როგორც ჩვენმა წყარომ გვითხრა, გამოძიება მისი პოლიციის უფროსობის დროინდელი საქმით დაინტერესდა _ საქმე ეხება ბიზნესმენ კოკი ცეცხლაძის კუთვნილ ჩაის ფაბრიკა “გეოპლანტში” მომხდარ ქურდობას, რომელზეც საქმე არ აღძრულა. როგორც მოვიკვლიეთ, ფაბრიკის მშენებლობის პროცესში, ჯართი დაიკარგა და ფაბრიკის იმდროინდელმა ხელმძღვანელობამ დახმარება პოლიციას სთხოვა, რომელიც მიმდებარე ტერიტორიაზე რამდენიმე დღის განმავლობაში პატრულირებდა, თუმცა, დამნაშავეები ვერ იპოვეს. მას შემდეგ დიდი დრო გავიდა და სამი წლის წინ მომხდარი წვრილმანი ქურდობის გამო, ურიდიას პროკურატურაში დაბარებამ ბევრი კითხვა გააჩინა.
გია ურიდია გურიის ხელისუფლებისთვის მისაღები კადრი არასდროს ყოფილა. იყო შემთხვევა, როდესაც მან ადგილობრივი ჩინოვნიკების ახლობლები დააკავა და მათზე საქმეც აღძრა, თუმცა, ამ საქმეებს გაგრძელება არ მოჰყოლია. როგორც წყარო ამბობს, ურიდიას სწორედ ხელისუფლებასთან დაპირისპირება არ აპატიეს და მიუხედავად მის მიმართ შსს-ს მაღალჩინოსნების დიდი სიმპათიისა, თანამდებობიდან მაინც გაათავისუფლეს. ურიდია სამსახურიდან გიგა ჯაფარიძემ მოხსნა და ამის შესახებ მედიასთან კომენტარები არავის გაუკეთებია. თუმცა, არაოფიციალური ინფორმაციით, გათავისუფლების მიზეზად, საკუთარ სოფელში, ლეგალიზაციის კომისიის მიერ დაკანონებული მიწა დაუსახელეს _ მიწა, ჩოხატაურში, სოფელ ქვენობაში, გია ურიდიას სახელზე იყო გაფორმებული და ჩოხატაურის მუნიციპალიტეტის საკრებულოს ლეგალიზაციის კომისიას, შოთა სირაძის ხელმძღვანელობით, მასზე საკუთრების მოწმობა ჰქონდა გაცემული. მოკვლეული მასალებით დადასტურდა, რომ ურიდიას ყველა იურიდიული პროცედურა ჰქონდა გავლილი, საკითხი უშუალოდ კომისიაზე იყო გასული და გამოძიებამაც ვერანაირი “ჩეპე” ვერ იპოვა, თუმცა, მიუხედავად ამისა, მიწა მაინც ჩააბარებინეს და სამსახურიდანაც გაუშვეს.
გათავისუფლების შემდეგ ურიდია გურიიდან საერთოდ წავიდა და სამსახური დედაქალაქში, ერთ-ერთ კერძო კომპანიაში დაიწყო.
როგორც ზემოთ აღვნიშნეთ, უცნობია, რატომ გაახსენდათ მაინცდამაინც ახლა 3 წლის წინ მომხდარი გაუხსნელი წვრილმანი დანაშაული. როგორც ჩვენი წყარო ამბობს, ეს საქმე ბიძინა ივანიშვილის პოლიტიკურ გააქტიურებას უკავშირდება.
