“ჩვენი დანაზოგებით მოვხატოთ შემოქმედის სამების ხატი”

_ ასე ჰქვია პროექტს, რომელსაც “პრივატბანკის” ოზურგეთის სერვისცენტრი, გაზეთები: “გურია ნიუსი”, “გურიის მოამბე”, “ჰო და არა” და საქართველოს საპატრიარქოს შემოქმედის ეპარქია ერთობლივად განახორციელებენ.

პროექტის პრეზენტაცია გასულ შაბათს გაიმართა. როგორც შემოქმედელმა მიტროპოლიტმა იოსებმა ბრძანა, შემოქმედი ეწოდება ყოვლად წმიდა სამებას: მამას, ძეს და სულიწმიდას. მრწამსი ასე იწყება _ მწამს ერთი ღმერთი, მამა ყოვლისა მპყრობელი, შემოქმედი ცისა და ქვეყანისა, ხილულთა ყოველთა და არახილულთა.

“ამ ხატის დაწერა ისეთივე მნიშვნელოვანია, როგორც საკათედრო ტაძრის აგება. მართლაც, საამაყოა ის, რომ გურიის ეპარქიას ეწოდება ღმერთის ანუ ყოვლად წმიდა სამების სახელი. ეს იგივეა, რომ ჩვენს ეპარქიას ჰქვიოდეს ყოვლად წმიდა სამების ეპარქია. ამიტომ გადავწყვიტეთ, შეგვექმნა შემოქმედის სამების ხატი. ვფიქრობდით, როგორ დაგვეწყო. სრულიად გამოუცდელები ვართ ჩვენ ამ საქმეში და ძალიან გამიხარდა ბატონი ლევან ჩხაიძის შემოთავაზება. ამ ხატის დაწერა, ძალიან დიდი საქმეა ყველა ჩვენგანისთვის, რაც დიდ მადლს და წყალობას მოგვიტანს. ამ საქმეში მონაწილეობა უნდა მიიღოს მთელმა გურია და მთელმა საქართველომ, რამეთუ წმიდა სამების ხატს ვხატავთ. რაც უფრო ადრე დაიწერება ეს ხატი, მით უკეთესია. თუ ადამიანებს არ აქვთ ფინანსური საშუალება, მაგრამ შეიძლება ვერცხლი, ოქრო, ძვირფასი თვლები შემოწირონ. ვფიქრობ, მინიმუმ, 5 კილოგრამი ოქრო დასჭირდება მოხატვას. ეს ხატი უნდა იყოს ოქროსი, რადგან ღმერთის ხატი იხატება, რომელიც დაბრძანდება ოზურგეთის საკათედრო ტაძარში. მე მგონია, რომ ამას შევძლებთ, საქართველომ თუ კი შეძლო და წმიდა სამების ტაძარი ააშენა ამ გაჭირვების დროს, არ მგონია, რომ ჩვენ ვერ შევძლოთ ამ ხატის დახატვა. ღმერთი შეგვეწევა და დაგვეხმარება, _ ბრძანა შემოქმედელმა მიტროპოლიტმა იოსებმა.

პროექტის მიზანია, ეკლესიისთვის დახმარების გაწევა სამოქალაქო საზოგადოების საკუთარი დანაზოგების საშუალებით, პარტნიორი მედია საშუალებებით და “პრივატბანკის” ხელშეწყობით.

“პრივატბანკის” ოზურგეთის სერვისცენტრის მმართველის ლევან ჩხაიძის თქმით, პროექტის ამოცანაა, შეიქმნას და მოიხატოს შემოქმედის სამების ხატი, ზომით 2მX3მ.

მისივე თქმით, თითოეულ მოქალაქეს, რომელსაც სურვილი ექნება მიიღოს პროექტში მონაწილეობა, განათავსებს ანაბარს “პრივატბანკში” და ხელშეკრულების გაფორმებისას მიუთითებს ანაბარზე ბანკიდან მისაღები სარგებლის მოცულობას, ფონდის ანგარიშზე, მინიმუმ, 5 ერთეულით: _ ამ შემთხვევაში, მოქალაქეს, ასე ვთქვათ, “დანაკარგი” არ გააჩნია _ ანაბრის განთავსების პერიოდის ბოლოსთვის იგი სრულად მიიღებს განთავსებულ თანხას. ხოლო, გამომუშავებული პროცენტებით წვლილს შეიტანს შემოქმედის სამების ხატის შექმნაში. აღნიშნული სქემა მოსახერხებელია მოსახლეობისთვის იმდენად, რამდენადაც “პრივატბანკს” გააჩნია ანაბრების ისეთი სახეობები, რომლებიც ხელმისაწვდომია ნებისმიერი სოციალური სტატუსის მქონე პირისთვის, _ გვითხრა ლევან ჩხაიძემ.

ხატის შექმნის პროცესში, ეპარქიის თითოეული მოქალაქის მიერ შეტანილი იქნება წვლილი, რომლითაც პროექტი საყოველთაო ხასიათს მიიღებს. “პრივატბანკი” პროექტში მიიღებს მონაწილეობას შემდეგი სქემით: ანაბრის საერთო მოცულობის 0,3%-ს ბანკი ფონდის ანგარიშზე გადარიცხავს. მნიშვნელოვანი მოცულობის მქონე ანაბრების შემთხვევაში, “პრივატბანკი” დამატებით 1%-ს დაუმატებს პროგრამაში მონაწილეობისთვის. პარტნიორი მედიასაშუალებები, კი თვეში ორჯერ, პროექტის შესახებ საზოგადოებას ინფორმაციას მიაწვდიან.