“გურია ნიუსმა” ქუჩაში შემთხვევით შეხვედრილ ადამიანებს ერთი კითხვა დაუსვა; “ბიძინა ივანიშვილთან შეხვედრის შესაძლებლობა რომ გქონდეთ, რა შეკითხვას დაუსვამდით?”
ლადო, 64 წლის: _ რატომ იყო გასაიდუმლებული მისი ქველმოქმედება?
გოგი, 56 წლის: _ კაცმა რომელმაც განაცხადა, რომ ომი ჩვენ დავიწყეთო, იმას არაფერს არ შევეკითხებოდი, მიუხედავად უამრავი გაკეთებული სიკეთისა
ელენე, 38 წლის: _ ვკითხავდი, იმ ქვეყანაში, სადაც ამდენი უმადური ცხოვრობს, თვითონ როგორ იცხოვრებდა?
ტარიელი, 71 წლის: _ სად იყო აქამდე?
ნათელა, 62 წლის: _ ყველაფრისკენ რომ გეიხედა ამ კაცმა, ჯანმრთელობაზე რეიზა არაფერი არ თქვა, რომ ვიხოცებით ხალხი ექიმთან მიუსვლელად?
მაიკო, 23 წლის: _ ამბობენ, კარგი კაციაო. ახალგაზრდებისთვის რას გააკეთებდა?
თამაზი, 60 წლის: _ რატომ დგას ჩრდილში, როცა მილიონობით თანხა აქვს გაღებული ჩვენს საკეთილდღეოდ?
თამარი, 45 წლის: _ ჩვენი მთავარი გასაჭირი უმუშევრობაა და ამ პრობლემას თუ მოგვიხსნის?
ნინო, 28 წლის: _ ვინ იქნება სათავეში პეტრე თუ პავლე, ამას ჩემთვის მნიშვნელობა არ აქვს. მთავარია მოგვხედოს, დაგვასაქმოს, ჯანმრთელობის უზარმაზარი პრობლემა შეგვიმსუბუქოს.
ნინო, 31 წლის: _ როგორ მწყდება გული, იმოდენა აუდიტორიაში ერთი კაციც რომ არ დარჩა მადლობის მთქმელი. ასეთი უმადურობა გაგონილა?
რეზო, 62 წლის: _ თუ გაჭირვებულ ხალხს მოგვეხმარება, მაგას რა ჯობია.
თინა, 33 წლის: _ ამბობენ, რუსეთიდან გვიყურებსო, რუსეთიდან ჩამოიტანა ფულიო. მაგას რა მნიშვნელობა აქვს? ამ ფულს ჩვენ გვახმარს და ამის დანახვა არ გვინდა.
გოჩა, 40 წლის: _ პიროვნებას კითხვა რომ დაუსვა, მისი საქმიანობის შესახებ უნდა იცოდე.
ნელი, 43 წლის: _ ამბობენ, “ციცინათელა” მან გააკეთაო. ვკითხავდი, თუ იცის, რა ფასები ადევს იქ გასართობებს და ჩვენ შორიდან მაყურებლის როლში რომ ვრჩებით?
დალი, 54 წლის: _ არაფერსაც არ ვკითხავდი. ვეტყოდი, რომ იმ შეხვედრაზე არ უნდა მისულიყო _ ეს რა უმსგავსო საქციელის მომსწრენი გავხდით?!
სერგო, 28 წლის: _ გამოჩნდეს მაგი დალოცვილი, მოგვიყვეს მის ბიოგრფიის და იმ სასიკეთო საქმეების შესახებ, ლეგენდები რომ დადის
ნანი, 42 წლის: _ გაუსაძლის პირობებში ვცხოვრობ. თუ კი მოგვხედავს და სულს მოგვათქმევინებს, მასზე მლოცველი ვიქნები.
კარლო, 74 წლის: _ მიკიბულ-მოკიბული ლაპარაკი არ გვინდა. გვითხრას, რომ მოვა, რას გაგვიკეთებს.
დალი, 58 წლის: _ საზოგადოებასთან მეტი ურთიერთობა იქონიოს, გაგვეცნოს.
თემური, 29 წლის: _ მისი ქველმოქმედება ქვაზე დადებული სიკეთეა, მაგრამ მაინც საჭიროა ფარდა აეხადოს ყველაფერს.
