(გურია ნიუსი, ლანჩხუთი) _ ლანჩხუთში, წელს, ამერიკული ჰიბრიდული ჯიშის სიმინდი დათესეს და ცოტა ხანში პირველ მოსავალსაც ელოდებიან. მართალია, ხელისუფლების წარმომადგენლები გვიმტკიცებდნენ, რომ ასობით ჰექტარზე მოხდებოდა სიმინდის ჰიბრიდული თესლის დათესვა, მაგრამ ასე არ მოხდა _ ზოგი ბანკებთან ურთიერთობას მოერიდა, ზოგი კიდევ ჰიბრიდულ სიმინდს ეჭვის თვალით უყურებდა.
ლანჩხუთის მუნიციპალიტეტის გამგებლის მოადგილე გიორგი ჭყონია ლანჩხუთში ჰიბრიდული ჯიშის სიმინდის კარგ მოსავალს ელოდება: _ საკმაოდ ნორმალურ მოსავალს ველით. წელს ორი სახის თესლი შემოვიტანეთ _ თეთრი და ყვითელი. თეთრი ჰიბრიდი მოსახლეობამ ნაკლებად დათესა. არადა, როგორც მოსავალმა აჩვენა, უფრო მომგებიანი ყოფილა. ყვითელი კი უფრო მეტია და კარგადაც მოვა. ჩვეულებრივ სიმინდზე ორჯერ მეტ მოსავალს ველოდებით მიუხედავად იმისა, რომ წელს საკმაოდ ცუდი ამინდები იყო და თესვის პროცესი გაძნელდა.
_ ბატონო გიორგი, ჰიბრიდის დათესვის შემთხვევაში, ორჯერ არის მოსავლის აღება შესაძლებელიო, ეს განცხადება ბევრჯერ გაკეთდა, რეალურად კი მხოლოდ ერთხელ მოიწია გლეხმა. რატომ მოხდა ასე?
_ თუ აგროვადებს დაიცავ და სიმინდს მაისში დათესავ, ორჯერ მიიღებ მოსავალს. არსებობს ჰიბრიდის ისეთი თესლი, რომელიც 90 დღეში იძლევა მოსავალს.
თუმცა, გამგებლის მოადგილის თქმით, ასეთი თესლი შემოტანილი არ ჰქონიათ, მაგრამ თუ მოსახლეობის მოთხოვნა იქნებოდა, შეეძლოთ ამის ორგანიზება. ჭყონიას მოჰყავს მიზეზები, თუ რატომ არ დაითესა ჰიბრიდული სიმინდი იმ რაოდენობით, რასაც ელოდნენ: _ ბანკებთან ურთიერთობას მოერიდა ხალხი. როგორც ჩანს, უფრო შიშის ფაქტორი იყო. მომავალში უფრო წარმატებული იქნება ეს პროექტი. ახლა ბანკი “კონსტანტა” შემოვიდა ჩვენთან. მას სხვებთან შედარებით კარგი პირობები აქვს და შესაბამისად მოსახლეობა უფრო დაინტერესდება აგრო-სესხებით. დამატებით გარანტიებს არ ითხოვს _ თუ გლეხს ერთი ძროხა ყავს, 500 ლარამდე სესხს აძლევენ. ნამდვილად მისაღები პირობებია. ვიცი, რომ სოფელ ჩიბათში 40 ჰექტრამდე დაითესა ბანკიდან გამოტანილი სესხით და საკმაოდ კარგ მოსავალსაც ელიან. ასევე მოხდა აბაშის ტერიტორიასთან ახლოს, იქ, მგონი, 50 ჰექტარი მიწა დამუშავდა.
_ ბევრი ამბობს, რომ ამოსული სიმინდი საერთოდ გაქრა.
_ იყო ასეთი შემთხვევებიც, მაგრამ უფრო ზღვისპირეთში. მაღალმა ტენიანობამ გამოიწვია ეს. წყალი დადგა ფართობში კვლების არარსებობის გამო და სიმინდი გაფუჭდა. თორემ, ახლა რომ ვთქვათ, გაქრაო, არასწორია. დამერწმუნეთ, მოსავალი ნამდვილად იქნება. _ ამბობს ჭყონია.
