თემურ სალუქვაძე: “ისტორიულ მემკვიდრეობას ბულდოზერებით მიწა მიაყარეს!”
მანანა ლომაძე: “განა მარტო ოზურგეთში იპოვეს აბანოების ნაშთები, გურიაში, სხვა ადგილზეც იპოვეს”!
ჩვენი წყაროს ინფორმაციით, ქალაქ ოზურგეთში, იქ, სადაც იუსტიციის სახლს აშენებენ, გურიელების სასახლის და რომაული აბანოს ნაშთები აღმოაჩინეს. როგორც წყარომ გვითხრა, ამის გამო თბილისიდან სპეციალისტებიც იყვნენ ჩამოსული, მაგრამ ამ ინფორმაციას ადგილობრივი ხელისუფლების წარმომადგენლები, ჩვენთან საუბრის დროს, არ ადასტურებენ. ოზურგეთელი ისტორიკოსი, აწ გარდაცვლილი ენვერ გოგუაძე, ათეული წლების წინ ამბობდა, რომ ამ ადგილზე გურიელების სასახლის ან რომაული აბანოების ნაშთები იყო.
“ოზურგეთის ცენტრალურ ქუჩაზე, უფრო კონკრეტულად, იუსტიციის სახლის მშენებლობის ადგილზე, ისტორიული წყაროების მიხედვით, გურიელის ციხე-სიმაგრე უნდა ყოფილიყო. ასევე, ორი აბანო: ერთი გურიელის სასახლესთან მდებარე და მეორე წინარე ანტიკური ხანის, მომდევნო პერიოდით დათარიღებული. მიმდინარე მშენებლობისას აღმოჩენილ იქნა სწორედ ზემოთ ნახსენები ძველი ისტორიული ნანგრევების ნაშთები, რასაც ადგილობრივი ხელისუფლების მხრიდან არანაირი რეაგირება არ მოჰყოლია. პირიქით, მათ ქართველ ხალხს დაუმალეს ეს მნიშვნელოვანი მოვლენა და ძველ ისტორიულ მემკვიდრეობას ბულდოზერებით მიწა მიაყარეს”, _ ეს განცხადება გურიის თავისუფალი დემოკრატების ლიდერმა თემურ სალუქვაძემ გასული კვირის პარასკევს გამართულ ბრიფინგზე გააკეთა.
მისი თქმით, პარტიის წარმომადგენლები ადგილზე იყვნენ მისული და ფოტოგადარებით დააფიქსირეს ძველი ისტორიული ნაშთების არსებობა.
“ამ ფაქტით კიდევ ერთხელ დამტკიცდა, ჩვენ მიერ მრავალჯერ გაჟღერებული აზრი იმის შესახებ, რომ აღნიშნული მშენებლობის ადგილი თავიდანვე არასწორად იქნა შერჩეული. ეს არის კიდევ ერთი დამატებითი არგუმენტი იმისა, რომ ზოგადად სამშენებლო ობიექტების ადგილის შერჩევა არ ხდება სწორად, არ ხდება ქალაქის განვითარება შესაბამისად და კომპეტენტური გეოლოგების დასკვნების საფუძველზე. ამ ხელისუფლებას სურს, წარსულის მოსპობით მომავალი ააშენოს, რაც არაკანონზომიერია და ბუნებაში არ ხდება. აღშფოთებას გამოვთქვამთ იმ ფაქტის გამო, რომელმაც კიდევ ერთხელ დაგვანახა ჩვენი ხელისუფლების დაუდევარი და უზნეო ბუნება, ამჯერად ისტორიული მემკვიდრეობის მიმართ უღირსი დამოკიდებულების გამოვლენით”, _ აღნიშნა ბრიფინგზე სალუქვაძემ.
“თავისუფალი დემოკრატები” მოუწოდებენ ადგილობრივი მხარეთმცოდნეობის მუზეუმის სპეციალისტებს, აქტიურად ჩაერთონ ამ საკითხის შესწავლაში, მოძიებასა და საზოგადოებისთვის ინფორმაციის მიწოდებაში. ასევე, მიმართავენ ადგილობრივ ხელისუფლებას, სასწრაფოდ საქმის კურსში ჩააყენონ ყველა შესაბამისი უწყება, რათა მოხდეს რეაგირება; _ ჩვენ ჯერ არ ვიცით, რა ისტორიულ ღირებულებასთან გვაქვს საქმე. შესაძლოა, ეს იყოს უნიკალური ისტორიული მემკვიდრეობა, ამიტომაც მოვითხოვთ, აღნიშნული მოვლენა შესაბამისი სამსახურებისა და პროფესიონალების მიერ იქნას შესწავლილი.
