12 იანვარს ლანჩხუთის მუნიციპალიტეტის საკრებულოს 2012 წლის პირველი სხდომა გაიმართა.
განსახილველი იყო 22 საკითხი. სხდომა მშვიდ ატმოსფეროში მიმდინარეობდა, არც ოპოზიციონერ დეპუტატებს გამოუჩენიათ რაიმე სახის ინიციატივა.
მუნიციპალიტეტის სოციალური სამსახურის უფროსმა, მაკა გოგიჩაიშვილმა დეპუტატებს გააცნო სოციალური პროექტების დაფინანსებაში შეტანილი ცვლილებები. ოპოზიციონერი დეპუტატი, დავით წულაძე დაინტერესდა, რით იყო განპირობებული ადრე დამტკიცებულ განკარგულებაში ცვლილებების შეტანა. საკრებულოს თავმჯდომარემ რევაზ ჩიტიძემ განმარტა, რომ ეს ცვლილება გამოიწვია რეფერალური სამსახურის შექმნის აუცილებლობამ: _ პოლონური მხარის დახმარებით ლანჩხუთის მუნიციპალიტეტმა ლანჩხუთის საავადმყოფოსთვის შეიძინა რეანიმობილი, მანქანაში 30 ათასი ლარის ღირებულების აპარატურაა დამონტაჟებული. სწორედ ამ რეანიმობილის ეკიპაჟისთვის ბინებით დაკმაყოფილების ხარჯებია გათვალისწინებული ცვლილებებში.
ქრისტიან-დემოკრატების წარმომადგენელი, მარინე თურნავა დაინტერესდა ლანჩხუთის საავადმყოფოში არსებული მძიმე მდგომარეობით. იგეგმება თუ არა მმართველი კომპანიის ჩანაცვლება სხვა კომპანიით და არსებული მდგომარეობის შეცვლა. ლანჩხუთის გამგებლის განმარტებით, ცნობილი გახდა, რომ თვის ბოლოს ებრაულ კომპანიას ჩაანაცვლებს სადაზღვევო კომპანია “ალფა”, რომელიც ახალი საავადმყოფოს აშენებას გეგმავს ლანჩხუთში.
იმკურნალებენ თუ არა “ალფას” კლინიკაში სხვა კომპანიებში დაზღვეული პაციენტები, გაურკვეველი დარჩა.
სხდომის ბოლოს, მუნიციპალიტეტის გამგებელმა, გია გოგუაძემ აიღო სიტყვა და ბევრ სასიამოვნო ცვლილებას დაჰპირდა ლანჩხუთელებს: _ წელს იგეგმება “გურიის” სტადიონის რეკონსტრუქცია; წყლის კომპანია ახალი ულტარათანამედროვე ოფისის აშენებას გეგმავს სამხატვრო სკოლის მეზობლად; რკინიგზის კომპანია ლანჩხუთის სადგურის და რკინიგზის ლიანდაგების სრულ რეაბილიტაციას გვპირდება. “ასე რომ, გასაკეთებელი კიდევ ბევრია”, _ გაიმეორა ნაციონალური დევიზი გამგებელმა.
წინასაარჩევნო მარათონი უკვე დაწყებულია. დრო გვიჩვენებს, ეს დაპირებები მხოლოდ ამომრჩეველთა გადასაბირებლადაა გამიზნული თუ რეალურად გახორციელებულ პროექტებად იქცევა.
