ლანჩხუთის მუნიციპალიტეტის სოფელ აკეთის მოსახლეობა აღშფოთებას ვერ მალავს სოფელში არსებული ჩაის ფაბრიკის შენობის გაყიდვისა და დაშლის გამო. რამდენიმე დღის წინ, აკეთელებმა ჩვენთან საუბრის დროს დაადასტურეს, რომ შენობა-ნაგებობა, რომელიც ერთ დროს სოფლის შემოსავლის ძირითადი წყარო იყო, ახლა შპს “ფორტუნამ” აუქციონის გარეშე იყიდა და უკვე დაშლაც დაიწყო.
_ ჩვენთან ასეულობით ტონა ჩაი იკრიფებოდა. ეს იყო უზარმაზარი ჩაის ფაბრიკა, რომელიც სახელმწიფოს ეკუთვნოდა. გავიდა რამდენიმე ხანი, ფაბრიკა ბალანსიდან ბალანსზე გადასცეს კოლმეურნეობას, შემდეგ კოლმეურნეობა დაიშალა და ეს ჩაის ფაბრიკა ხალხის საკუთრება გახდა, _ ამბობენ “გურია ნიუსთან” საუბარში აქაურები და დასძენენ, რომ მიუხედავად ამისა, არავინ ეკითხებოდა ხალხს, ისე ნიშნავდნენ დირექტორს და ისე აკეთებდნენ ყველაფერს.
“ძალიან დიდი რაოდენობის ჩაი იკრიფებოდა და ფაბრიკასაც კარგად ამუშავებდნენ. 200 კაცი მუშაობდა. ელექტროენერგია ხომ უნდა ჩაის გადამუშავებას?! ჰოდა, მიდიოდა ხარჯი, დირექტორი ქვითარს სანახევროდ წერდა, სიით იღებდა ჩაის, ფულს კი აძლევდა, მაგრამ შემოსავალში არაფერი არ იყო ნაჩვენები, თავის საკუთრებად მიიჩნევდა ყველაფერს, _ გვითხრა ერთ-ერთმა აკეთელმა.
84 წელს გადაცილებული მამია ღლონტი “გურია ნიუსის” ოზურგეთის განყოფილებაში 17 თებერვალს მოვიდა და გვითხრა, რომ აკეთის თემში ოთხი სოფელი შედის _ ჭანჭათი, ზემო აკეთი, ქვემო აკეთი და გაგური: _ ჩაის ფაბრიკის მიმდებარე ტერიტორიაზე რომ ამოვიდოდა ვინმე, ქალაქის დიდი უბანი ეგონა, ისეთი ცხოვრება და ჟრიამული იყო. შემდეგ საქმე უკან-უკან წავიდა. დაგროვდა ვალები, რაც ძირითადად გამოიწვია იმან, რომ არ ხდებოდა პროდუქციის აღრიცხვა და ქვითარი არ იწერებოდა.
_ ახლა რა ხდება?
_ ერთი თვე იქნება, რაც გაიყიდა ფაბრიკის შენობა. მილიონი ლარის ღირებულების იყო, მაგრამ 200 000 ათასად გაყიდეს. ხალხს არაფერი ჰკითხეს. ნაწილ-ნაწილ შლიან და მიაქვთ. ხალხმა ჩუმად გამოიძახა ტელევიზია, უნდა მოსულიყვნენ, დღეც დაითქვა.
_ რომელი ტელევიზია?
_ არ ვიცი, ვერ გეტყვით, ის კი ვიცი, რომ ტელევიზია უნდა მოსულიყო. მანამდე მუნიციპალიტეტის გამგებელმა, გია გოგუაძემ ჩამოიარა მთელი სოფელი და გვითხრა, ნუ გამოიძახებთ ტელევიზიას, ნუ იჩივლებთო. თქვა, ქვედა უბანში გაზის მშენებლობასაც შევაჩერებო და გაჩერდა ხალხი.
_ შენობა უკვე დაიშალა?
_ ნაწილი დარჩა დასაშლელი, ხონში წაიღეს.
ჩვენ მიერ მოპოვებული ინფორმაციით, ჩაის ფაბრიკის გაყიდვა 2008 წელსაც იგეგმებოდა, მაგრამ მაშინ აკეთის მაჟორიტარმა დეპუტატმა, არკადი ჩხაიძემ ატეხა განგაში, ასევე, მოსახლეობის წერილი შევიდა გუბერნატორის და ლანჩხუთის ხელისუფლების სახელზე. მაშინ ეს პროცესი შეჩერდა. ახლა კი, ისე დაიშალა და გაიყიდა შენობა, რომ სოფელმა ვერაფერი მოახერხა. აკეთელები ახლაც ხელისუფლებისგან ითხოვენ დახმარებას.
ლანჩხუთის მუნიციპალიტეტის გამგეობის საზოგადოებასა და პრესასთან ურთიერთობის სამსახურში გვითხრეს, რომ ადგილობრივმა ხელისუფლებამ ყველაფერი გააკეთა იმისთვის, რომ აუქციონი არ შემდგარიყო: _ სამი წელია, ინვესტორს ვეძებდით, რომ იქ რაიმე საწარმო ამუშავებულიყო. აკეთის ფაბრიკა იყო დაყადაღებული, სახელმწიფოს ვალი ჰქონდა და რადგან ეკონომიკის სამინისტროს ბალანსზე იყო, თვითონვე გაყიდა, _ გვითხრეს პრესსამსახურში.
ამავე სამსახურში არ დაადასტურეს ის ინფორმაცია, რომ ლანჩხუთის მუნიციპალიტეტის გამგებელი, გია გოგუაძე ხალხს მოუწოდებდა გაჩუმებულიყვნენ და მედიასაშუალებებისთვის არაფერი ეთქვათ: _ როდესაც მოსახლეობას შეხვდა, გიორგი გოგუაძეს მსგავსი რამ არ უთქვამს. ეს ინფორმაცია არ შეესაბამება სიმართლეს.
