“გურია ნიუსისთვის” ცნობილი ხდება, რომ ძალიან მალე, ჩოხატაურსა და ლანჩხუთში მუნიციპალიტეტის გამგებლებმა, შესაძლოა, თავიანთი ნება-სურვილით (ან იძულებით) განცხადება დაწერონ გათავისუფლების შესახებ და თანამდებობები დატოვონ. მანამდე კი ოზურგეთის მუნიციპალიტეტის გამგებლობისთვის “კასტინგი” დაიწყო. რამდენად სამართლიანად და კანონიერად დაინიშნება ოზურგეთის მუნიციპალიტეტის ახალი გამგებელი, ეს სხვა საქმეა, მაგრამ კანდიდატების სია ყოველდღიურად ახლდება და რიცხობრივად იზრდება. გასულ კვირას ხმები გავრცელდა სატყეო სამმართველოს გურიის სამსახურის ახლადდანიშნული უფროსის ბესო ქარჩავას გამგებლად დანიშვნის შესახებ, რომელიც ადრე პრივატიზაციის სამმართველოს გურიის სამსახურის უფროსი იყო. ბესო ქარჩავა ჩვენთან საუბარში ამბობს, რომ ოფიციალურად მისთვის არავის მიუმართავს: _ ჭორის დონეზე ვიცი, რომ ჩემზეც საუბრობენ, თუმცა, არ მგონია, ეს ხმები საფუძვლიანი იყოს, _ გვითხრა ქარჩავამ.
თუ ადრე ლანჩხუთის მუნიციპალიტეტის გამგებელზე, გიორგი გოგუაძეზე ამბობდნენ, რომ შესაძლოა, ის მისმა მეგობარმა, რამაზ ნიკოლაიშვილმა გურიის გუბერნატორად დანიშნოს, ახლა გავრცელდა ხმები, რომ მან შესაძლოა, ოზურგეთის გამგებლის სავარძელი დაიკავოს.
გიორგი გოგუაძე საკუთარი პერსონის ოზურგეთის მუნიციპალიტეტის გამგებლის პოსტზე დანიშვნას ჭორს უწოდებს:
_ არ არის სწორი ინფორმაცია.
_ ბატონო გიორგი, ჩვენი წყაროს ინფორმაციით, თქვენ კონსტიტუციური უსაფრთხოების დეპარტამენტის თანამშრომლებმა დაგიბარეს…
_ საიდან იგებთ ამ ინფორმაციებს? მასე ძალიან ბევრ რამეს ამბობენ, _ გვითხრა გოგუაძემ და ჩქარი ნაბიჯებით გაგვეცალა.
ჩვენი წყაროს ინფორმაციითვე, ჩოხატაურის მუნიციპალიტეტის გამგებლის სავარძელი ირაკლი ანდღულაძისთვის მზადდება, მიუხედავად იმისა, რომ სავარძელი, ჯერჯერობით, ცარიელი არ არის. როგორც ამბობენ, საარჩევნოდ, ხელისუფლებას კონსტიტუციური უსაფრთხოების დეპარტამენტის ამჟამინდელი თანამშრომელი ანდღულაძე უფრო “აწყობს”. თუ ეს ასე მოხდა, არ არის გამორიცხული, რომ გურიის ყოფილი გუბერნატორის, რამაზ ნიკოლაიშვილის “ძლევამოსილება” გურიაში შესუსტდეს. ჩვენი წყაროები ვარაუდობენ, რომ ეს ამ უკანასკნელისთვის დიდი დარტყმა იქნება.
ანდღულაძესთან ინფორმაციის გადამოწმებას შევეცადეთ, თუმცა მასთან დაკავშირება, ვერ მოვახერხეთ.
აღსანიშნავია, რომ 14 აგვისტოს, კურორტ გომისმთის დღესასწაულზე, სადაც გურიის ხელისუფლების წარმომადგენლებთან ერთად რამაზ ნიკოლაიშვილიც იმყოფებოდა, არ ჩანდნენ მერაბიშვილისა და ადეიშვილის კადრები, არც კუდ-ის მაღალჩინოსანი გურამ ჩანტლაძე, არც სამხარეო პოლიციის სამმართველოს შეფი გიგა ჯაფარიძე, არც ოზურგეთის პოლიციის უფროსი ნიკოლოზ იმერლიშვილი და არც ოზურგეთის რაიონული პროკურორი კახა კოჩივარი.
