“ქართველმა მეცენატმა სრულიად მოულოდნელად ეფექტური ნაბიჯი გადადგა და პირდაპირ ოპოზიციურ პოლიტიკაში გადახტა”, _ ასე აფასებს ივანიშვილის მოქმედებას პოლიტიკური ექსპერტი პაატა ზაქარეიშვილი, რომელმაც, ბევრი მითების მოსმენის შემდეგ, პირადად გაიცნო ივანიშვილი.
დღეს ბატონი პაატა “გურია ნიუსის” სტუმარია.
_ ბატონო პაატა, რა ხდება ქართულ პოლიტიკაში?
_ ხდება ის, რომ საზოგადოებაში ჯერ კიდევ არის ენერგია, რომ გაუმკლავდეს იმ ავტორიტარულ მმართველობას, რომელსაც თავს გვახვევს ხელისუფლება.
_ რამ განაპირობა ივანიშვილის პოლიტიკაში გამოჩენა?
_ მიმდინარე მოვლენების შესახებ მას მკაფიოდ ჩამოყალიბებული პოზიცია აქვს _ 9 წელი ცხოვრობდა საქართველოში, მხოლოდ ორჯერ იყო საფრანგეთში; თქვა, რომ 8 წელი არ ყოფილა რუსეთში. ის აკვირდებოდა ყველაფერს, კარგად არის ინფორმირებული. საბოლოოდ, გადაწყვიტა, რომ ჩრდილიდან გამოსულიყო.
_ ირაკლი ალასანიას შემდეგ, ბიძინა ივანიშვილს თქვენთან და დავით ბერძენიშვილთან ჰქონდა შეხვედრა.
_ მე მას მანამდე არ ვიცნობდი. დღის 2 საათზე გავიგე, რომ 5 საათისთვის დანიშნული იყო მასთან შეხვედრა.
_ რა საკითხებზე ისაუბრეთ?
_ ეს იყო გაცნობითი შეხვედრა. ვცდილობდით მოგვეძებნა ის თემები, რომლებიც გვაერთიანებს. ბატონმა ბიძინამ ისაუბრა ქვეყანაში არსებულ ვითარებაზე, მოჰყვა საკუთარი ისტორია, გაგვაცნო თავისი ხედვები, შეაფასა ხელისუფლების მინუსები და პლიუსები. _ დამისვით კითხვა, რომელზეც გსურთ პასუხის მოსმენა. მზად ვარ, ვისაუბრო ნებისმიერ თემაზე გახსნილად, _ გვითხრა მან. მის ხასიათში არ ჩანს ჩაკეტილობა და საინტერესო იყო მისი მოსმენა.
_ მან პერსონალურად შეარჩია პოლიტიკოსები?
_ არა, მან შეარჩია ის ოპოზიციური ძალები, რომლებიც დემოკრატიულ და სამოქალაქო ღირებულებებზე არიან ორიენტირებულები. როცა ის გამოჩნდა პოლიტიკაში, მე ივანიშვილზე კრიტიკული სტატიები დავწერე. მას პირადად უნდოდა ჩემი გაცნობა და თანამშრომლობა.
_ მის მიმართ კრიტიკული პოზიცია შეგეცვალათ თუ არა?
_ ასე უცებ ვერ შეგეცვლება პოზიცია. მე დავინახე გულახდილი ადამიანი, რომელიც ცდილობს, დაგანახოს სხვა ივანიშვილი, ის, რომელსაც შენ არ იცნობ. ის დაინტერესებულია მის შესახებ ინფორმაციები სწორად იყოს წარმოჩენილი, თუნდაც, ექსპერტის დონეზე. დავრწმუნდი, რომ იგი მართლაც პატრიოტია და უყვარს სამშობლო. ნანობს, რომ მისი ჩართულობა ქვეყნის სამსახურში კონტრპროდუქტიული გამოდგა. ის ფულს დებდა ქვეყანაში და აღმოჩნდა, რომ ნაციონალურ მოძრაობაში დებდა თანხებს.
_ ბატონო პაატა, ივანიშვილმა რატომ შეარჩია თქვენი პოლიტიკური პარტია?
_ მან თქვა, რომ ჩვენ ვართ პრინციპულები, ამიტომ მოვწონვართ და სურს ჩვენთან ღირსეული თანამშრომლობა.
_ თქვა, რომ არ ითანამშრომლებს “ქრისტიან-დემოკრატებთან”, “ახლებთან”, კიდევ სხვა პარტიებთან. ეს დაძაბულობას ხომ არ გამოიწვევს ოპოზიციურ სპექტრში?
_ დაიშალა ალიანსი, შემდეგ რვიანი, ექვსიანი, ოპოზიცია ვერ პოულობს ერთობის რესურსს. ამაში ტრაგიკული არაფერი არ არის.
_ მათ მიიღეს ხელისუფლების თამაშის წესები?
_ ჩემი აზრით, დიახ. არანაირი ტრაგედია არ არის იმაში, თუ ვინმე რომელიმე ოპოზიციურ პარტიას აფასებს უარყოფითად, რესპუბლიკელებსაც ბევრჯერ მოგვისმენია კრიტიკა. მთავარია, ამომრჩეველს ჰქონდეს მკაფიოდ ჩამოყალიბებული პოზიცია, თუ რატომ არ უნდა მისცეს ხმა ამა თუ იმ პოლიტიკურ ძალას.
_ შესაძლებელია თუ არა, რომ ხელისუფლებამ დანიშნოს ვადამდელი საპარლამენტო არჩევნები?
_ თუ ეს ვინმეს “აწყობს” , ყველაზე მეტად ხელისუფლებას, რადგან რაც უფრო დაასწრებენ მოვლენებს, უფრო მეტს მოიგებენ _ ისინი ჯერ კიდევ აკონტროლებენ ვითარებას. ამ არეულობის გმირი არა ივანიშვილი, არამედ ხელისუფლებაა _ ისინი ისტერიკაში ჩავარდნენ. ამ დროს იგნორირება უნდა მოეხდინათ. მათ ქცევაში გამოჩნდა, რომ ყოველი გაფაჩუნების ეშინიათ და არც ისე უძლეველები არიან. ამიტომ მათ აწყობთ ვადამდელი საპარლამენტო არჩევნები. ახლა ამაში ვიღაცამ უნდა შეუწყოს ხელი, ეს კი “კარის” ოპოზიცია იქნება.
_ ივანიშვილი კრიტიკული იყო მედიის მისამართით.
_ ჩვენ ამ თემებს არ შევხებივართ. მომავალში მოგვიწევს საუბარი. ჟურნალისტებთან ბრძოლას არ აქვს აზრი _ ვინც მედიას ებრძვის, ის ყოველთვის მარცხდება.
_ გქონდათ თუ არა ივანიშვილთან საუბარი რუსეთის შესახებ?
_ დღეს რუსეთის მოქმედება ყოვლად მიუღებელი და ამორალურია. საჭიროა, დისტანცირება და არ უნდა მივცეთ საშუალება, ჩაერიოს ჩვენი ქვეყნის საშინაო საქმეებში. თუმცა, ივანიშვილმა თქვა, რომ აუცილებელია რუსეთთან ურთიერთობის დალაგება და ჩვენ ამას მივესალმებით.
