“წელს ზემოთ გამხადეს და ისე შემამომწეს”

ოზურგეთის მუნიციპალიტეტში, კონტოლის პალატის სახელით უკვე ჩამოართვეს ახსნა-განმარტებები ექვს მოქალაქეს. აღნიშნულმა პირებმა უკვე დატოვეს ოზურგეთის მუნიციპალიტეტის ადმინისტრაციული შენობის ტერიტორია. აღსანიშნავია, რომ აქედან ერთი არც ერთი პარტიის წევრი არ არის. როგორც ერთ-ერთმა დაკითხულმა მოქალაქემ ჟანა მეგრელიშვილს უთხრა, ის თითქმის საცვლების ამარა დატოვეს. რის გამოც შენობიდან გამოსვლის შემდეგაც უხერხულობას განიცდიდა.

_”წელს ზემოთ გამხადეს და ისე შემამოწმეს. ვინც ახსნა-განმარტება ჩამომართვა, კახა საჯაიათი გამეცნო. მკითხა, რას ვსაქმიანობდი, არა მარტო მე, არამედ ჩემი ოჯახის თითოეული წევრი. შიგადაშიგ მაფრთხილებდა, თუ რაიმეს დავმალავდი და არ ვიტყოდი, ეს ჩემს საწინააღმდეგოდ იქნებოდა გამოყენებული მას შემდეგ, რაც პროკურატურაში დამიბარებენ. სულ ათამდე ხელწერა შევაგროვე, არ დამიმალავს და ვუთხარი. იმდენად საშიშიხ ხდება უკვე ეს გარემო, ხანდახან ოჯახის წევრზე მიმაქვს ეჭვი, ხომ არ გამცემსო. ერთი და იგივე შინაარსის კითხვებს სხვადასხვა ინტერპრეტაციით მისვამდნენ. მე ამ ყველაფერს ფსიქოლოგიურ ზეწოლად შევაფასებდი”, _ გვითხრა ქალბატონმა, რომელმაც ვინაობის საჯაროდ გამხელა, მხოლოდ იმ მიზეზით არ ისურვა, რომ მისი ახლობელი ერთ-ერთი საჯარო სკოლის პედაგოგია.

რესპუბლიკური პარტიის წევრი სოსო წიტაიშვილი, დაახლოებით, 30 წუთის განმავლობაში ადვოკატის თანდასწრებით იკითხებოდა. მისი თქმით, მასაც იმ შინაარსის კითხვები დაუსვეს, რაც სხვა მოქალაქეებს. როგორც მან გვითხრა, მის მიმართ არანაირ ზეწოლას არ ჰქონია ადგილი. აღსანიშნავია, რომ “გურია ნიუსის” ჟურნალისტებს ადმინისტრაციულ შენობაში შესვლის უფლებას ამ დრომდე არ აძლევენ. დაკითხვის მოლოდინში მყოფი მოქალაქეები კი ღია ცის ქვეშ, დაცვის პოლიციისგან გამოძახების ბრძანებას ელოდებიან.