“გურია” და “მერცხალი” ერთმანეთს დააშორეს

(გურია ნიუსი, ლანჩხუთი) _ საქართველოს ფეხბურთის ფედერაციამ პირველ ლიგაში გუნდების რაოდენობა 20-მდე გაზარდა და ისინი 2 ზონად დაჰყო. “მიხეილ მესხის” სტადიონის საკონფერენციო დარბაზში, საქართველოს ჩემპიონატის პირველი ლიგის გუნდების წილისყრა გაიმართა. წილისყრას თითქმის ყველა კლუბის წარმომადგენელი ესწრებოდა. პროცესს უშუალოდ ადევნებდა თვალს სფფ-ის პრეზიდენტი ზვიად სიჭინავა.

წილისყრის დაწყებამდე, სფფ_ის პრეზიდენტი დიდხანს ესაუბრა კლუბების წარმომადგენლებს და ფედერაციის მხრიდან, ყოველგვარ შესაძლო დახმარებას დაჰპირდა. თუმცა, თავის მხრივ, კლუბებს დარჩენილი დავალიანებების გასტუმრებისკენ მოუწოდა.

საბოლოოდ, წილისყრის შედეგად გუნდები ასეთი თანმიმდევრობით დალაგდნენ:

ა ზონა: 1. “ჩხერიმელა” _ საშინაო მატჩებს ჩაატარებს ხარაგაულის სტადიონზე; 2 .”სტუ” _ სტადიონი “შატილი”; 3. “სამტრედია” _ “ეროსი მანჯგალაძის” სახელობის სტადიონი; 4. “ლოკომოტივი” _ საგურამოს ბაზის სტადიონი; 5. “კოლხეთი” (ხობი) _ ხობის სტადიონი; 6. “ჭიათურა” _ ჭიათურის სტადიონი; 7. “მეშახტე” _ ტყიბულის სტადიონი; 8. “მესხეთი” _ ახალციხის სტადიონი; 9. “მერცხალი” _ ოზურგეთის სტადიონი; 10. “დინამო” ბათუმი _ სტადიონი “ადელი”.

ბ ზონა: 1. “სქური” _ წალენჯიხის სტადიონი; 2. “აეტი” (სოხუმი) _ სტადიონი “შატილი”; 3. “ჩიხურა” _ საჩხერის სტადიონი; 4. “სამგურალი” _ წყალტუბოს სტადიონი; 5. “ადელი” (ბათუმი) _ (სტადიონი “ადელი”; 6. “გურია” _ ლანჩხუთის სტადიონი; 7. “ნორჩი დინამოელი” _ სტადიონი “შატილი”; 8. “სულორი” _ ვანის სტადიონი; 9. “ზოოვეტი” _ მცხეთა, სტადიონი “არმაზი”; 10. “იმერეთი” _ ხონის სტადიონი.

როგორც ხედავთ, ფედერაციამ გურული კლუბები სხვადასხვა ზონაში მოახვედრა. ასევე მოიქცა სხვა მეზობლების შემთხვევაში. ამით სავარაუდოდ გარიგებების წინააღმდეგ გაილაშქრა, თუმცა, გურული დერბის შემთხვევაში ეს უადგილოა _ გასულ სეზონში, როცა “მერცხალს” ქულები ჰაერივით სჭირდებოდა და “გურიასთვის” მოგება-წაგება არაფერს ცვლიდა, ლანჩხუთური შეხვედრა დაუნდობელი გამოდგა და 1:1 დასრულდა. რაც შეეხება რეგლამენტს, უმაღლეს ლიგაში გადასვლის შანსი ზონებში პირველ-მეორე ადგილებზე გასულ გუნდებს მიეცემათ _ ეს ოთხეული, თებერვლიდან, უმაღლესი ლიგის ბოლო ოთხეულთან ერთად, ელიტლიგაში დასარჩენად წინა ეტაპზე მიღებული ქულების განულების პრინციპით იბრძოლებს.