ირაკლი ალასანიას ჩოხატაურში პარტია ჯერ არ შეუქმნია, თუმცა, “თავისუფალი დემოკრატების” საინიციატივო ჯგუფს ვლადიმერ სიხარულიძე ხელმძღვანელობს და როგორც ამბობენ, პარტიის ადგილობრივ ორგანიზაციასაც ის ჩაუდგება სათავეში.
_ მე ვაყალიბებ “ჩვენი საქართველო _ თავისუფალი დემოკრატების” სიანიციატივო ჯგუფს. პარტია იანვრის ბოლოს, ან თებერვლის დასაწყისში დაფუძნდება, აირჩევა საბჭო, ჩატარდება კონფერენცია და მერე გადაწყდება, ვინ უხელმძღვანელებს პარტიას, _ ამბობს ჩვენ გაზეთთან საუბარში სიხარულიძე.
მისივე თქმით, საინიციატივო ჯგუფში შესვლის შანსი ყველა იმ ადამიანს აქვს, რომელსაც საზოგადოებრივ-პოლიტიკურ ცხოვრებაში ჩართვის სურვილი აქვს.
_ ბატონო ვლადიმერ, როგორც გვითხრეს, პარტიაში იქნებიან “ახალი მემარჯვენეების” და ნოღაიდელის გუნდის ყოფილი წევრები _ მათ შორის, მამია ბარამიძე და ვახო გაჩეჩილაძე.
_ ვისაც სურვილი ექნება, ყველას შეუძლია შემოვიდეს საინიციატივო ჯგუფში. ამ ეტაპზე მამია ბარამიძე არ არის საინიციატოვო ჯგუფის წევრი, ხოლო გაჩეჩილაძე, რომელმაც “ახალი მემარჯვენეები” დატოვა, ნამდვილად არის წევრი.
_ იმ ადამიანებს, რომლებიც თქვენ ირგვლივ განიხილებიან, ხელმოცარულ პოლიტიკოსებად მიიჩნევენ. ზოგმა საკუთარი ხმების დაცვა ვერ შეძლო, ზოგი ხელისუფლებას გაურიგდა. რა გარანტია გაქვთ, რომ ახლაც იგივე არ მოხდება, მით უმეტეს, რომ თქვენ იყავით ის პიროვნება, რომელიც ხელისუფლებას სამსახურზე დათანხმდა და იქიდან საკუთარი ნებით არ წამოსულა _ გამოუშვეს…
_ მახსოვს, სანამ ზედამხედველობის სამსახურის უფროსად დავინიშნებოდი, ჩემთან ინტერვიუ ჩაწერეთ, სადაც გითხარით, რომ მე პრობლემები ხელისუფლებასთან მქონდა სამართლებრივი სივრცის არარსებობაზე. და კიდევ ერთი ინტერვიუ, სადაც მე აღვნიშნე, რომ თვითმმართველობის არჩევნები არ მიმაჩნდა პოლიტიკად და ახლაც ასე ვფიქრობ. მე ვარ თვითმმართველობის სპეციალისტი, პროფესიით ინჟინერ-მშენებელი და ზედამხედველობის სამსახურში, კანონის მიხედვით, სამშენებლო კონსტრუქციების და ნაგებობების მდგრადობაზე პასუხისმგებლობა მევალებოდა. შესაბამისად, ამ სამსახურში მნიშვნელობა არ აქვს, რომელი პარტიის წევრი ხარ, რადგან ეს პოლიტიკა არ არის.
_ თუმცა, ამ სამსახურში თქვენ არაფერი მნიშვნელოვანი არ გაგიკეთებიათ, ყოველ შემთხვევაში, ეს მედიამდე არ მოსულა მანამ, სანამ სამსახურიდან არ გაგიშვეს მოტივით, რომ უსაქმური იყავით…
_ პირველი ამ სამსახურმა რაც გააკეთა, ის იყო, რომ მოაგვარა იურიდიული საკითხები, რამაც დიდი დრო წაიღო. მახსოვს, წერდით, ჩვენი მოთხოვნის შემდეგ, ერთ კვირაში გააკეთეს ოქმებიო. ეს იმიტომ მოხდა, რომ მანამდე, როგორც გითხარით, იურიდიულ პროცედურებს ვაგვარებდით. იყო საკითხები, რომლებსაც ისინი არასწორად აკეთებდნენ და ვითხოვდი გამოსწორებას. იგივე განახლების სკოლა _ იგი ისე აშენდა, რომ ნებართვა არ იყო გაცემული. ამას დაემატა ბახმაროს საკითხი, კორუფციული დადგენილებები. ამასაც ხომ თქვენც წერდით?! ამ ყველაფრით ხელი ეშლებოდა სამსახურს, რომლის მუშაობა არ “აწყობდა” არა მარტო გამგეობას, არამედ სამხარეო ადმინისტრაციის ზოგიერთ წარმომადგენელს.
_ ეს გასაგებია და ამის შესახებ არა ერთხელ დაწერილა, თუმცა, თქვენ ამ ყველაფრის შესახებ მაშინ გააკეთეთ ხმამაღალი განცხადება, როდესაც გამოგიშვეს. თქვენ არ მპასუხობთ კითხვაზე, თუ რისი იმედი გაქვთ იმ კადრებით, რომლებსაც საზოგადოებაში არც თუ მაღალი რეიტინგი აქვთ.
_ ეს ყველაფერი არის საინიციატივო ჯგუფის დონეზე და მიმდინარეობს მუშაობა. არის საზოგადოებაში ადამიანთა ნაწილი, რომელიც განათლებული, პროფესიონალია, მაგრამ არ არის საზოგადოებრივად აქტიური და არ ერთვება პოლიტიკურ საქმიანობაში. ამიტომ, მე მაქსიმალურად ვცდილობ მოვძებნო ახალგაზრდობა, რომელსაც ეს სფერო აინტერესებს ან ის ხალხი, ვისაც სურვილი ექნება, აიღოს პასუხისმგებლობა საზოგადოების წინაშე და მინდა, ამ ხალხით თითოეულ ამომრჩევლამდე მივიტანოთ, თუ რის გაკეთებას ვაპირებთ. პარტია არ არის მხოლოდ არჩევნებისთვის, როგორც დღევანდელ რეალობაშია დამკვიდრებული. ჩვენ უნდა დავდოთ ის პრობლემები, რომლის გადაჭრისთვის ვიბრძოლებთ, უნდა გაკეთდეს ჩოხატაურის განვითარების პროგრამა. ამაზე დეტალურად მაშინ გვექნება საუბარი, როცა პარტია ჩამოყალიბდება.
_ რის გაკეთებას აპირებთ მომავალში?
_ ჯერ პარტია უნდა ჩამოყალიბდეს. შემდეგ, შეიქმნას სტრუქტურული ერთეულები დასახლებული პუნქტების მიხედვით, შეიკრიბოს არსებული პრობლემები, რომლებსაც უნდა მიეცეს განზოგადების სახე და მომზადდეს ნორმატიული აქტები. თორემ ის, რომ მე პარტიაში ვიქნები, ამას და იმას გავაკეთებ,-მეთქი, ვთქვა, არ იქნება რეალური, რადგან ამის შესაძლებლობა არ არსებობს.
