როგორც “გურია ნიუსი” წერდა, ოზურგეთის მუნიციპალიტეტის “შპს ახალ სავაჭრო ცენტრში” ბაზრის მოვაჭრეები მეორე და მესამე “ნავესებს” შორის ახალი მშენებლობის წამოწყებას აპროტესტებდნენ. ისინი გვთხოვდნენ, გაგვერკვია, იყო თუ არა მშენებლობის ნებართვა გაცემული იმ პირებზე, რომლებიც იმ ტერიტორიაზე მშენებლობის დაწყებას გეგმავენ: “მოვითხოვთ, გვანახონ საბუთები, რამდენად კანონიერად არის გაყიდული ტერიტორია, ასევე, გვაჩვენონ ნებართვის და რეგისტრაციის ნომერი, ნახაზი. ჩვენ მიგვაჩნია, რომ ეს ტერიტორია უკანონოდ არის მითვისებული. მოვითხოვთ, გაგვცენ კომპეტენტური პასუხი”, _ ამბობდნენ “გურია ნიუსთან” საუბარში მოვაჭრეები.
“ახალი სავაჭრო ცენტრის” დირექტორი ზაზა გოგუაძე “გურია ნიუსთან” საუბარში აღნიშნავდა, რომ ბაზრის მოვაჭრეთა ნაწილის პრეტენზიები უკანონოა და მოთხოვნებს ხელისუფლება ვერ გაითვალისწინებს, რადგან მშენებლობის ნებართვა ყოველგვარი წესებისა და კანონის დაცვით გაცემულია ომარ ვაშალომიძესა და კაკო ურუშაძეზე. თუმცა, აღნიშნა, რომ ეს ტერიტორია გაყიდული არ არის _ ის მუნიციპალიტეტის ქონებაა და გაფორმებულია გრძელვადიანი იჯარით.
“გურია ნიუსთან” საუბარში ომარ ვაშალომიძე ამბობს, რომ ყველა პროცედურა კანონის დაცვით გაიარა:
_ გთხოვთ, იყავით ობიექტურები ამ საკითხთან დაკავშირებით. მე მესმის თქვენიც და მოვაჭრეებისაც, თუმცა, მინდა გითხრათ, რომ არავის ინტერესებს ისინი არ ეწირებიან, რადგან მათ არანაირ კანონდარღვევასთან არ აქვთ საქმე. თქვენ “ახალი სავაჭრო ცენტრის” დირექტორმაც გაგცათ ამომწურავი პასუხი. საქმე ისაა, რომ მე ძველი აგრარული ბაზრის ტერიტორიაზე მქონდა ფართი იჯარით აღებული სამეწარმეო საქმიანობისთვის, ვიდრე 2010 წელს ბაზრის დახურვასთან დაკავშირებით ჩემი ობიექტი არ აღმოჩნდა უფუნქციო მდგომარეობაში, რამაც სერიოზული ეკონომიკური პრობლემების წინაშე დამაყენა. მივმართე ზემდგომ ორგანოებს, გამოეყოთ ჩემთვის ალტერნატიული ფართი 20 კვ.მ.-ს ოდენობით, რაც გარკვეული დროის შემდეგ დაკმაყოფილებულ იქნა. ყველა პროცედურა კანონის სრული დაცვით გავიარე, დაინტერესებულ პირებს შეუძლიათ, მოიკითხონ შესაბამის ორგანოებში.
ვაშალომიძის თქმით, მხედველობის არეალი ნაწილობრივ იზღუდება: _ მაგრამ, კარგად მოგეხსენებათ, ბაზარი კონკურენტუნარიანი გარემოა და როგორ შეიძლება, რაღაცა რაღაცას არ ეფარებოდეს? ყველას გთხოვთ, მოიქეცით კანონიერად. რაც შეეხება მშენებლობის დაწყებას, იგი ადრე გაზაფხულზე კანონის მთელი დაცვით დაიწყება.
“გურია ნიუსმა” ამ საკითხთან დაკავშირებით ოზურგეთის მუნიციპალიტეტის გამგეობას ოფიციალურად წერილობით მიმართა, მოეწოდებინა ინფორმაცია, არის თუ არა “ახალ სავაჭრო ცენტრში” მშენებლობის ნებართვა გაცემული.
ოზურგეთის მუნიციპალიტეტის გამგეობის მიერ ოფიციალურად მოწერილ პასუხში, რომელსაც ხელს მუნიციპალიტეტის გამგებლის მოვალეობის შემსრულებელი ილია ვაშაყმაძე აწერს, ვკითხულობთ, რომ “ახალ სავაჭრო ცენტრში” მეორე და მესამე “ნავესებს” შორის, კაკო ურუშაძესა და ომარ ვაშალომიძეზე მშენებლობის ნებართვა გაცემული არ არის.
ოზურგეთის მუნიციპალიტეტის გამგებლის მოვალეობის შემსრულებელი, ილია ვაშაყმაძე “გურია ნიუსთან” საუბარშიც ადასტურებს, რომ მშენებლობის ნებართვა არც ერთ მათგანზე გაცემული არაა და შესაბამისად, უკანონო ქმედებას არ დაუშვებს: _ ოზურგეთის მუნიციპალიტეტის გამგეობის მიერ “ახალ სავაჭრო ცენტრში” მშენებლობის დაწყებასთან დაკავშირებით, ამ პიროვნებებზე არანაირი ნებართვა არ არის გაცემული. თუ მშენებლობა დაიწყება ნებართვის გარეშე, ეს უკანონო იქნება. თუმცა, არ არის გამორიცხული, რომ ნებართვა გაიცეს. როცა შემოვა განცხადება, მას განიხილავს ზედამხედველობის სამსახური და გადავწყვეტთ. თუმცა, კანონის წინააღმდეგ ვერავინ წავა, _ აღნიშნა ვაშაყმაძემ.
