(გურია ნიუსი, ლანჩხუთი) _ ლანჩხუთელი ოპოზიციონერის, “თავისუფალი დემოკრატების” ადგილობრივი ოფისის ხელმძღვანელის ელგუჯა ჩხაიძის თქმით, ჩიბათში 102 ჰექტარი მიწის ნაკვეთი უცხოელებმა, კერძოდ კი თურქებმა იყიდეს. იგი ხელისუფლებას მწვავედ აკრიტიკებს და ბევრ უკანონო ქმედებაში სდებს ბრალს:
_ რაც დრო გადის, ცხადი ხდება ხელისუფლების უპასუხისმგებლობა საკუთარი მოსახლეობის მიმართ. ხელისუფლება საქართველოში სულ უფრო აგრესიული ხდება, ხალხი კი მიეჩვია მონობაში ყოფნას, ეშინია პროტესტის გამოთქმის იმ უზნეო საქციელის გამო, რასაც გროშებად მოსყიდული ადამიანების ჯგუფი ახორციელებს. ისინი მხარს უჭერენ და აპიარებენ მათ უაზრო ქმედებებს. შექმნილია უამრავი უფუნქციო სამსახურები, სადაც დასაქმებული არიან “ნაციონალების” კოორდინატორები.
ხელისუფლება გვამადლის, რომ “რაღაც-რაღაცეებს” აკეთებს. არადა, 10 მილიარდი ვალი დაგვადეთ და აქედან რამდენი მოხმარდა ქვეყნის კეთილდღეობას, არავინ იცის. ეს ვალები ჩვენი მომავალი თაობების გადასახდელია. დადგება დრო და ეს ვალები მწარედ აისახება მათ ცხოვრებაზე; “დედალი და მამალი” ძროხების მინისტრი, რომელიც ტყუილების გუდაა, ტრაბახობს, სოფლის მეურნეობაში მიღწეული წარმატებებით, თუმცა, “წარმატების მაგალითად” ისიც კამარა, რაც “ბიზნეს-კურიერში” ვნახეთ _ თითქოს, სოფელ ჩიბათში ჩაი იკრიფება, იქვე მუშავდება და ხალხი დასაქმებულია! როგორ შეიძლება აგრობიზნესი განავითაროს ქართველმა გლეხმა, როცა მიწა მისთვის ხელმიუწვდომელია, უცხოელები კი ადვილად და იაფად ყიდულობენ?! _ ამბობს ჩხაიძე.
ოპოზიციონერის განცხადებით, მიწის სააუქციონო ფასი 1 ჰექტარზე 60 ლარიდან 500 ლარამდე გაზარდეს, რათა ადგილობრივებისთვის ხელმიუწვდომელი გაეხადათ: _ ერთი თვის წინ ჩატარდა აუქციონი სასოფლო-სამეურნეო დანიშნულების მიწაზე. თურქებმა სოფელ ჩიბათში 102 ჰექტარი მიწის ნაკვეთი შეიძინეს, ჯოხოთში _ 62 ჰექტარი, ნაბაკევში _ 40 ჰექტარი. გეკითხებით, თუ ქართული მიწა-წყალი, ქონება თურქებს და არაბებს უნდა ჩავაბაროთ, რატომ შეეწირა ჩვენი წინა თაობები უცხო ურდოების შემოსევას? მტერს ის არ აინტერესებდა, რასაც დღეს ვაძლევთ?! რატომ შევწირეთ აფხაზეთს ამდენი ქართველი, თუ ის მიწა თურქებისა და არაბებისთვის გვინდა?! ხვალ შეიძლება ამ ხელისუფლებამ ყველა მტრად გამოაცხადოს, ვინც ჩვენი ქვეყნის დასაცავად იბრძოდა!
ლანჩხუთელი ოპოზიციონერი ფიქრობს, რომ საკრებულოზე აღნიშნული საკითხი რომ გასულიყო განსახილველად, “ერთსულოვანი მხარდაჭერა” იქნებოდა: _ ხელს აუწევდნენ, შემდეგ იტყოდნენ, რა გვექნა, “ზევიდან” მოდისო. ასე რომ არ იყოს, საკრებულოს დეპუტატებიდან ვინმე დღემდე ამოიღებდა ხმას, _ მიაჩნია ელგუჯა ჩხაიძეს.
