საკრებულოს სხდომაზე მყოფმა 27 დეპუტატმა მის კანდიდატურას ერთხმად დაუჭირა მხარი.
_ მე ვარ სახელმწიფო მოხელე, რომელიც აქამდე სულ წარმატებაზე იყო ორიენტირებული. ჩემი გაკეთებული საქმე ყოველთვის იყო აღიარებული, წარმოჩინებული, წარმატებული. მე ვამაყობ ჩემი საქმით, რაც აქამდე გავაკეთე და ვამაყობ ჩემი ოჯახით. ამ გადაწყვეტილების მიღებისას ყველაზე მნიშვნელოვანი იყო ჩემი მეუღლის და ჩემი ოჯახის მხარდაჭერა. ძალიან ხშირად, ჩემი კანდიდატურის მიმართ რიტორიკული შეკითხვები ისმოდა, რომელსაც ჩემზე უკეთ ვერავინ დასვამს და ვერც ვერავინ უპასუხებს. რატომ ოზურგეთელი ჩოხატაურში? ვფიქრობ, მსოფლიო გლობალიზაციის პირობებში, მერკანტილური დაყოფა ოზურგეთელებად, ჩოხატაურელებად, ბათუმელებად, თბილისელელად გადაჭარბებულია. თუმცა, მაინც უნდა ვთქვა _ 1998 წელს, 27 წლის ასაკში დავინიშნე გურიის სასკოლო ოლქის სამმართველოს უფროსად და 8 წლის განმავლობაში მქონდა სამსახურეობრივი და ადამიანური ურთიერთობები ჩოხატაურის განათლების სისტემის ყველა თანამშრომელთან. და არა მარტო სამსახურეობრივი, მეგობრულიც. ასე რომ, უცხო არ არის ჩემთვის ჩოხატაური. აქვე მინდა გითხრათ, რომ მე ფესვები ჩოხატაურიდან მაქვს _ დედაჩემი ჩოხატაურელია. თუ ჩემში რამე არის კაცთმოყვარეობის და გონიერების, ეს არის ჩოხატაურელი დედის და უაღრესად პატივსაცემი ადამიანის, მამაჩემის დამსახურება, _ აღნიშნა ლელა იმედაშვილმა საკრებულოს სხდომაზე.
მისივე თქმით, კითხვაზე რატომ ქალი, პასუხი მარტივია:
_ რატომაც არა, თუკი ამ ქალს, საქმის კეთება სხვაზე ნაკლებად არ შეუძლია, _ განმარტა ახალმა გამგებელმა.
ჩოხატაურის მუნიციპალიტეტის საკრებულოს თავმჯდომარის, ანტონ ხუნდაძის თქმით, მიზანი ერთია _ ჩოხატაურის მუნიციპალიტეტი წარმატებული გახდეს:
_ ჩვენ მიზანი გვაქვს ერთი _ მუნიციპალიტეტი განვითარდეს, და იყოს წარმატებული. მომავალში ბევრი საქმეა გასაკეთებელი და მას ერთი ადამიანი ვერ გააკეთებს. იმედი მაქვს, რომ ყველა ერთად ვიმუშავებთ, _ დასძინა ხუნდაძემ.
“გურია ნიუსთან” საუბრისას, საკრებულოს თავმჯდომარემ აღნიშნა, რომ ქალბატონთან მუშაობა არ გაუჭირდება და ინტერესთა კონფლიქტი არ მოხდება.
_ ბატონო ანტონ, ჩოხატაურის ისტორიაში, პირველად არის ქალი გამგებელი და ისიც ოზურგეთელი… ეს თქვენ უხერხულობას არ გიქმნით?
_ ერთი კვირის წინ, ჩოხატაურის მუნიციპალიტეტის გამგებელმა, გია გიორგაძემ გადადგომის შესახებ საკუთარი ინიციატივით დაწერა განცხადება. ადგილობრივი თვითმმართველობის შესახებ ორგანული კანონის თანახმად, საკრებულოს თავმჯდომარე ვალდებულია, საკრებულოს შესათანხმებლად წარუდგინოს გამგებლის კანდიდატურა. ჩვენ შევარჩიეთ ქალბატონი ლელა იმედაშვილი, რომელიც ძალიან განათლებული და გამოცდილი კადრია. ჩავთვალეთ, რომ ის იქნება ჩოხატაურისთვის წარმატებული გამგებელი. რაც შეეხება იმას, რომ იგი ქალბატონია _ საქართველოში ეს არის პირველი პრეცედენტი (რევოლუციის შემდეგ. ავტ), როდესაც მუნიციპალიტეტის ხელმძღვანელი ქალბატონია. რატომაც არა, ქალბატონმა შეიძლება წარმატებით იმუშაოს.
_ რამდენად მოსალოდნელია თქვენი ინტერესების გადაკვეთა? ლიდერი ქალი მამაკაცისთვის არასდროს არ არის სასიამოვნო…
_ პირიქით. ჩვენ დიდი ხნის ნაცნობობა გვაქვს. ვიცნობ მის წარმატებულ წარსულს და ერთობლივი მუშაობით _ საკრებულო და გამგეობა, ერთად გადავლახავთ იმ პრობლემებს რაც დღეს ჩოხატაურის სინამდვილეშია და იქნება ხვალ.
