ბოლო პერიოდში გურიაში საკადრო ცვლილებების ბუმია. როგორც ამბობენ, ეს გადანაცვლებები საარჩევნო პროცესებს უკავშირდება და ხელისუფლებამ მზადება დროულად დაიწყო. სამთავრობო სისტემაში ამ ინფორმაციას აბსურდულს უწოდებენ, მაგრამ ფაქტი ერთია _ კარუსელი მაინც ძველებურად ტრიალებს.
“რესპუბლიკური პარტიის” ერთ-ერთი ლიდერი, ტიფო მიქატაძე ამბობს, რომ ხელისუფლებაში მოსვლის დღიდან, “ნაციონალური მოძრაობა” მუდმივად ცდილობს თავისი პოზიციების შენარჩუნებასა და განმტკიცებას: _ ეს გახლავთ მათი აშკარად გამოხატული და ყველაზე დამახასიათებელი ნიშანი, რაც, თავისთავად, ცუდი არ არის პოლიტიკური პარტიისთვის, მაგრამ, საუბედუროდ, იგი ხშირად ეწინააღმდეგება სახელმწიფოებრივი და საზოგადოებრივი განვითარების ინტერესებს. დაკვირვებული თვალისთვის ადვილი შესამჩნევია, რომ საზოგადოებრივი ცხოვრების ყველა სფეროს მართვის პოლიტიკა სწორედ ამ ნიშნით არის გაჯერებული.
ეს პროცესი მუდმივად მიმდინარეობს _ “არჩევნები დამთავრდა, არჩევნები დაიწყო” _ სახელისუფლო პარტიისთვის მართლაც რომ სახელმძღვანელო და სასიცოცხლოდ აუცილებელი თეზისია. უბრალოდ, მორიგი არჩევნების წინ, მაშინ, როდესაც უნდა მოხდეს ძალადობრივი საარჩევნო მანქანის ეფექტური მუშაობის მორიგი დემონსტრირება, ეს პროცესი უფრო შიშვლდება და თვალსაჩინო ხდება. ამავე დროს, მიდის მეორე, თანმხვედრი პროცესი _ არ არის დაფარული, რომ ხელისუფლება სხვადასხვა ჯგუფებისგან შედგება, რაც ბუნებრივი მოვლენაა ამ ტიპის პოლიტიკური გაერთიანებებისთვის. მათ თავიანთი ინტერესები აქვთ, რომლებიც კონკრეტულ პოლიტიკურ მომენტში თანხვდებიან ან კონფლიქტში შედიან ერთმანეთთან, არჩევნების წინ განსაკუთრებულად მჟღავნდება მათ შორის დამოკიდებულება. რის სიგნალსაც, გარკვეულწილად, თანამდებობრივი ცვლილებები იძლევა _ ცვლილებებით შეგვიძლია, ვიმსჯელოთ სად, ვინ, ვის “აჯობა”, სად როგორ დაბალანსდა ინტერესები და ა.შ. _ თქვა ჩვენთან საუბრის ტიფო მიქატაძემ.
მისივე თქმით, გურიის რეგიონში აშკარაა იმ პოლიტიკური გუნდის გავლენების ზრდა, რომელიც “მოქალაქეთა კავშირის” მრავალწლიანი არსებობის პერიოდში ჩამოყალიბდა და გამოიწრთო: _ მათი დიდი ნაწილი “ვარდების რევოლუციის” შემოქმედთ _ სააკაშვილსა და მის პოლიტიკურ პარტნიორებს “პამიდვრებს ესროდნენ”. თუ როგორ და რატომ მოხდა ეს, ამაზე საუბარი შორს წაგვიყვანს.
ფაქტია, რომ მათ წლების განმავლობაში შექმნეს გადაწყვეტილების მიღებისა და მმართველობის მანკიერი, კორუმპირებული სისტემა, რომელიც მხოლოდ მათი პიროვნული და ჯგუფური ინტერესების განმტკიცებას ემსახურებოდა და შორს იყო საზოგადოებრივი განვითარების საჭიროებებისგან.
