მეცენატისა და ბიზნესმენის, ბიძინა ივანიშვილის განცხადებამ, რომ იგი ახალ პარტიას ქმნის დიდი ვნებათაღელვა გამოიწვია. “გურია ნიუსი” დაინტერესდა, თუ რას ფიქრობენ გურული პოლიტიკოსები და მოქალაქეები ივანიშვილის გადაწყვეტილების შესახებ.
_ ივანიშვილის გადაწყვეტილების მიმართ, საერთო ჯამში, პოზიტიური დამოკიდებულება მაქვს, მაგრამ ამავე დროს მაინტერესებს რომელ პოლიტიკურ ძალას დაიყენებს გვერდით, რადგან მე მსურს თავისუფლად მოაზროვნე ქართველების საქართველო, სადაც თითოეული ადამიანი ყოველგვარი ზეწოლის გარეშე მიიღებს გადაწყვეტილებას. არც შიში უნდა არსებობდეს და არც _ მოსყიდვა. მე ივანიშვილის გონიერების მჯერა და ვფიქრობ, რომ ის ქართული სახელმწიფოსთვის სასარგებლო საქმიანობას გააგრძელებს და გააძლიერებს მას. ჩვენთვის ისიც მნიშვნელოვანია, რომ ამ განცხადებამ ჩვენს ხელისუფლებას სილა გააწნა და იქნებ, ჩვენმა პრეზიდენტმა და მისმა ხელისუფლებამ ცოტათი შეარბილოს გათავხედებული ბავშვის თავნებობით და გაჯიუტებით რაღაცის აჩემება, რომელიც ჩვენს ქვეყანას არაფერში არგია, _ აღნიშნავს “გურია ნიუსთან” საუბარში მოქალაქე მ. ჩხარტიშვილი.
პოლიტიკური მოძრაობა ეროვნული ფორუმის ოზურგეთის რაიონული ორგანიზაციის თავმჯდომარე შოთა გოგიბერიძე მიიჩნევს, რომ აღნიშნულმა განცხადებამ ქართული პოლიტიკური ცის კაბადონზე ქუხილის ეფექტი იქონია.
_ ჩვენი თანამემამულეები უნდა დაფიქრდნენ და პასუხი გასცენ კითხვას _ აქვთ თუ არა მიზეზი, ეჭვი შეიტანონ ამ პიროვნების გულწრფელობაში. ის ძალზე წარმატებული ბიზნესმენი და ხელგაშლილი მეცენატია. საყოველთაოდაა ცნობილი მისი ქველმოქმედების შესახებ.
ფაქტია, რომ აღნიშნულმა განცხადებამ ქართული პოლიტიკური ცის კაბადონზე ქუხილის ეფექტი იქონია. ბუნებრივია, ხელისუფლების გაღიზიანება, რომელსაც გაუჩნდება რეალური ალტერნატივა (რასაც ვერ მიაღწია ვერც ერთმა ოპოზიციურმა გაერთიანებამ); ასევე გასაგებია ზოგიერთი ოპოზიციური პარტიის დამოკიდებულებაც, რადგან იკვეთება შანსი ქვეყანაში პოლიტიკური კონფიგურაციის გადათამაშებისა და რეალური პოლიტიკური ბალანსის მიღწევისა. თუმცა, გასათვალისწინებელია ერთი უმნიშვნელოვანესი ფაქტორი _ რომელ პოლიტიკურ ფიგურებზე, პიროვნებებზე გააკეთებს აქცენტს ბიძინა ივანიშვილი თავისი პოლიტიკური ცხოვრების საწყის ეტაპზე, ვის დაიყენებს გვერდით და ვინ იქნებიან მისი გუნდის წევრები _ ადამიანები, რომლებმაც საფუძველი უნდა ჩაუყარონ პოლიტიკურ პარტიას ან მოძრაობას. მხოლოდ ამის შემდეგ გახდება შესაძლებელი სრულყოფილი პოლიტიკური შეფასებებისა და პროგნოზების გაკეთება.
საქართველოს რესპუბლიკური პარტიის გურიის რეგიონული ორგანიზაციის საბჭოს თავმჯდომარე, ტიფო მიქატაძე “გურია ნიუსთან” საუბარში აღნიშნავს, რომ პოლიტიკურ მოედანზე სერიოზული და იმედისმომცემი ფალავანი გამოჩნდა.
_ ბოლო დროს, ჩვენი საზოგადოება ჰგავს მოძალადე დიდი ბიჭისაგან წესების გარეშე გალახულ, დაჩაგრულ მეორე თანატოლ ბიჭს, რომელსაც ანგარიშსწორებისა და ღირსების დაბრუნების სურვილი გულში აქვს ჩაკლული. “დიდი ბიჭი” ნაციონალური მოძრაობაა და მისი “ფალავანი” კი _ სააკაშვილი.
