ჩვენი ინფორმაციით, ტრაილერს ტრანზიტული ტვირთი _ ტყვიაგამძლე მინები და ალუმინი გადაჰქონდა. ავარიის შედეგად მხოლოდ მინების უმნიშვნელო ნაწილი დაზიანდა, ხოლო ალუმინი გადარჩა. როგორც ამბობენ, ავტოსაგზაო შემთხვევა იმან გამოიწვია, რომ 23 წლის ახალგაზრდა მძღოლს ჩაეძინა. ის მძიმედ არ დაშავებულა. იმის გამო, რომ ტვირთი ტრანზიტული გახლდათ, ფოთიდან ჩამოვიდნენ საბაჟო სამსახურის თანამშრომლები, რომლებმაც ჯერ დალუქეს გადასატანი ნივთები, შემდეგ კი გააკონტროლეს მისი სხვა ტრაილერში გადატანა. ავტოშემთხვევის გამო მაგისტრალის კონკრეტულ მონაკვეთზე მოძრაობა რამდენიმე საათით შეჩერდა, რადგან ამწეს ფოთიდან ჩამოყვანას და მანქანის ამოყვანას დაახლოებით 5 საათი დასჭირდა.
შეგახსენებთ, რომ ერთი კვირის წინ, მაგისტრალის იმავე მონაკვეთზე ტრაგედია დატრიალდა _ ავტობუსის, მინი-ვინისა და მიკროავტობუსის შეჯახებას ამ უკანასკნელში მჯდომი 8 ადამიანის სიცოცხლე ემსხვერპლა. როგორც გავარკვიეთ, მაშინაც ავტობუსს, რომელსაც თურქი მძღოლი მართავდა, მგზავრების გადაყვანასთან ერთად ტრანზიტული ტვირთიც გადაჰქონდა და მისი დალუქვისა და აღწერის გამო მაშინაც დაგვიანდა გზის გახსნა. რაც შეეხება ერთი კვირის წინანდელ ავარიაში დამნაშავედ ეჭვმიტანილ მძღოლს, ისიც თურქი ეროვნების გახლავთ და სამართალდამცველებმა იგი საგზაო მოძრაობის წესების დარღვევისა და გადაჭარბებული სიჩქარით მოძრაობის გამო ავარიის ღამესვე დააკავეს.
დასასრულ, გეტყვით იმასაც, რომ ლანჩხუთის მოსახლეობა კარგა ხანია აღშფოთებას გამოთქვამს თურქი მძღოლების მიერ მოძრაობის წესების ხშირი დარღვევის გამო. მათი თქმით, პატრული ზედმეტად ლოიალურია უცხოელი მძღოლების მიმართ, არადა, სწორედ ისინი ჰქმნიან განსაკუთრებულ ხიფათს, როცა სატვირთო და გადამზიდავი მანქანებით დასახლებულ ტერიტორიებზე მაღალი სიჩქარით მოძრაობენ. მთავარი მაგისტრალის ლანჩხუთის მონაკვეთზე წინა კვირაში მომხდარი ტრაგედიის გარდა, თურქი მძღოლების დაუდევრობით რამდენიმე ადამიანი დაიღუპა, მათ შორის ახალგაზრდები. ყველაზე გახმაურებული გახლდათ შუხუთში მომხდარი ავარია, რამაც მასწავლებლის სიცოცხლე შეიწირა _ ამ საქმეს შს სამინისტროს შესაბამისი დეპარტამენტი იძიებდა. თუმცა, ყველა ზემონახსენებ შემთხვევაში უცხოელი მძღოლები არ ისჯებოდნენ _ წინა კვირაში მინი-ვინის მძღოლის დაკავება ამ კუთხით პირველი შემთხვევაა. აქვე იმასაც გეტყვით, რომ ხშირია ტრაილერის გადაბრუნების შემთხვევებიც, რომელთაგან გამოსარჩევია კურიოზული შემთხვევა _ ავტომობილს უნიტაზები გადაჰქონდა და პატრულის მოსვლამდე მოსახლეობამ ტრაილერიდან გადმოყრილი უნიტაზების დიდი ნაწილი დაიტაცა.
