მძღოლებისა და ფეხით მოსიარულეების განცხადებით, ოზურგეთში, სამარშრუტო მიკროავტობუსების მოძრაობასთან დაკავშირებით, კვლავ წარმოიშვა პრობლემა, როგორც ამბობენ, მარად ძველი და მაინც _ მარად ახალი.
ნოემბრის დასაწყისში, სხვადასხვა სადგომიდან გამავალ ყველა სოფლის ავტობუსის მძღოლს, გამგეობის მუნიციპალიტეტის სამსახურმა მიუთითა, რომ დროულად დადგეს მინიშნებულ ავტოსადგურში და იქედან მოახდინოს გასვლა დადგენილი გრაფიკის შესაბამისად. თუ მძღოლებსა და მგზავრებს დავუჯერებთ, ეს პრობლემას შეუქმნის მათ, განსაკუთრებით სოფლების მცხოვრებთ, რომლებსაც, როგორც თავად ამბობენ, მძიმე ტვირთის ზიდვა უჭირთ და შედარებით შორ მანძილზე გადატანა არ შეუძლიათ. ამიტომ სურთ, სადგომები დღემდე არსებულ ტერიტორიაზე დარჩეს.
მძღოლები ამბობენ, რომ სანაპიროზე მდებარე დიდი ავტოსადგური ძალზე მიუდგომელი ადგილია და იქამდე 1 კილომეტრი მანძილის გავლა უწევს გლეხს, რომელიც ოზურგეთში სავაჭროდ თუ სხვადასხვა სამეურნეო საქმისთვის ჩამოდის.
“გურია ნიუსი” ოზურგეთის მუნიციპალიტეტის ზედამხედველობის სამსახურს ეწვია, სადაც აღნიშნული საკითხის შესახებ გაიკვირვეს _ ეს პრობლემის შექმნაა თუ მოგვარებაო?
ზედამხედველობის სამსახურის უფროსის შალვა გაბრიჩიძის ინფორმაციით, “ოზურგეთის მუნიციპალიტეტის საკრებულომ გამოსცა განკარგულება, რადგან ქალაქის ტერიტორიაზე, საზოგადოებრივი თავშეყრის ადგილებზე, სპონტანურად ჩამოყალიბდა სადგომები, სადაც ხორციელდება ავტობუსებით მგზავრთა მომსახურება. ეს კი ხელს უშლის სხვა სატრანსპორტო საშუალებებისა და ფეხით მოსიარულეთა ნორმალურ მოძრაობასა და გადაადგილებას. ამიტომაც შემუშავდა ავტობუსით მოსახლეობისთვის მომსახურების წესი; დამტკიცდა ადგილობრივ მარშრუტებზე საზოგადოებრივი ტრანსპორტის გაჩერებისა და გადაადგილების სქემები, ასევე, მუნიციპალიტეტის ტერიტორიაზე საზოგადოებრივი ტრანსპორტის სადგომების ექსპლოატაციის წესი”.
_ ბატონო შალვა, რა მითითება მიეცით მძღოლებს, რამაც მათი და მგზავრთა უკმაყოფილება გამოიწვია?
_ ავტოსატრანსპორტო საწარმოების ხელმძღვანელებს, ყველა ავტობუსისა და მიკროავტობუსის მძღოლს, რომლებიც აღრიცხულნი არიან ავტოსაწარმოებში, მითითება მივეცით, თუ თითოეული სოფლის ავტობუსი რომელი სადგომიდან ივლის.
_ რომელია ეს ავტოსადგომები?
_ ეს არის დიდი ავტოსადგური სანაპიროს ქუჩაზე და პატარა ავტოსადგური აღმაშენებლის ქუჩის დასაწყისში.
_ ხალხს იქამდე მისვლა ძალიან ეძნელება და ამბობენ, პრობლემებს ძალით გვიქმნიანო.
_ პრობლემას ვაგვარებთ და ეს არის პრობლემის შექმნა? ყველა კუთხეში რომ სადგომია, ეს არის წესრიგი? ქალაქის ცენტრი უნდა მოწესრიგდეს. სადგურიდან გამოსული ავტობუსი განსაზღვრულ ადგილებზეც შეჩერდება.
_ სად იქნება ეს განსაზღვრული ადგილები?
_ ავტოსადგურიდან გამოსული ავტობუსი, ქალაქში კიდევ ორ განსაზღვრულ ადგილზე გაჩერდება. იქ, სადაც ძირითადად ადრე იყრიდნენ თავს შესაბამისი სოფლების მგზავრები. შეჩერება მოხდება რამდენიმე წუთით, რა დროც დასჭირდება ავტობუსში ასვლას. ხანგრძლივი ლოდინი და გაჩერება, რა თქმა უნდა, აქ აღარ შეიძლება.
_ როგორ მიხვდეს მგზავრი, სად გაჩერდეს? საგზაო ნიშნებს დააყენებთ?
_ უკვე ყველგან არის დამონტაჟებული ავტოსაგზაო ნიშნები. ამ დღეებში ყვითელი ფერის საღებავით ასფალტზეც დაიხატება სპეციალური საგზაო ფიგურა, რომელიც მიანიშნებს მგზავრს, სად უნდა გაჩერდეს.
_ იქ რომ სხვა მანქანები გაჩერდნენ?
_ მკვეთრად გამორჩეული ფერით არის აღნიშნული მგზავრთა თავშეყრის ადგილები. ეს მძღოლებისთვის ცნობილია და წესრიგი დაცული იქნება.
_ როდის დამთავრდება და დაიწყება სადგომების მოწესრიგება და ავტობუსების ავტოსადგომებიდან გასვლა?
_ უამინდობამ შეგვიშალა ხელი, თორემ სამუშაო დასრულებული იქნებოდა. ყველაფერი მზადაა. ახლა დავხაზავთ ავტობუსების და სამარშრუტო ტაქსების შეჩერების ადგილს, რის შემდეგაც ადამიანებს ძალიან კარგი სამგზავრო გარემო შეექმნებათ. არაფრის გამო ნერვიულობენ, სადაც იკრიბებოდნენ, იქ კვლავ შეჩერდება მათი ავტობუსი. ავტობუსის ძირითადი სადგომი ავტოსადგური იქნება და არა ნებისმიერი კუთხე ქალაქში, რაც თითოეულ ჩვენგანს, გადაადგილებისას, მხოლოდ აბრკოლებს.