იმედაშვილს, გურიის გუბერნატორის მოადგილე, ლელა თავართქილაძეს ახლდა, თუმცა ის, საკრებულოს სხდომას არ დასწრებია. ახალ გამგებელთან დაკავშირებით კომენტარი, თავართქილაძემ, სხდომის დასრულების შემდეგ “გურია ნიუსთან” საუბრისას გააკეთა: _ მე ვიწონებ საკრებულოს გადაწყვეტილებას. ქალბატონი ლელა არის ძალიან კარგი კადრი, კვალიფიციური ქალბატონი, წარმატებული ქალი. სადაც მას უმუშავია ყოველთვის წარმატებები ჰქონდა და ვფიქრობ, რომ აქაც ასე იქნება.
_ ვისი კადრია ლელა იმედაშვილი?
_ არავის კადრი არ არის. მე არ ვიცი, რომ ვინმეს კადრი იყოს. ლელა იმედაშვილი არის პროფესიონალი ქალბატონი, ძალიან წარმატებული ჩინოვნიკი და საჯარო მოხელე, _ აღნიშნა გუბერნატორის მოადგილემ ჩვენთან საუბრისას.
ახალ გამგებელს, კაბინეტში ვარდები დაახვედრეს და წარმატებები უსურვეს. მასთან პირველი ინტერვიუ გამგებლის ამპლუაში, ექსკლუზიურად მის კაბინეტში ჩავწერეთ.
_ ქალბატონო ლელა, თქვენი შთაბეჭდილებებით დავიწყოთ…
_ ჯერ კიდევ ემოციების ქვეშ ვარ. ძალიან ბედნიერი ვარ იმის გამო, რომ ადამიანების უმრავლესობამ ერთხმად დამიჭირა მხარი. გარკვეულ ემოციებს მათ თვალებშიც ვგრძნობდი. იმედი მაქვს, რომ ყველაფერი კარგად იქნება. ყველაზე უფრო ახლა ერთგულება მჭირდება. ძალიან დიდი პასუხისმგებლობა მელოდება იმ სამსახურეობრივი ვალდებულებიდან გამომდინარე, რაც დღეიდან მაკისრია ჩოხატაურთან დაკავშირებით. ამიერიდან, ჩოხატაური იქნება ჩემი პირველი სახლი, პირველი საზრუნავი. მაქსიმუმს გავაკეთებ იმისთვის, რომ ყველაფერი იყოს გაცილებით კარგად.
_ თქვენს მიმართ ბევრი მოლოდინია. უპირველესად საკადრო ცვლილებებს ელოდებიან. რამდენად ხართ მზად ამისთვის?
_ კონკრეტულ გეგმებთან დაკავშირებით ახლა ნამდვილად გამიჭირდება საუბარი. მაგრამ, რა თქმა უნდა, ვფიქრობ, რომ ადამიანებს უნდა მიეცეთ შანსი. იმათ, ვინც ფიქრობს ჩოხატაურში დაბრუნებას ან უბრალოდ ჩოხატაურში ცხოვრობს და აქვს შესაბამისი კვალიფიკაცია. ამ ადამიანებს უნდა ჰქონდეთ განცდა, რომ მათი კვალიფიკაცია, შესაძლებლობები აუცილებლად იქნება ობიექტურად შეფასებული და იმ საჭიროებების მიხედვით იქნება გამოყენებული. ეს შეიძლება არ იყოს მხოლოდ საჯარო სამსახური. იმედი მაქვს, რომ ყველა გაგებით შეხვდება იმ გადაწყვეტილებებს, რაც უმოკლეს დროში იქნება მიღებული. იმედი მაქვს, რომ ადამიანები იმ რეჟიმს აეწყობიან, რომელსაც მე ვარ მიჩვეული _ ეს არის 48-საათიანი სამუშაო გრაფიკი და ყველა ამ პრინციპით იმუშავებს. ამას გპირდებით.
_ ესე იგი, ჩოხატაური საკადრო ცვლილებების მოლოდინში უნდა იყოს?
_ ასე ვთქვათ. კიდევ ერთხელ ვიტყვი _ ეს იმ გამოწვევის მიხედვით მოხდება, რაც საქმიდან გამომდინარე იქნება რეალური და საჭირო.
_ ჩოხატაურში ფიქრობენ, რომ როგორც ქალს, გაგიჭირდებათ მუნიციპალიტეტის მართვა…
_ მე არ ვფიქრობ, რომ გამიჭირდება, იმ შესაძლებლობების გათვალისწინებით, რაც მე მაქვს. თუმცა, ჩემ თავს გადაჭარბებულად ნამდვილად არ ვაფასებ. მაგრამ მე ვიცი ჩემი რეალური შესაძლებლობები და არ ვფიქრობ, რომ საქმე გამიჭირდება. მთავარია, მყავდეს ადამიანები, რომლებიც ამ საქმეში ფეხს ისე ამიწყობენ, როგორც ეს სასიკეთო ცვლილებებს დასჭირდება. რაც შეეხება ქალ-გამგებელს, მე საკრებულოს სხდომაზეც ვთქვი და ახლაც გავიმეორებ _ რატომ არ შეიძლება იყოს ქალი, თუკი ამ ქალს საქმის კეთება კარგად შეუძლია? ეს ჩემთვის ახალი გამოწვევაა, ძალიან საინტერესო სიახლეა. კონკრეტული გეგმების შესახებ ახლა რომ გითხრათ, ნამდვილად გამიჭირდება, მაგრამ ვფიქრობ, რომ მე, როგორც ქალი-გამგებელი, ჩემი შესაძლებლობების მაქსიმუმს გავაკეთებ, _ გვითხრა ჩოხატაურის მუნიციპალიტეტის ახალ დანიშნულმა გამგებელმა.
