“საქართველოს ახალგაზრდა იურისტთა ასოციაციის” ადვოკატები ოთხი დღის განმავლობაში იმ ადამიანების უფლებებს იცავენ, რომლებიც კონტროლის პალატამ დაიბარა დაკითხვაზე. საია-ს ოზურგეთის ოფისის იურისტი ჯაბა ზერეკიძე “გურია ნიუსთან” იმ დარღვევებზე საუბრობს, რომელსაც გურიის რეგიონში ამ დაკითხვებზე ჰქონდა ადგილი.
_ ჩვენ მოგვმართა რამდენიმე ადამიანმა, რომლებიც დაბარებულები იყვნენ კონტროლის პალატის დაკითხვაზე. ჩვენ გავაკეთეთ ყველაფერი, რომ დაგვეცვა მათი ინტერესები. იმ ოთახში სანამ შეხვალ, სადაც ხდება ახსნა-განმარტებების ჩამორთმევა, აუცილებლად არის გარკვეული პროცედურები გასავლელი _ ხდება ჩხრეკა, დეტექტორებით შემოწმება, ყველა ნივთის დატოვება, ასევე, ფეხსაცმლის და ტანსაცმლის გახდა _ ასეთი ფაქტი, რამდენიმე დღის წინ ჩოხატაურშიც მოხდა. შემდეგ ხდება გასაუბრება, შევდივარ ოთახში პიროვნებებთან, რომლებიც უშუალოდ ატარებენ ამ გასაუბრებას, როგორც ისინი აცხადებენ, ადმინისტრაციულ წარმოებას სამართალდარღვევათა კოდექსის შესაბამისად. ჩემი პირველი კითხვა არის ის, რომ უფლებამოსილება გააჩნია თუ არა ამ პიროვნებებს, რომლებიც ატარებენ ამ ადმინისტრაციულ წარმოებებს და ვთხოვ, მათი უფლებამოსილების დამადასტურებელ რაიმე სახის საბუთს. სამწუხაროდ, ორი დღის განმავლობაში, არანაირი საბუთი არ წარმოუდგენიათ. მოქალაქეები დაბარებულები არიან მოჩვენებით, თვალთმაქცური გარიგების ფაქტთან დაკავშირებით წარმოებულ საქმეზე. ასეთი მუხლი ადმინისტრაციულ სამართალდარღვევათა კოდექსში არ მოიპოვება. ამიტომ, ჩვენ ვითხოვთ განმარტებას _ თუ პირი დაბარებულია და წარმოება მიმდინარეობს ხსენებული კოდექსის შესაბამისად, კონკრეტულად, რომელი მუხლით არის ის პასუხისგებაში მიცემული ან შეიძლება იქნეს მიცემული. თუმცა, ამის თაობაზე არ გვაძლევენ განმარტებას და გვეუბნებიან, რომ მიმართეთ კონტროლის პალატასო.
ჯაბა ზერეკიძის თქმით, კანონის ფარგლებში, ამ დაკითხვას, შესაძლებელია, დაესწროს ნებისმიერი დაინტერესებული პირი, ასევე, ჟურნალისტები: _ ჩვენ გვაქვს მოთხოვნა, ღიად ჩატარდეს დაკითხვები, მაგრამ ამაზეც უარყოფითი პასუხს ვიღებთ. კიდევ ერთი საინტერესო ფაქტი _ არც მე და არც დაბარებულ მოქალაქეებს, არ გვეძლევა საშუალება, მოქალაქის წერილობით ახსნა-განმარტებაში დავაფიქსირო ზემოთ აღნიშნულ საკითხებთან დაკავშირებით შენიშვნა.
_ როგორც ვიცი, ამ საკითხთან დაკავშირებით, ხმამაღალი საუბარი იყო კონტროლის პალატის წარმომადგენლებთან, დაკითხვის დროს.
_ კი, როცა მოვითხოვე ჩატარებულიყო ადმინისტრაციული წარმოება, ღიად განმიცხადეს, რომ თქვენ გინდათ მასკარადი მოაწყოთ და ვიღაც-ვიღაცეები აქ დაესწროს ამ გამოკითხვასო. შემდეგ ისინი ანერვიულდნენ, რომლებიც ჩვენ გაგვეცნენ, როგორც კონტროლის პალატის თანამშრომელი.
_ იყო თუ არა ოზურგეთში ისეთი შემთხვევა, როდესაც მოქალაქემ ადვოკატის აცილება მოითხოვა?
_ როგორც მახსოვს, “თავისუფალი დემოკრატებმა” გვთხოვეს, დაგვეცვა მოქალაქის უფლებები. როდესაც იქ მივედი და უნდა დაწყებულიყო დაკითხვა, ამ მოქალაქემ უარი განაცხადა იურისტის დასწრებაზე და აცილება გააკეთა.
