“სამოქალაქო განათლებისა და პედაგოგთა გადამზადების” პროგრამის ფარგლებში ჩატარებული ბლოგების კონკურსის გამარჯვებულების სიაში ოზურგეთის მეორე საჯარო სკოლის მოსწავლე დიმიტრი გობრონიძეა, რომელსაც დიპლომი და ცანონს-ის ფოტოაპარატი გადაეცა საჩუქრად.
კონკურსი 2011 წლის მაისში გამოცხადდა და მასში 124 მოსწავლე მონაწილეობდა. ხუთ ნომინაციაზე წარმოდგენილი ბლოგები სამოქალაქო განათლების თემაზე იყო შექმნილი _ ახალგაზრდა მოხალისე, ახალგაზრდა ომბუცმენი, ბუნების დამცველი, მოქალაქე ჟურნალისტი და ჯანსაღი ცხოვრების ადვოკატი.
დიმიტრი გობრონიძე ოთხი თვის განმავლობაში ჯანსაღი ცხოვრების ადვოკატი იყო და ყოველდღიურად ანახლებდა თავის ბლოგს, რომლის მეშვეობით ყველას მოუწოდებდა ჯანსაღი წესით ცხოვრებაზე.
_ ჩვენი ჯანმრთელი ბლოგი _ ასე დავასათაური ჩემი ბლოგი. ძალიან შრომატევადი გამოდგა ეს ყველაფერი. ყოველდღიურად მიწევდა სტატიების, მოსაზრებების და ვიდოების გამოქვეყნება. ოთხის თვის განმავლობაში 20 000-ზე მეტი მნახველი მყავს, ყოველდღე, დაახლოებით, 200 ადამიანი შემოდიოდა. აკეთებდნენ კომენტარებს და ბლოგი მეტად საინტერესო გამოდგა. ერთ დღეს დამიკავშირდნენ და მითხრეს, რომ ჟიურიმ შეისწავლა ჩემი ბლოგი და გამარჯვებულების სიაში აღმოვჩნდი, _ აღნიშნა ჩვენს გაზეთთან საუბრისას დიმიტრი გობრონიძემ.
მისივე თქმით, ბლოგი გურიაში ახლად იკიდევს ფეხს და ჯერ არც თუ ბევრი ბლოგერი გვყავს:
_ ბლოგი არის შენი ცხოვრების დღიური, ონლაინ დღიური. აქ წერ იმასაც, რაც შენ ფიქრობ, აქვეყნებ ფოტოს და ვიდეოს, _ გვითხრა ახალგაზრდა ბლოგერმა, რომელიც კვლავ აპირებს აქტიურად გააგრძელოს მუშაობა ამ კუთხით.