საქმე იმაშია, რომ ურიდია ოზურგეთის პოლიციის უფროსობამდე ურეკის მთავარი პოლიცმეისტერი იყო და ახლო, შეიძლება ითქვას, მეგობრული ურთიერთობა ჰქონდა ბიზნესმენის ძმასთან, ადიკო ივანიშვილთან. ეს ის პერიოდია, როცა ბიძინა ივანიშვილი “რუსი ბიზნესმენი” არ იყო და ხელისუფლებას მასთან საკმაოდ კარგი დამოკიდებულება ჰქონდა. ჩვენი წყაროს ცნობით, ეს მეგობრული ურთიერთობა ურიდიას სამსახურიდან გაშვების შემდეგაც გაგრძელდა. წყარო ამბობს, რომ რამდენიმე კვირის წინ, ადიკო ივანიშვილი და გია ურიდია სანადიროდ იყვნენ ერთად. წყარო ამტკიცებს, რომ ურიდია ივანიშვილის გუნდში მოხვდება და თანამდებობიდან უსამართლოდ გაშვების გამო შურს იძიებს, რადგან დაუდასტურებელი ინფორმაციით, ოზურგეთის პოლიციის ყოფილ უფროს, გურიის მოქმედ ხელისუფლებაზე საკმაოდ ბევრი კომპრომატი აქვს.
გია ურიდია “გურია ნიუსთან” საუბრისას ამბობს, რომ დაკავებული არ ყოფილა და პროკურატურაში დაახლოებით ნახევარი საათი საკითხის გასარკვევად დაჰყო, თუმცა, რა საკითხზე ესაუბრნენ მას სამართალდამცველები, არ აკონკრეტებს. ურიდია ადიკო ივანიშვილთან ურთიერთობასაც უარყოფს და ამბობს, რომ პოლიტიკაში მოსვლას არ აპირებს:
_ არ ვიცი, ვინ და საიდან გაავრცელა ეს ხმები. არანაირი შეხება არ მაქვს ბიძინა ივანიშვილთან, არც მის ოჯახთან და არც მომავალში მექნება, _ გვითხრა ურიდიამ.
თავის მხრივ, ურიდიასთან ურთიერთობას უარყოფს ადიკო ივანიშვილიც:
_ ბატონო ადიკო, როგორც გვითხრეს, ურიდია ცოტა ხნის წინ პროკურატურაში დაიბარეს და მას შეკითხვები თქვენთან ურთიერთობის შესახებაც დაუსვეს. ამბობენ, რომ ეს ურთიერთობა, შეიძლება, მას საკმაოდ ძვირად დაუჯდეს…
_ ურიდიას არ ვიცნობ და არც მაგ საქმის ვიცი რამე, _ გვითხრა ადიკო ივანიშვილმა.
მიუხედავად იმისა, რომ ახლო მეგობრობას უარყოფენ, არსებობენ ადამიანები, რომლებიც ადასტურებენ, რომ ადიკო ივანიშვილს და გია ურიდიას საკმაოდ კარგი ურთიერთობა აქვთ. როგორც ჩვენი წყარო ამბობს, ამ ურთიერთობის ამსახველი ფოტოები სამართალდაცველებსაც აქვთ და არ გამორიცხავენ, რომ მალე ურიდია დააპატიმრონ. საკმაოდ სარწმუნო წყაროს ცნობით, არ არის გამორიცხული რამდენიმე დღეში ურიდია საქართველოდან საერთოდ წავიდეს, თუმცა, ოზურგეთის პოლიციის ყოფილი უფროსი ჩვენთან საუბრისას ამბობს, რომ არსად წასვლას არ აპირებს.
აღსანიშნავია, რომ ხელისუფლებამ ივანიშვილის მხარდამჭერების და შესაძლო მხარდამჭერების დაკავება სხვადასხვა მიზეზით უკვე დაიწყო. მიმდინარე კვირაში ბერა ივანიშვილის მეგობარი, ლევან მდინარაძეც დააკავეს, რომელიც “ქართული ოცნების” მაისურებს არიგებდა, თუმცა, მისი დაკავების რეალურ მიზეზად “მარიხუანას” აღმოჩენა დასახელდა. შესაბამისად ინფორმაცია, რომ ურიდია ივანიშვილებთან ახლობლობის გამო შეიძლება ციხეში მოხვდეს, საფუძველს მოკლებული არ უნდა იყოს.
