(გურია ნიუსი, ლანჩხუთი) _ შაბათს ლანჩხუთში, “გურიის” ყველაზე დიდი ტრიუმფიდან 25 წლის იუბილე უმაღლეს დონეზე აღნიშნეს. “ასეთი ერთსულოვნება და ფეხბურთის სიყვარული არსად მინახავს”, _ ამბობდა ქართული ფეხბურთის მესაჭე ზვიად სიჭინავა. ჩვენ იუბილის შესახებ მასალა ოპერატიულად ორშაბათის ნომერში შემოგთავაზეთ, ამჯერად კი იმ დეტალებზე მოგითხრობთ, რაც არ გვითქვამს.
მართალია, ცუდმა ამინდმა ორგანიზატორებს დღის გრაფიკის კორექტირება აიძულა, მაგრამ ამით იუბილეს არაფერი დაუკარგავს. დილით სტუმარ-მასპინძლები გურიის რეგიონალური ფეხბურთის ფედერაციის ოფისთან შეიკრიბნენ, მათ დაურიგეს სპეციალურად ამ დღისადმი მიძღვნილი ბუკლეტი _ “გურია 1986”. “ბედნიერი ვარ, რომ თითქმის დღეს ყველა თაობის წარმომადგენელი შევიკრიბეთ. გულშემატკივრებს ვულოცავ კლუბის ისტორიაში ყველა დიდი წარმატების 25 წლის იუბილეს,” _ გვითხრა “გურიის” უხუცესმა ვეტერანმა გოგი ებრალიძემ.
მალე სხვადასხვა ქალაქებიდან ვეტერანების მრავალრიცხოვანი არმია ჩამოვიდა. ისინი ფეხბურთის ფედერაციის პრეზიდენტთან ერთად, იუბილისადმი მიძღვნილ სუპერფინალზე გაემართნენ. “გურიის” ვეტერანებმა ახალგაზრდები პენალტების სერიაში დაამარცხეს. შეუდარებელი გახლდათ გოჩა ტყებუჩავა, რომელიც თავის დროზე, სწორედ ასეთი ჟინის და “ჯიგრული” თამაშის გამო, ლანჩხუთელი ქომაგის საყვარელი მობურთალი გახლდათ. “გურიის” ლეგენდარულ კაპიტანს თასი ზვიად სიჭინავამ გადასცა. თბილისის “დინამოს” ლეგენდარულმა მასაჟისტმა ანზორ გაბიტაშვილმა კი ტრადიციას არ უღალატა და ბურთი ამჯერადაც “გაიტაცა”.
ამის შემდეგ, სტუმრები ლანჩხუთის სპორტის მუზეუმში გაემგზავრნენ. მათ აღფრთოვანება ვერ დამალეს, როცა მათ თვალწინ ლანჩხუთის სპორტისა და განსაკუთრებით ფეხბურთის ისტორია გადაიშალა. სფფ-ის პრეზიდენტსა და სხვა სტუმრებს მეგზურობა მუზეუმის დირექტორმა, გურულ სპორტზე შექმნილი არაერთი წიგნის ავტორმა, მერაბ წულაძემ გაუწია.
ქალაქის ცენტრალურ სკვერში გაიხსნა ლანჩხუთის “გურიას” მემორიალი _ კლუბის ემბლემის ირგვლივ 11 სკამი სიმბოლურად იქნა შერჩეული. ღამით მემორიალი, რომელიც 1986 წლის “გურიას” წევრებმა ჰიტად ქცეული სიმღერების ფონზე გახსნეს, კლუბის ფერებშია განათებული. ასევე სიმბოლურია ისიც, რომ მემორიალი “გურიასთვის” ორი მნიშვნელოვანი ფიგურის _ იმედო დუნდუასა და ვატა ძიძიგურის სახელობის სკამის გვერდით გაკეთდა.
“ბედნიერი ვარ, რომ დღეს ასეთი დღე გვაჩუქეს. ყველანი ძალიან მიყვარხართ!” _ ცრემლებს ვერ იკავებდა “გურიის” ყველა დროის საუკეთესო მობურთალი თემურ ჩხაიძე.
