“კორუფციული რისკის მატარებელი ბიუჯეტი”

გურიის “თავისუფალი დემოკრატების” ლიდერი, ოზურგეთის მუნიციპალიტეტის საკრებულოს ოპოზიციონერი დეპუტატი, თემურ სალუქვაძე ირწმუნება, რომ ოზურგეთის მუნიციპალიტეტის ბიუჯეტი მაღალი კორუფციული რისკის მატარებელ სამართლებრივ აქტს წარმოადგენს.

სალუქვაძე გამგებლის დაკავების ფაქტს ეხმაურება და ამბობს, რომ “თავისუფალმა დემოკრატებმა” პოზიციის დაფიქსირება საჭიროდ ჩათვალეს არა ოზურგეთის მუნიციპალიტეტის გამგებლის გიორგი ტაკიძის დაკავების გამო, არამედ იმიტომ, რომ “ამ შემთხვევამ დაადასტურა ჩვენი ვარაუდი ოზურგეთის მუნიციპალიტეტის ბიუჯეტში ხელოვნურად გაზრდილი ხარჯების არამიზნობრივად გამოყენებასა და კორუმპირებულ ჩინოვნიკთა ჯიბეში თანხების მოხვედრის თაობაზე.

განსაკუთრებული აქცენტი გვინდა გავაკეთოთ ოზურგეთის საკრებულოს ნაციონალი წევრების გულგრილობაზე, რომლებსაც ეკისრებათ პასუხისმგებლობა საბიუჯეტო სახსრების არამიზნობრივად და უთავბოლოდ ხარჯვაზე. მიგვაჩნია, რომ მუნიციპალიტეტის გამგებლისკენ, როგორც მთავარი დამნაშავისკენ, ხელის გაშვერა, ამ შემთხვევაში, არ შეიძლება _ მომხდარზე პასუხისმგებლობა უნდა იკისროს საკრებულოს ყველა იმ წევრმა, რომელმაც საბიუჯეტო სახსრების ხარჯვას მხარი ისე დაუჭირა, რომ არ გაუაზრებია სავარაუდო შედეგები და კორუფციული რისკები”, _ გვითხრა სალუქვაძემ.

მას მიაჩნია, რომ ოზურგეთის ბიუჯეტიდან ფულის მითვისების სქემა არ შეიძლება აიწყოს ორ პიროვნებაზე _ დასუფთავების სამსახურის უფროსსა და მუნიციპალიტეტის გამგებელზე. შესაბამისად, ამ საქმეში მთავარი დამნაშავეები საზოგადოებისთვის, ჯერჯერობით, უცნობია და სავარაუდოდ, ასეც დარჩება ბოლომდე.

“ოზურგეთის ბიუჯეტის სხვა ნაწილებიც ხელოვნურადაა გაზრდილი, რის გამოც არსებობს კორუფციული გარიგებებისა და საბიუჯეტო თანხების არამიზნობრივი ხარჯვის ძალიან მაღალი რისკი. სწორედ ამიტომ, ჩვენ, თავისუფალმა დემოკრატებმა, თავის დროზე მხარი არ დავუჭირეთ ბიუჯეტის ამ სახით დამტკიცებას. ამომრჩევლებს, რომლებმაც ხმა მისცეს ნაციონალურ მოძრაობას, მინდა ვამცნო, რომ ისინი არჩევანში შეცდნენ, რადგანაც მხარი დაუჭირეს კორუმპირებული და გულგრილი ადამიანების საკრებულოში მოსვლას. სწორედ მათი ჩუმი თანხმობით ხდება ხალხის ფულის მითვისება. ყოველივე ზემოხსენებულიდან გამომდინარე, მოვითხოვთ: ოზურგეთის მუნიციპალიტეტის საკრებულომ საფუძვლიანად გადახედოს 2011 წლის მუნიციპალურ ბიუჯეტს, რათა მინიმუმამდე შემცირდეს კორუფციული ჯგუფების მიერ ბიუჯეტიდან თანხების დატაცების რისკი. შესაბამისმა ორგანოებმა საფუძვლიანად შეისწავლონ ოზურგეთის მუნიციპალური ბიუჯეტის ხარჯვითი ნაწილი და გახორციელებული სახელმწიფო შესყიდვები, სხვა კორუფციული ფაქტების გამოვლენის მიზნით”, _ ამბობს ოზურგეთის მუნიციპალიტეტის საკრებულოს ოპოზიციონერი დეპუტატი.

ამ საკითხთან დაკავშირებით, “გურია ნიუსი” შეეცადა კომენტარი ოზურგეთის მუნიციპალიტეტის საკრებულოს თავმჯდომარისგან, ალეკო მამეშვილისგან მოეპოვებინა, მაგრამ როგორც საკრებულოს საზოგადოებასთან ურთიერთობის განყოფილებაში გვითხრეს, სასამართლოს შემაჯამებელ გადაწყვეტილებამდე, საკრებულოს წევრები და თავმჯდომარე კომენტარისგან თავს იკავებენ.