მისივე თქმით, მცდარი მოსაზრებაა, თითქოს ჰიბრიდული სიმინდი საჭმელად არ ვარგა: _ არსებობს უამრავი ჰიბრიდი, რომელსაც “პიონერი” აწარმოებს. თქვენ რომ კიტრს ჭამთ, გგონიათ, ის სუფთა თესლიდან არის? ყველა ჰიბრიდია. საერთოდ, ჰიბრიდზე ხალხს ცუდი წარმოდგენა აქვს. ჰიბრიდი ჩვეულებრივი თესლის და ხელოვნურად შექმნილის შეჯვარების შედეგად არის მიღებული. პირადად რამდენჯერმე გავსინჯე და საკმაოდ გემრიელია. არსებობს როგორც საფურაჟე, ასევე სასილოსე. ეს უკანასკნელი შეიძლება საკვებად არც თუ ისე გემრიელი იყოს, მაგრამ საშიში არც არაფერია. ცუდი რომ იყოს, იმდენჯერ მაქვს განასინჯი, რაღაცას ხომ მიზამდა?! ცოტა ხნის წინ მოვხარშეთ და ყველას მოეწონა.
_ საკმაოდ ხშირად იწერება, რომ ქართული ჰიბრიდული ჯიშები უფრო მოსავლიანია.
_ სიმინდის ჰიბრიდი ყველა შემოტანილია. უბრალოდ, საქართველოშიც ხდება მისი გამოყვანა. არსებობს ორგანიზაცია “ლომთაგორა”, რომელიც აწარმოებს ჰიბრიდულ თესლებს. მათაც შეეძლოთ მიეღოთ ტენდერში მონაწილეობა და თუ გაიმარჯვებდნენ, მათგან წამოვიღებდით თესლს.
გამგებლის მოადგილე ჩაის კულტურასთან დაკავშირებულ ბოლოდროინდელ განცხადებებსაც გამოეხმაურა.
_ ბოლო ხანებში, საუბარია ჩაის აღორძინებაზე. ჩაის პლანტაციები იმდენად გაველურებულია, ბევრმა მის გაკულტურებაზე ხელიც ჩაიქნია…
_ კი, მიდის ასეთი საუბარი. ვნახოთ, რა იქნება. ამ დღეებში უკრაინაში მივდივარ, სადაც ქალაქ ნოვა-კახოვკაში ეკონომიკური ფორუმი გაიმართება. ჩვენს ჩაის იქ გამოფენაზე გავიტანთ. უკრაინული ბაზრის ათვისებაზე აქტიურად ვფიქრობთ. პირველ ეტაპზე ჩაის 100 ჰექტარზე ცოტა მეტი ფართობის გაკულტურებას ვგეგმავთ. ჩვენ ჩაის გადამამუშავებელი როლერი დავამზადეთ უკრაინელებთან ერთად. ის სოფელ ჩიბათში დგას და ძალიან კარგადაც მუშაობს, ხელით მოკრეფილ ჩაის ამუშავებს. სხვანაირად მოკრეფილი ჩაი როცა ჩაყარეს, არ გადაამუშავა. შესაბამისად უმაღლესი ხარისხის ჩაი მიიღება. კიდევ გვინდა 10 როლერის დამზადება, რომელსაც სხვადასხვა სოფლებში დავდგამთ. ერთი ჰექტარი პლანტაცია რომ გაიწმინდოს და ჩაის ბუჩქი მოსაკრეფად გამზადდეს, დაახლოებით, 2 000 ლარია საჭირო.
_ თუ ამ თანხას 100 ჰექტარზე გადავამრავლებთ, 200 000 ლარია საჭირო.
_ სოფლის მეურნეობის სამინისტრო საქმის კურსშია. სიმინდთან დაკავშირებით სახელმწიფო პროგრამა მუშაობს. იმედია, ჩაიზეც ამოქმედდება მსგავსი პროგრამა, რადგან დაინტერესება დიდია. ვფიქრობთ, ბანკებთან ურთიერთობაზეც, დონორების მოზიდვაზე. მთავარია საქმე ადგილიდან დაიძრას.
_ მამათში, ლესაში, ჩიბათში ალბათ, უფრო ადრე დაიწყება ჩაის გაკულტურება.
_ ამ სოფლებში არის პლანტაციები, რომლებზედაც შეიძლება ითქვას, ნახევრად მოვლილია. შესაბამისად, მათი გაკულტურება უფრო ადვილი იქნება. ჩემი აზრით, ჩაის კულტურის აღორძინებით კარგი საქმე გაკეთდება. გასაღების ბაზრის ძებნა ძნელი არ არის _ უკრაინა ჩვენი პროდუქციით დაინტერესებულია. ასევე, შეიძლება, სხვა ქვეყნების ვარიანტის განხილვა. ჩვენი, ქართული ბაზარი ავიღოთ, აქ, ვფიქრობ, რომ ძალიან მცირე პროცენტი გვაქვს ათვისებული. უცხოეთიდან შემოტანილ პროდუქტს ჩვენი ნამდვილად სჯობია, _ იმედიან ტონზე დაამთავრა საუბარი გიორგი ჭყონიამ.