“მაშინ, როგორც ყველა, მეც ბათუმში გახლდით შეხვედრაზე. ეს იყო ჩემთვის უბედნიერესი დღე! სხვათა შორის, უმაღლეს ლიგაში პირველი დუბლშემადგენლობის შეხვედრაში, “გურიასა” და “სპარტაკს” შორის, მთავარი მსაჯის ასისტენტი ვიყავი. მაშინ დუბლების მატჩებზე ხაზზე ადგილობრივები მსაჯობდნენ. იმ სეზონში 7-8 თამაში ვიმსაჯე, რაც შემდგომში საკავშირო დონეზე გასვლაზე ძალიან დამეხმარა. ყველა ლანჩხუთელს ვულოცავ ამ დღეს!” _ ასე გაიხსენა “გურიის” ტრიუმფალური წლები ფიფას ყოფილმა მსაჯმა, ოთარ გუნთაძემ.
გურიის ფეხბურთის ფედერაციის პრეზიდენტმა კახა ებრალიძემ თქვა, რომ ყველაფერს გააკეთებენ, რათა ლანჩხუთში საფეხბურთო ტრადიციები არ დაივიწყონ: “სასიხარულოა, რომ ამ სეზონში “გურია” წარმატებით გამოდის და ახარებს გულშემატკივარს. ყველაფერს გავაკეთებთ, რომ ჩვენს სტადიონზე კვლავაც დიდი ფეხბურთი ვიხილოთ”
_ არ არსებობს საქართველოში ქალაქი, სადაც ლანჩხუთზე მეტად უყვართ ფეხბურთი. გახარებული ვარ, რომ დღეს აქ ასეთი ზეიმია! ყველა ლანჩხუთელს, გურულსა და ქართველ გულშემატკივარს ვულოცავ ამ დღეს!” _ გვითხრა გურიის გუბერნატორმა, ვალერი ჩიტაიშვილმა.
ყველაფრის დაგვირგვინება გახლდათ ღონისძიება კულტურის სახლში _ შენობაზე გაკრული ბანერი მიანიშნებდა, რომ ლანჩხუთი იმ დღეს ფეხბურთით ცხოვრობდა. საღამო დაამშვენა საფეხბურთო ფორმაში გამოწყობილი პატარა ბიჭების მიერ გაკეთებულმა კორიდორმა, რასაც “გურიის” მთავარი ტრიუმფატორების სცენაზე გამოსვლა მოჰყვა. წამყვანის, დათო გოგიჩაიშვილის მიერ წაკითხულმა ტექსტმა და დოკუმენტურმა ფილმმა მაყურებელი “გურიის” წარსულში ამოგზაურა. დარბაზი ტიროდა, ოღონდ ეს სიხარულის ცრემლები იყო… თუმცა, იყო სხვანაირი ცრემლებიც, როცა გაიხსენეს ევგრაფი შევარდნაძე, იმედო დუნდუა, ბუტა ჟორდანია, ანზორ კილაძე და სხვები. “ყველას დიდი მადლობა მინდა გადავუხადო ამ ზეიმისთვის _ ორგანიზატორებს, ჩემს ბიჭებს, რომლებთანაც შეხვედრის საშუალება კიდევ ერთხელ მომეცა. არ შემიძლია არ ვახსენო ჩემი მეგობარი შალვა კაკაბაძე. ჩვენ ყველამ ერთად შევქმენით “გურიის” ისტორია. არ შეიძლება არ მოვეფეროთ ჩვენი ევგრაფის, იმედოს, ბუტასა და სხვათა სულებს,” _ ცრემლებს ვერც “გურიის” ტრიუმფის მთავარი შემოქმედი ბეგი სიხარულიძე იკავებდა.
დასასრულ, გაიმართა საზეიმო ბანკეტი, სადაც გაიხსენეს მხიარული ისტორიები “გურიის” წარსულიდან, სუფრას იუბილის ორგანიზატორი, ლანჩხუთის გამგებელი გიორგი გოგუაძე თამადობდა. მხიარულებით გამოირჩნენ გოჩა ტყებუჩავა და დავით უგრელიძე _ მათ ფან-კლუბთან ერთად გაალამაზეს საღამო. გაოგნებული იყო ზვიად სიჭინავა: ჩვენ ფეხბურთი გვაქვს თბილისში, ქვემო ქართლში, იმერეთში, სამეგრელოში, ქართლში… ვგულისხმობ უმაღლეს ლიგას. მჯერა, გურიის რეგიონს არა ერთი, არამედ 2 გუნდი ეყოლება უმაღლეს ლიგაში! დარწმუნებით შემიძლია ვთქვა _ ფეხბურთის ასეთი სიყვარული არსად მინახავს! გპირდებით _ გადმოდით უმაღლეს ლიგაში და სტადიონს გაგიკეთებთ,” _ დაგვპირდა წასვლის წინ სიჭინავა.