“პოლიტიკურ გუნდს” მათ შემთხვევით არ ვუწოდებ. ეს არის აშკარა პოლიტიკური ინტერესების მატარებელი გუნდი, რომელსაც რეალურად გამოკვეთილი პარტიულობა და იდეოლოგია არ გააჩნია. მათი პარტიულობა გამარჯვებული პოლიტიკური ძალის პარტიულობა ხდება _ გუშინდელი “მოქალაქეები”, დღეს “ნაციონალები” არიან და ხვალ სხვა პარტიულობას მოირგებენ. მათი იდეოლოგია კი პირადი კეთილდღეობის, პოლიტიკური და ეკონომიკური გავლენების მუდმივი შენარჩუნებაა. ეს გუნდი პოლიტიკის, ბიზნესის, არასამთავრობო სექტორის, მედიისა და სხვა სფეროს წარმომადგენლებს აერთიანებს და ფინანსებითა და პოლიტიკური გამოცდილებით სერიოზულ საარჩევნო რესურსს წარმოადგენს. ამით ის მიმზიდველი ხდება ნაციონალურ დონეზე გამარჯვებული იმ პოლიტიკური ძალისთვის, რომელსაც რეალური თვითმმართველობის დამკვიდრების ნაცვლად, სახელისუფლო ვერტიკალის განმტკიცება აინტერესებს და მათ შორის ინტერესთა ბალანსიც ადვილად მისაღწევია. ასე მოხდა “ნაციონალების” ხელისუფლებაში მოსვლის შემდეგაც. რეგიონში გადაწყვეტილებების მიღებისთვის ბრძოლა აშკარად დათმო ხელისუფლების იმ ჯგუფმა (მათ “გუნდს” ვერ ვუწოდებ), რომელიც რევოლუციის დროს პარტია _ “ნაციონალური მოძრაობის” წიაღში გაჩნდა. მიმდინარე ცვლილებებისას მათ საკვანძო ადგილებზე ვერ ვხვდებით _ ჯგუფის ლიდერები და ოდესღაც “კაშკაშა ვარსკვლავები” “ჩამოალაბორანტეს”. მათ არავინ არაფერს ეკითხება და საჯარო სამსახურის დროს კომპიუტერული თამაშებით კლავენ, ნაწილი _ მუნიციპალურ სამსახურებსა და ააიპ-ებში დაასაქმეს, ყველაზე პატივმოყვარე ეგზემპლარები კი ოპოზიციაში გადაბარგდნენ და იქედან ფიქრობენ რევანშის აღებას, _ გვითხრა რესპუბლიკელმა ტიფო მიქატაძემ.
“გურიის თავისუფალი დემოკრატების” საჯარო სამსახურების მონიტორინგის ჯგუფის ხელმძღვანელმა, გელა ბურჯანაძემ გურიაში ბოლო დროს მომხდარი საკადრო ცვლილებების შესახებ ასეთი კომენტარი გააკეთა: _ გამჭვირვალობა, მოსახლეობის წინაშე ანგარიშვალდებულება, საჯაროობა და სამოქალაქო მონაწილეობა ჴ ის პრინციპებია, რომლებითაც უნდა ხელმძღვანელობდეს თავის საქმიანობაში ადგილობრივი ხელისუფლება. ადგილობრივი ხელისუფლებისაგან, სწორედ ამ პრინციპების დაცვის მოთხოვნა იქნება ძირითადი ჩემი საქმიანობა “თავისუფალ დემოკრატებში.
“თავისუფალ დემოკრატებს მიგვაჩნია, რომ მეტი საჯაროობა და გამჭვირვალობა საშუალებას მისცემს საზოგადოებას შეუფერხებლად ჩაერთოს ადგილობრივი თვითმმართველობის მუშაობის პროცესში. აქედან გამომდინარე, ჩემთვის არავითარი მნიშვნელობა არ აქვს ადგილობრივი ხელისუფლების ე. წ. “კარუსელებსა” და “იწილო-ბიწილოს”. ჩვენ პიროვნულად არავის ვუპირისპირდებით და მიუხედავად იმისა, თუ ვინ რა თანამდებობაზე იქნება, მაინც კანონის შესაბამისად ჩავატარებთ მონიტორინგს ყველა საკითხზე, ყველა საჯარო სამსახურის თუ უწყების მუშაობაზე და გამოვიტანთ საზოგადოების წინაშე.
