლიციის მთავარ სამმართველოს დროებითი მოთავსების იზოლატორში, ასევე 27 მაისის მდგომარეობით იმყოფებოდნენ: გიორგი გურგენაძე, ამირან ჩუბინიძე, გიგა გავაშელიშვილი, გიორგი მატიაშვილი, ლეგა ონიანი, დიმიტრი ტიტვინიძე, ირაკლი კვარაცხელია და ავთანდილ რიჟამაძე.
ხოლო ლანჩხუთის პოლიციის მთავარი სამმართველოს დროებითი მოთავსების იზოლატორებში რჩებოდნენ : მზეჭაბუკი ჩაჩხიანი, ზურაბ მაყაშვილი, ვეფხია დევნოზაშვილი, გიორგი დუნდუა, გოჩა ლაშხი, ვარდენ კუტალაძე, გიორგი ყოლბაია, ტარიელ ფლუიძე, თენგიზ და გელა მამნიაშვილები.
“გურია ნიუსმა”, 26 მაისს თბილისში აქციის დარბევის თუ მიმდინარეობისას დაკავებული მოქალაქეების, სხვადასხვა რეგიონის პოლიციის სამმართველოებში, დროებითი მოთავსების იზოლატორებში გადაგზავნის შესახებ, სანდო წყაროზე დაყრდნობით, ინფორმაცია 27 მაისს გაავრცელა.
წყაროზე დაყრდნობით ვწერდით, რომ შინაგან საქმეთა სამინისტროს გურიის სამხარეო სამმართველოს, რაიონულ სამმართველოებში, დროებითი მოთავსების იზოლატორში 30-მდე მათგანი იყო მოთავსებული. ასევე, მასზე დაყრდნობით გავავრცელეთ ინფორმაცია, რომ ოზურგეთის პოლიციის სამმართველოში აქციაში მონაწილე 10-მდე პირი იყო მოთავსებული. წყარო ამბობდა, რომ დაკავებულები ლანჩხუთის რაიონულ სამმართველოში იყვნენ გადმოგზავნილნი.
წყარო, ვარაუდობდა კიდეც, რომ მათ სათანადო “ფილტრაციის” შემდეგ გაათავისუფლებდნენ, ან აღმკვეთ ღონისძიებას შეუფარდებდნენ.
შინაგან საქმეთა სამინისტროს მიერ, გავრცელებული ინფორმაციის თანახმად, ამ დროისთვის დაკავებულია აქციაში მონაწილე 105 პირი, ხოლო სახალხო დამცველის მონაცემებით,მხოლოდ მისი თანამშრომლების მიერ გადამოწმებულ იზოლატორებში 162 პირი იმყოფება.
