(გურია ნიუსი, ლანჩხუთი) _ გასულ კვირას, ლანჩხუთის პოლიციის შენობაზე ტრაილერის დაჯახება შს სამინისტროსთვის “საკმარისი” არ აღმოჩნდა _ ამჯერად საქმე პოლიციის ახალი შენობის მშენებლობას ეხება, რომლის გახსნა დაგეგმილ ვადებში რომ ვერ ხერხდება, ამის შესახებ უკვე ვწერდით. ლანჩხუთის პოლიციის ახალი შენობის გახსნა 15 ნოემბერს, ანუ სამშაბათისთვის იგეგმებოდა და როგორც ვივარაუდეთ, არც მოესწრო. არადა, თუ გავრცელებულ ხმებს დავუჯერებთ, “მინისტრს შემოუთვლია _ 15-ში შენობა მზად იყოს, თორემ კამერები გაამზადეთ და პირველებს თქვენ ჩაგსვამთო”.
ჩვენ დავინტერესდით, თუ რა გახდა იმის მიზეზი, რომ შენობის გახსნა დაგეგმილ ვადებში ვერ მოხერხდა _ ჯერ იყო და ეზოს მოწყობის სამუშაოების ჩატარებისას, ტრაქტორმა მიწისქვეშა სადენები გადაჭრა, რამაც ქალაქში ელექტროენერგიის გათიშვა გამოიწვია. მეტიც, ტრაქტორისტი იღბლად გადარჩა, რომ ელენერგიას არ ემსხვერპლა. ავარია იმდენად მძიმე იყო, რომ მის აღსადგენად ადგილობრივ ენერგოკომპანიას ბათუმიდან დამატებითი ძალების გამოძახება დასჭირდა.
ასევე, ჩვენი წყაროს ინფორმაციით, არ იმუშავა შენობის შიგნით ელექტროგაყვანილობამ და როცა რამდენიმე ოთახის რემონტი დასრულებული იყო, საჭირო გახდა კედლების “ამოტეხვა”, ახალი სადენების გაყვანა და თავიდან რემონტის ჩატარება. როგორც ამბობენ, მშენებლობის მწარმოებელი კომპანია მუშებს სასწრაფო რეჟიმში სამუშაოების დასრულებას თხოვს, წინააღმდეგ შემთხვევაში, ისინი ანაზღაურებას ვერ მიიღებენ!
თითქმის ყოველდღიურად ათვალიერებენ მშენებლობის მიმდინარეობას ადგილობრივი მაღალჩინოსნები, თუმცა, მათ საქმეში ჩარევისა და რეკომენდაციის მიცემის უფლება არ აქვთ; მშენებლებს პოლიციელები ფიზიკურადაც ეხმარებიან. ვითარებას ისიც ართულებს, რომ ლანჩხუთში ბოლო დღეებში გადაუღებლად წვიმს, რის გამოც, 2 საფეხბურთო შეხვედრის გადადება გახდა საჭირო.
თუმცა, როგორც ჩანს, ვანო მერაბიშვილის უწყებას ამინდის ჭირვეულობა არ აინტერესებს. როგორ შესრულდება სამუშაოები, ამას შს მინისტრი საკუთარი თვალით ნახავს _ ის აუცილებლად დაესწრება გახსნას, რომელიც, დაუდასტურებელი ინფორმაციით, 23 ან 25 ნოემბრისთვის გადაიდო, თუმცა, მისი დასრულება არც ამ თარიღისთვის არის მოსალოდნელი.
ყოველ შემთხვევაში, მთლიანად ვერ დასრულდება და ამიტომაცაა, შენობის გვერდით დიდი ბანერი გაკეთდა, რითაც უკანა ნაწილი დაიფარა. რამდენად მოატყუებენ მერაბიშვილს, ეს გახსნისას გამოჩნდება. თავის დროზე, მიხეილ სააკაშვილმა ლანჩხუთში საცურაო აუზი რომ გახსნა, იქვე გვერდით მდებარე სპორტული დარბაზისკენ გაიწია, თუმცა, შეაჩერეს _ ავარიულია და მისი შეკეტება მომავლის გეგმაში გვაქვსო. სინამდვილეში კი მას დაუმალეს სახანძრო მანქანები, რომლითაც აუზს წყალი მიეწოდებოდა!!! ნახევარმილიონიანი და “წყალგაპარებული” აუზის შემხედვარე, არავინ იცის, როგორი გამოვა პოლიციის ახალი შენობა.
როგორც ჩანს, გახსნისთვის არც “გადარეული გურულის” ძეგლის გადატანა მოესწრება, რადგან ჯერ სამუშაოები ამ კუთხით არ დაწყებულა. მეტიც, არც ისაა გამორიცხული, რომ ლანჩხუთელთა პროტესტის გამო, ძეგლის გადაადგილებაზე საერთოდ უარი თქვან. როგორც ამბობენ, შს მინისტრმა თავად მიიღო ასეთი გადაწყვეტილება მას შემდეგ, რაც გაზეთებმა წერილები გამოაქვეყნეს, სადაც აქაურები მას თხოვდნენ _ ლანჩხუთის სავიზიტო ბარათად ქცეული ძეგლი სხვაგან არ გადაეტანათ. “აღარ გადააქვთ ძეგლი. არადა, ადგილობრივ ხელისუფლებას პროექტიც ჰქონდა, თუ სად და როგორ დაიდგმებოდა. ჯერ ნინოშვილზე იყო საუბარი, მაგრამ რაც დაიწერა _ რა შუაში იყო აჯანყებული გურული ცნობილ მწერალთან, გადაიფიქრეს და ძეგლი რკინიგზის სადგურისთვის “გაიმეტეს”. მაგრამ ვანო მერაბიშვილი პირადად წასულა წინააღმდეგი, თუ ხალხი წინააღმდეგია, იყოს _ რას გვიშლისო. რომ გაუჭირდათ, მაშინ გაახსენდათ ხალხი,” _ “კეთილ ვანოზე” ამყარებენ იმედს ლანჩხუთელები.
