“გურია ნიუსი” საქართველოს პარლამენტის წევრს, ოზურგეთის მაჟორიტარ დეპუტატს გოჩა შანიძეს დაუკავშირდა და საკანონმდებლო ცვლილებასთან დაკავშირებით რამდენიმე კითხვით მიმართა.
_ ბატონო გოჩა, საარჩევნო კანონში შეტანილმა ცვლილებებმა დიდი აჟიოტაჟი გამოიწვია. თქვენი აზრით, იყო თუ არა ეს ცვლილება საჭირო და თუ იყო _ რისთვის?
_ აღნიშნულ კანონთან (“მოქალაქეთა პოლიტიკური გაერთიანებების შესახებ” საქართველოს ორგანულ კანონში გახორციელებულ ცვლილებებთან), მიმართებაში არა ერთი განმარტება გაკეთდა, როგორც საპარლამენტო უმრავლესობის, ასევე საპარლამენტო უმცირესობის, პოლიტიკური პარტიების, არასამთავრობო თუ საერთაშორისო ორგანიზაციების მხრიდან. მე თავს შევიკავებ რაიმე კომენტარი გავაკეთო აღნიშნულ განმარტებებთან და “აჟიოტაჟთან” დაკავშირებით, მაგრამ ცალსახაა_ კანონი მხოლოდ არაკეთილსინდისიერი პოლიტიკური მოთამაშეების წინააღმდეგ არის მიმართული.
_ ძალიან ბევრი მოქალაქე და პოლიტიკური პარტიის წარმომადგენელი მიიჩნევს, რომ ეს ბიძინა ივანიშვილის წინააღმდეგ განზრახ შეკოწიწებული პოლიტიკური ბარიერია.
_ კანონი არსებობს ყველასთვის. იქ არც კონკრეტულ პარტიაზე და მით უფრო, არც კონკრეტულ პიროვნებაზეა საუბარი და არც შეიძლება იყოს.
_ თქვენ ხმა მიეცით ამ ცვლილებებს. აქედან გამომდინარე, ალბათ, სამართლიანად და დემოკრატიულად მიიჩნევთ მათ, თუმცა, ექსპერტების დიდი უმრავლესობის აზრით, ეს ცვლილებები ადამიანის ფუნდამენტურ უფლებებს ლახავს.
_ გთხოვთ, შეკითხვა დააკონკრეტოთ _ კონკრეტულად, “მოქალაქეთა პოლიტიკური გაერთიანებების შესახებ” საქართველოს ორგანულ კანონში გახორციელებულ რომელ ცვლილებას, ან საქართველოს ორგანული კანონში “საქართველოს საარჩევნო კოდექსში” გახორციელებულ რომელ ცვლილებას ან საქართველოს კონსტიტუციაში 2011 წლის დეკემბერში გახორციელებულ რომელ ცვლილებას გულისხმობთ.
_ არასამთავრობო ორგანიზაციებისა და მედიის წარმომადგენლების პეტიციაში საუბარია იმაზე, რომ “საკანონმდებლო ცვლილებები ბუნდოვანია, იძლევა ფართო ინტერპრეტაციის საშუალებას, არ არის ადვილად შესრულებადი და განჭვრეტადი, არ უზრუნველყოფს თანაბარ პირობებს პოლიტიკური სუბიექტებისთვის”.
_ ყოველივე ეს წმინდა იურიდიული მსჯელობის საგანია. აღნიშნულზე სპეციალისტებს, იურისტებს, საპარლამენტო უმრავლესობას, უმცირესობას, პარტიებს, საზოგადოებას თავიანთი არგუმენტირებული პოზიცია გააჩნიათ და რაზეც დებატები, კონსულტაციები მხარეებს შორის ამჟამადაც მიმდინარეობს.
_ დაუბრუნებენ თუ არა ბიძინა ივანიშვილს აპრილში საქართველოს მოქალაქეობას, ფლობთ თუ არა ამ საკითხის შესახებ რაიმე ინფორმაციას?
_ არ ვიცი, მსგავს ინფორმაციას არ ვფლობ.