როგორ გგონიათ, როდის გათამამდება შეშინებული “პატარა ბიჭი” და შეეცდება “ხელის შემობრუნებას?!” ალბათ, მაშინ, როცა გვერდით, თავის უფროს ძმას ან ძლიერ მეგობარს დაიგულებს და იფიქრებს, რომ იგი “დიდ ბიჭს” გაალახვინებს. ასეთი მომენტი ერთხელ ჰქონდა ჩვენს საზოგადოებას მაშინ, როდესაც მან დაიჯერა, რომ საპრეზიდენტო არჩევნებისას “გაერთიანებული ოპოზიციისა” და მისი კანდიდატის, ლევან გაჩეჩილაძის სახით გამოუჩნდა მხარდამჭერი ფალავანი _ იაქტიურა, არჩევნებზეც მოვიდა და შედეგსაც მიაღწია, მაგრამ, სამწუხაროდ, მსაჯმა (ცენტრალურმა საარჩევნო კომისიამ) სააკაშვილის დამარცხება არ აღიარა.
მეორე საკითხია, რომ ფალავნის (ხელისუფლების საპირწონე, ალტერნატიული პოლიტიკური ცენტრი ძლიერი ლიდერით) არსებობის გარდა, აუცილებელია საზოგადოებაში განცდა იმისა, რომ პაექრობა შესაძლებლობის ფარგლებში, წესების დაცვითა და თანაბარ პირობებში წარიმართება, შედეგებს ჩაუთვლიან და მოგებულს არ წაართმევენ.
…და მესამედ, იმ შემთხვევაში, როცა “დიდ ბიჭს” დასუსტებასა და დაუძლურებას შეამჩნევს.
თუკი ეს სამი მომენტი დროსა და სივრცეში ერთმანეთს დაემთხვევა, მაშინ “პატარა ბიჭის” ოცნებებიც ახდება.
ანალიზი ბოლო, მესამე მომენტიდან რომ დავიწყოთ, “ნაციონალურ მოძრაობას” დასუსტების ჯერ არაფერი ეტყობა. მართალია, სახელისუფლებო გუნდში შიდა დაპირისპირებები არსებობს და მათ მიმართ ქვეყნის გარედანაც კრიტიკული განწყობები დღითიდღე უფრო იზრდება, მაგრამ, ჯერჯერობით, “ხელის შემობრუნებისათვის” არახელსაყრელი პირობებია.
რჩება ისევ იმედის მომცემი ფალავნისა და საპაექრო გარემოს გაუმჯობესებაზე ფიქრი და მუშაობა. ასეთი მცდელობები, ბოლო დროს, ნამდვილად იყო, ჯერ ადგილობრივი არჩევნების წინ, “ალიანსის”, შემდეგ კი “რვიანისა” და “ექვსიანის” შექმნის სახით, თუმცა, ხელისუფლების მეცადინეობით და სხვა მიზეზების გამო, ისინი დაიშალნენ. ამიტომ დღეის მდგომარეობით, ქართული საზოგადოება განწირული იყო იმისთვის, რომ 2012 წლის საპარლამენტო არჩევნების შემდეგ, ნაციონალური მოძრაობა საკონსტიტუციო უმრავლესობით დარჩებოდა ხელისუფლებაში.
ბიძინა ივანიშვილის განცხადება, რომ ის პოლიტიკაში მოდის და ჯანსაღ პოლიტიკურ ძალებთან ერთად აპირებს არჩევნებში გამარჯვებას, რადიკალურად ცვლის ზემოხსენებულ პოლიტიკურ სურათს.
პირველი პოლიტიკური, სამესიჯო განცხადება უაღრესად საინტერესოა და მნიშვნელოვან მომენტებსაც შეიცავს. მასზე საუბარი ამჟამად ჩვენი განხილვის თემა არ არის. მივესალმები, რომ ეს განცხადება თქვენს გაზეთშიც გამოქვეყნდა და ყველას ვურჩევ ყურადღებით გაეცნოს მას.
ფალავანი გამოჩნდა, _ ფალავანი სერიოზული სასტარტო, არა მარტო ფინანსური რესურსებით. გაჩნდა (ჯერჯერობით) ფარული იმედი და ბრძოლის ჟინი, რომელსაც ასევე ფარული შიშებიც ახლავს თან. ამჟამად მთავარია, როგორ პოლიტიკურ გუნდს შეკრებს, რა პოლიტიკურ პროგრამას შემოგვთავაზებს და რა პოლიტიკურ ტექნოლოგიებს გამოიყენებს არჩევნებამდე დარჩენილი ერთი წლის განმავლობაში. ვნახოთ, დრო გვიჩვენებს.
ფაქტია, რომ განცხადებამ უკვე გამოიწვია ხელისუფლებისა და მის ველზე მოძრავი “ოპოზიციური” პარტიების (რომელსაც ივანიშვილი “ფსევდო ოპოზიციას” უწოდებს) აშკარა გაღიზიანება. ეს შეუიარაღებელი თვალითაც ჩანს და სასიკეთო სიგნალია, _ ამბობს მიქატაძე.
