(გურია ნიუსი, ლანჩხუთი) _ ლანჩხუთში უმაღლესი ლიგაში გადასასვლელად ემზადებიან. ამ ქალაქში ფეხბურთი რომ არ მოკვდება, თუნდაც იმ ფაქტიდან ჩანს, რომ სულ რაღაც ერთ თვეში, 12 ნოემბერს, “გურიის” ყველაზე დიდი ტრიუმფიდან (გუნდი სსრკ-ის უმაღლეს ლიგაში გადავიდა) 25 წლისთავს გრანდიოზულად აღნიშნავენ _ მოსაწვევები დარიგებულია და სტუმრებს არა მხოლოდ საქართველოს ქალაქებიდან ელოდებიან. სპეციალურად ამ დღისთვის მომზადდება ბუკლეტი, რომელიც კლუბის ისტორიულ მოვლენას ეძღვნება.
მხოლოდ იუბილის აღნიშვნა ლანჩხუთის ფეხბურთს ელიტაში ვერ დააბრუნებს _ საამისოდაც კარგი შემადგენლობაც შეკრიბეს წელს. “გურია” ამჟამად თავის ზონაში მეორე ადგილზეა და მისი შენარჩუნებაც საკმარისია იმისთვის, რომ მრავალწლიანი შესვენების შემდეგ, გურული კლუბი უმაღლეს ლიგაში აღმოჩნდეს. “გურიას” მესვეურებმა მთავარ მწვრთნელად გამოცდილი გიგლა იმნაძე მიიწვიეს, რომლის სახელთანაცაა დაკავშირებული კლუბის ყველაზე დიდი წარმატებები ეროვნულ ჩემპიონატებში _ პირველი თასი და 2 ვერცხლის მედალი ლანჩხუთელებმა სწორედ მაშინ ჯერ კიდევ დამწყები სპეციალისტის ხელმძღვანელობით მოიპოვეს. ამჟამად “გურიაში” რამდენიმე ისეთი ფეხბურთელი თამაშობს, რომლებსაც უმაღლეს ლიგაში უკვე უთამაშიათ. ჩატარებული თამაშების მიხედვით, მათგან გამორჩეულია იაგო დეისაძე, რომელსაც 7 ჩატარებულ შეხვედრაში 11 გოლი დაუგროვდა და აქედან 2-ჯერ პოკერი შეასრულა!
არადა, იაგო გასულ სეზონში სრულიად შემთხვევით აღმოჩნდა “გურიაში” _ იმ პერიოდში კლუბს დროებით გურიის ფეხბურთის ფედერაციის დღევანდელი თავკაცი კახა ებრალიძე ხელმძღვანელობდა და უნდა ითქვას, რომ წარმატებულადაც _ ზედიზედ 7 შეხვედრაში გაიმარჯვა მისმა გაწვრთნილმა გუნდმა. ტრავმებისა და კლუბიდან რამდენიმე ფეხბურთელის გაშვების გამო, შუა სეზონში მან გასინჯვის მიზნით მიიწვია ქუთაისელი მობურთალი და როგორც შემდგომში აღნიშნავდა, უვარჯიშებელი იაგო ყველას ჯობდა! მას შემდეგ დეისაძე კლუბის შეუცვლელი მოთამაშეა.
ჩვენ იაგო (გაგა) დეისაძეს რამდენიმე შეკითხვა დავუსვით:
_ იაგო, მოკლედ გვიამბე შენი კარიერის შესახებ.
_ ფეხბურთის თამაში 11 წლის ასაკში ქუთაისში დავიწყე როლანდ ცუცქირიძესთან, სადაც რამდენიმე წელი გავატარე. შემდეგ გადავედი თბილისის “ოლიმპში” ლევან გვანცელაძესთან. ამის შემდეგ, 17 წლისა, დავბრუნდი მშობლიურ ქუთაისში. “ტორპედო” მაშინ უმაღლეს ლიგაში იყო და დუბლშემადგენლობაში ჩავირიცხე. 19 წლისა უკვე უმაღლეს ლიგაში ვთამაშობდი _ 2 წელი თბილისის “მერანის” ღირსებას ვიცავდი, საიდანაც გადავედი ტყიბულის “მეშახტეში”, სადაც 3 თვე დავყავი.
_ უმაღლესი ლიგიდან ტყიბულში რატომ წახვედი?
_ შემოთავაზებები მქონდა, მაგრამ აქცენტს უცხოეთზე ვაკეთებდი. გაუგებრობა მოხდა და დროებით, უვარჯიშებელი რომ არ ვყოფილიყავი, ტყიბულში წავედი.
_ როგორც ვიცი, ცოტა ხანი თურქეთშიც თამაშობდი.
_ 6 თვე ვიყავი თურქეთის ქვედა ლიგაში მოასპარეზე “იზმინსპორში”. ამის შემდეგ მოვხვდი ლანჩხუთის “გურიაში”.
_ ამ სეზონში უკვე 11 გოლი დაგიგროვდა, აქედან, ორჯერ ,პოკერი შეასრულე. კარიერაში 4 გოლი ერთ შეხვედრაში ხშირად გაგიტანია?
_ არა, პოკერი არასდროს შემისრულებია. ერთ თამაშში, მაქსიმუმ, 3 გოლი მქონდა გატანილი. ასე რომ, ეს ჩემი პირველი პოკერებია. იმედია, კიდევ ბევრჯერ მოვახერხებ.
_ ყოველთვის წინა ხაზში თამაშობდი?
_ გამოკვეთილი თავდამსხმელი არ ვყოფილვარ და არც ახლა ვარ _ ჩემი ამპლუა შემტევი ნახევარმცველია.
_ როგორც ვიცი, წელს კლუბის მიზანი უმაღლეს ლიგაში გადასვლაა.
_ კი, ასეა და სხვანაირად არც შეიძლება იყოს! კარგი შემადგენლობა გვყავს. ისე, ვფიქრობ, რომ შარშანდელი ჩემპიონატი უფრო ძლიერი იყო, მაგრამ ახლაც რთული თამაშები გვაქვს. ნამდვილად გვყავს ისეთი შემადგენლობა, რომ უმაღლესში გადასვლის პრეტენზია გვქონდეს _ თითქმის 100 პროცენტიანი შანსები გვაქვს.
_ უმაღლეს ლიგაში ადგილის შენარჩუნება არ გაგიჭირდებათ?
_ არ მგონია. იქაც შევძლებთ ნორმალურად გამოსვლას, თუმცა, გაძლიერებაც გვინდა და მჯერა, ასეც იქნება.
_ რა შეიცვალა გასულს სეზონთან შედარებით კლუბში?
_ შემადგენლობითაც გავძლიერდით და ფინანსურადაც ნორმალური სიტუაციაა. მოკლედ, ისეთი ატმოსფეროა, რომ ფეხბურთელებს ისღა დაგვრჩენია, ქომაგებისა და კლუბის მესვეურების იმედები გავამართლოთ.
_ როგორც ვიცი, შენი ძმაც თამაშობს.
_ კი, ამჟამად ხონის “იმერეთში” ირიცხება.
_ დასასრულ, ისიც გვითხარი, რომელი ქვეყნის ფეხბურთის ქომაგი ხარ და შენი ოცნების კლუბი რომელია?
_ საფრანგეთის ნაკრებსა და მადრიდის “რეალს” ვქომაგობ.
