ჩოხატაურის მუნიციპალიტეტის ბიუჯეტში ეკონომიურად შეჭირვებული ოჯახებისთვის საშეშე მერქნის შესაძენად 14 000 ლარია გათვალისწინებული, რომელიც ერთჯერადად, 180 ლარის ოდენობით გაიცემა. პროგრამა ეხება შრომის უუნარო, შეზღუდული შესაძლებლობის მქონე მარტოხელა პირებს, მარტოხელა პენსიონერებს და უკიდურესად შეჭირვებულ ოჯახებს. მიმდინარე წელს ჩოხატაურის მუნიციპალიტეტის გამგეობაში ათობით განცხადებაა შესული საშეშე მერქნის შეძენასთან დაკავშირებით.
ჩვენ გადავწყვიტეთ გავსაუბრებოდით იმ ადამიანებს, რომლებსაც უკიდურესად უჭირდათ და განცხადებით მიმართეს გამგეობას: _ შეშის მიღებაზე თხოვნით გამგეობას ერთი თვის წინ მივმართე, მაგრამ შეშა არ მიმიღია და ველოდები, ერთჯერადი დახმარება მომცეს 180 ლარის ოდენობით. ამ ზამთარში ნახერხი ვიყიდე 10 ტომარა და იმით ვთბებით. ვთბებით რა _ ცეცხლს დილით ვანთებთ, სახლი რომ შეთბეს ცოტა. სოციალურ დახმარებას ვიღებდი და ისიც მომიხსნეს. ქულები აღარ გყოფნისო. რა შეიცვალა, არ ვიცი! ადრე თუ მყოფნიდა ქულები, ახლა რატომ აღარ მყოფნის?! მუშაობით არავინ ვმუშაობთ ოჯახში, _ გვითხრა გურამ თავბერიძემ.
ჩვენ ასევე ვესაუბრეთ სოციალურად დაუცველი ერთ-ერთი ასეთი ოჯახის წევრს, იზოლდა ვასაძე-თავართქილაძის რძალს, ქალბატონ მაიკოს (ოჯახის უფროსი დიასახლისი სახლში არ დაგვხვდა), რომელიც სათბობის გარდა, სხვა პრობლემებზეც გვესაუბრა:
_ ერთი თვე არ იქნება, რაც განცხადება დავტოვეთ გამგეობაში; ჯერჯერობით, არც შეშა მიგვიღია და არც რაიმე ფულადი დახმარება. შეიძლება, არ დამიჯეროთ, მაგრამ ამ წუთას ჩალის ღერებით ვთბებით. სოციალურ დახმარებას ვიღებთ, მაგრამ არ გვყოფნის. ოჯახში ხუთი წევრი ვართ. არცერთი არ ვმუშაობთ, მეუღლე მუშაობდა, მაგრამ ახლა ჯანმრთელობის პრობლემა აქვს და სახლშია. მე ჯერ შემიძლია შრომა, მაგრამ სამსახური არ არის. ორი პროფესია მაქვს, მაგრამ დამლაგებლადაც კი ვიმუშავებდი და არ ვითაკილებდი. ჩვენი გამგებელი ვიცი, რომ ბევრს დაეხმარა და იმედი გვაქვს, რომ ჩვენც დაგვეხმარება.
ამ თემასთან დაკავშირებით ვესაუბრეთ მუნიციპალიტეტის გამგებელს, ლელა იმედაშვილს:
_ განცხადება ძალიან ბევრ ადამიანს აქვს დაწერილი, მაგრამ ეს იმას არ ნიშნავს, რომ უპირობოდ ყველა დაკმაყოფილდება. ვერ დაკმაყოფილდება ფიზიკურად. ჩვენთან განცხადების შემოსვლის შემდეგ, პირველ რიგში, მათ რწმუნებულებს ვთხოვთ შუამდგომლობას და როცა რწმუნებულები ადასტურებენ, რომ ამ ადამიანის მიერ განცხადებაში მოყვანილი ფაქტები სინამდვილეს შეესაბამება, ამის შემდეგ ვიღებთ გადაწყვეტილებას, იწერება შესაბამისი ბრძანება და გავცემთ დახმარებას, ერიცხება შესაბამისი თანხა ან იღებენ შეშას. პრინციპში, ამჯერად შეშის რესურსი ამოგვეწურა უკვე და თუ კი დახმარება გაიცემა, ეს იქნება ფინანსური სახით.
მეორე დღეს რედაქციაში ქალბატონი იზოლდა ვასაძე-თავართქილაძე გვესტუმრა და საკუთარი პრობლემის შესახებ გვესაუბრა: _ განცხადება შეშის თაობაზე დავტოვე გამგეობაში, მაგრამ შეშა თუ არ მომცეს, გარკვეული თანხა მაინც მოეცათ და ვიყიდდი. გავიდა ზამთარი უკვე, მაგრამ არაფერი მოუციათ ჯერ. ბუღალტერიაში მაიკო ჟღენტმა მითხრა, პირველი კვარტალი ამოწურულია და მეორე კვარტალში ვნახოთო. ამასობაში ხომ გავიყინები?! კიდევ კარგი, სოციალურ დახმარებას ვიღებ, პური კი ეკლესიიდან მიმაქვს სახლში. ჩემი შვილი არსად არ მუშაობს _ მას ჯანმრთელობის სერიოზული პრობლემა აქვს. რძლისთვის სამსახური ვთხოვე გამგებელს, ეგებ, სადმე დამლაგებლის ადგილი მაინც გამოუნახოთ ,-მეთქი. ჯერ მითხრა თებერვალში ვნახოთო, თებერვალი მთავრდება და ჯერ არაფერი ჩანს, _ ამბობს ქალბატონი იზოლდა.
