(გურია ნიუსი, ლანჩხუთი) _ გასულ კვირას ჩინური გასტროლებიდან დაბრუნდა ლანჩხუთის კულტურის ცენტრის შემოქმედებითი ჯგუფი. ქალაქ ჩონგდუში მიწვევა ლანჩხუთელებმა ანსამბლ “შავნაბადას” ხელმძღვანელის დავით ცინცაძის კონსულტაციით მიიღო.
ღონისძიების ორგანიზატორებმა, რომლებიც საკმაოდ კარგად იცნობენ ქართულ ფოლკლორს, გადაწყვიტეს, რომ ჩინეთში სხვადასხვა სფეროში წარმატებული ადამიანებისთვის ქართული ტრადიციული ხელოვნება ეჩვენებინათ.
_ მსოფლიოს ერთ-ერთ უდიდეს ქვეყანას ქართული ფოლკლორი გავაცანით. ქართულ სიმღერასთან ერთად შერწყმულმა ცეკვამ უდიდესი მოწონება დაიმსახურა. მოვისმინეთ ძალიან ლამაზი და საინტერესო ადგილობრივი ფოლკლორი, _ გვითხრა ლოტბარმა ავთანდილ მახარაძემ.
ლანჩხუთიდან ანსამბლი ქართული ცეკვის ატრიბუტებით დახუნძლული გაემგზავრა. სწორედ ამიტომ, აეროპორტში ჩინელებისთვის ცოტა გაურკვეველი აღმოჩნდა, რატომ იყვნენ მომღერლები “შეიარაღებული” ხანჯლებით.
დავით გოგუაძე, ანსამბლის წევრი: _ ქართველების სტუმართმოყვარეობა მსოფლიოში ცნობილია, მაგრამ ჩინელების მასპინძლობამ მართლაც გამაოცა. მაქსიმალურად ცდილობდნენ, ჩვენთვის ესიამოვნებინათ. ტურისტებად აღგვიქვამდნენ და ღიმილით გვხვდებოდნენ, ცდილობდნენ, ჩვენთან ერთად სურათები გადაეღოთ.
ჩინეთი უდიდესი კულტურის ქვეყანაა. ძველისძველი არქიტექტურა, ქალაქის ულამაზესი, ეგზოტიკური გამწვანება _ ამ ყველაფერმა ძალიან მოგვხიბლა.
“მხედრების” შემადგენლობაში მეორე საჯარო სკოლის მოსწავლეები ანი ზენაიშვილი და ნინო ჩხაიძე შედიოდნენ. გოგონებმა თავიანთი შთაბეჭდილებები გაგვიზიარეს:
_ გასტროლებზე ბევრჯერ ვყოფილვარ, მაგრამ ჩინელების მიღებამ და დახვედრამ ყოველგვარ მოლოდინს გადააჭარბა. ჩვენი კოორდინატორები მეგი და ლიუ წუთითაც არ გვტოვებდნენ. ყველა ცდილობდა ჩვენი ეროვნული ტანსაცმელი მოერგო და ფოტოები გადაეღოთ. განსაკუთრებით ფარმა და ხმალმა გააოცათ _ ვერ წარმოედგინათ ნამდვილი თუ იყო… _ გვითხრა ანიმ.
ნინო ჩხაიძე: _ ვიმღერეთ და ვიცეკვეთ ყველგან: აეროპორტში, თვითმფრინავში, რესტორანში, ულამაზეს საკონცერტო დარბაზში. განსაკუთრებით ფარიკაობა მოეწონათ. ყველა კონცერტზე 2-2-ჯერ გაგვამეორებინეს ეს ცეკვა. ძალიან თბილი და ყურადღებიანი ხალხია. საოცარი, უგემრიელესი სამზარეულო აქვთ. უცხო ქვეყანაში უდიდესი პასუხისმგებლობის გრძნობით ვცეკვავდით. ჩინეთში ჩვენი სამშობლო უნდა წარმოგვეჩინა და ამისთვის ყველაფერი გავაკეთეთ.
გამოსამშვიდობებელმა საღამომ ყოველგვარ მოლოდინს გადააჭარბა. ჩინური სამზარეულოს გამორჩეულ უგემრიელეს კერძებთან ერთად ქართველებს საპატივცემულოდ ჩვენებური ხინკალიც დაუმზადეს და ქართული ღვინოც მიართვეს. საღამომ ძალიან თბილად ჩაიარა. ერთმანეთს ენაცვლებოდა ქართული და ჩინური ტრადიციული ცეკვა-სიმღერა.
სოფო ჭელიძე, ლანჩხუთის კულტურის ცენტრის დირექტორი: _ ლანჩხუთის კულტურის ცენტრის ვიზიტი ჩინეთის რკინიგზის 23-ე სამშენებლო კომპანიამ დააფინანსა. ქალაქ ჩონგდუში მასპინძელი იყო ამ კომპანიის მთავარი დირექტორი ბატონი ლიუ ნიუ შენი. მან ქართველებიც კი გაგვაოცა თავისი სტუმართმოყვარეობითა და თბილი დახვედრით.
იქაური შთაბეჭდილებები თითოეულ ჩვენგანს დიდხანს გაგვყვება. საოცარი გრძნობაა, როცა ქართულ სიმღერას საქართველოს გარეთ ისმენ და სიამაყე გეუფლება. ბიჭები ისეთი შემართებით მღეროდნენ, როგორც არასდროს, სხვანაირად ეფერებოდნენ თითოეულ ბგერას. რამდენჯერმე ცრემლიც კი მომადგა თვალზე, როცა მათ ნამღერს ვუსმენდი. განსაკუთრებული აღფრთოვანება ცეკვა “ფარიკაობამ” გამოიწვია ჩინელებში. კონცერტის შემდეგ ცდილობდნენ, ილეთები ესწავლათ.
მიმაჩნია, რომ დასახული მიზანი პირნათლად შევასრულეთ და ამაყები ჩამოვედით საქართველოში. ყველაზე დიდი პასუხისმგებლობა იყო ის, რომ “შავნაბადას” ნაცვლად უნდა ემღერა “მხედრებს”. ამ ყველაფრის სულის ჩამდგმელი და ინიციატორი დავით ცინცაძე გახლდათ. მადლობა მას ამ ყველაფრისთვის.