როგორც “გურია ნიუსს” ოზურგეთის ისტორიული მუზეუმის ფონდების მთავარმა მცველმა მანანა ლომაძემ უთხრა, მარტო ოზურგეთში კი არა, აბანოების ნაშთები გურიაში სხვა ადგილზეც არის ნაპოვნი: “მინახავს ძველი ფოტოები. განა მარტო ოზურგეთში იქნა ეს აბანოები ნაპოვნი, გურიაში სხვა ადგილზეც იპოვეს. მე ვმუშაობ მაგ მასალებზე. თუკი წითელი აგური ჩანს ფოტოზე, არის აბანოს ნაშთები. მე შემიძლია დავამტკიცო, რომ უშუალოდ მშენებლობის ქვეშ არაფერი არ არის. ეტყობა, ეს ნაშთები განადგურდა სხვა დროს და არა ამ იუსტიციის სახლის მშენებლობის დროს. შესაძლოა, 1958 წელს, როცა იზაბელას მშენებლობა მიმდინარეობდა და რომელიც 1978 წელს დაანგრიეს, მაშინ დაზიანდა”, _ გვითხრა მანანა ლომაძემ.
_ ქალბატონო მანანა, “თავისუფალი დემოკრატები” ამბობენ, რომ იქ გურიელების სასახლის ნაშთებია.
_ გეტყვით სიმართლეს. სანამდე შემოიფარგლებოდა ტერიტორია, ვიდეოთვალი დამონტაჟდებოდა და სამშენებლო სამუშაოები დაიწყებოდა, მიდიოდა მიწის სამუშაოები. მე და მუზეუმის დირექტორი ხშირად ჩავდიოდით და ვნახულობდით. ცალ მხარეს ხუთ მეტრზე გაითხარა და არაფერი არ იქნა ნაპოვნი, მეორე მხარეს სამ მეტრზე გაითხარა და არც იქ იქნა ნაპოვნი. მე მშენებელს ვუთხარი მაშინ, რომ აქ შესაძლებელია, იყოს ან აბანოთა ნაშთები ან გურიელის სასახლის ნაშთები, მაგრამ იმ ტერიტორიაზე, სადაც მიწის სამუშაოები შესრულდა, ნამდვილად შემიძლია დამტკიცება, რომ არაფერი აღმოჩენილა. ამბობენ, რომ ნაპოვნია რომაული აბანოს ნაშთები. შიგნით, რაკიღა დახურულია მშენებლობა, არ შეგვიშვეს. მე არ მაქვს ფოტოები და არ ვიცი, ახლა რა აღმოაჩინეს. ამდენად მე მინდოდა დაწერა, მასალები მოვამზადე, მაგრამ ვეძებ იმ ფოტოებს, რაც გადაიღეს, რომ მივხვდე რა აღმოჩნდა, თუმცა ეს ფოტოები ჩემთვის მიუწვდომელია. როცა ჩამივარდება ხელში, ნამდვილად დავწერ აღნიშნულზე.
_ ქალბატონო მანანა, ბრიფინგზე წარმოადგინეს ფოტო და ვიდეო მასალა, თუმცა, ჩვენ ვერ ვიტყვით, რა შეიძლება იკითხებოდეს აღნიშნულ ფოტოებზე.
_ თუკი წითელი აგური ჩანს და თაღის მაგვარი, ან ოთხკუთხედი ბოძები სვეტებზე დგას, ეს არის აბანოს პირველი სართული. თუკი ეს ყველაფერი ჩანს მაგ ფოტოზე, მაშინ არის აბანოს ნაშთები.
_ ქალბატონო მანანა, ფოტოზე ჩანს წითელი აგურის ნაშთები, თუმცა, ბოძები და სვეტები _ არა.
_ ჰოდა, ალბათ, ეს არის აბანოს ნაშთი, მაგრამ სადაც შენობაა აშენებული, იქ არაფერი არ არის. მე შემიძლია დავამტკიცო, რომ უშუალოდ მშენებლობის ქვეშ არაფერი არის. ეტყობა, ეს ნაშთები განადგურდა სხვა დროს და არა ამ იუსტიციის სახლის მშენებლობის დროს. ერთ ზოლზე, რომელზეც საუბარია, და მუზეუმის მხარეს გადის, ამ ზოლზე, მე არ ვიცი, რა მოხდა.
_ “თავისუფალი დემოკრატები” მოუწოდებენ შესაბამის სამსახურებს, აქტიურად ჩაერთონ ამ საკითხის შესწავლაში.
_ ჩემზე კარგად იცის ადგილობრივმა ხელისუფლებამ, რა მოხდა.
როგორც გურიის გუბერნატორის მოადგილემ ლელა თავართქილაძემ გვითხრა, აღნიშნულ საკითხთან დაკავშირებით, ამ ეტაპზე კომენტარის გაკეთება არ შეუძლია, რადგან არ აქვს მსგავსი ინფორმაცია: _ ბუნებრივია, ჭორების დონეზე ამ თემაზე ვერ ვისაუბრებთ. ჩვენ მივესალმებით, თუ ასეთი რამ დადასტურდება. ეს, ბუნებრივია, საჯარო გახდება და ყველაფერს გავაკეთებთ, რომ პროცესებს შემდგომი მსვლელობა მივცეთ, _ გვითხრა მან.
“გური ნიუსი” შეეცადა, ოზურგეთის მხარეთმცოდნეობის მუზეუმის საზოგადოებასთან ურთიერთობის სამსახურის მთავარ სპეციალისტს მარიკა ჯაყელს დაკავშირდებოდა, თუმცა, მას ტელეფონი გამორთული ჰქონდა.
