გურიის გუბერნატორის მოადგილე, ლელა თავართქილაძე “გურია ნიუსთან” საუბარში, ოზურგეთში, იუსტიციის სახლის მშენებლობისას, უძველესი აბანოების ნაშთების აღმოჩენას და, სავარაუდოდ, მისი დაზიანების საფრთხეს, ჭორს უწოდებდა, თუმცა, მინისტრმა რამაზ ნიკოლაიშვილმა, 30 მარტს, მას ამ ინფორმაციის ოფიციალურად დადასტურება მოსთხოვა: “ლელა, ამ ფაქტთან დაკავშირებით, ნებისმიერ ინფორმაციას ჟურნალისტებს მიაწვდი”, _ უთხრა მინისტრმა თავართქილაძეს და ეს უკანასკნელიც დაეთანხმა.
ცოტა ხნის წინ “გურია ნიუსი” წერდა, რომ ოზურგეთის ცენტრალური მოედნის რეაბილიტაციის პროცესში მშენებლებმა უძველესი აბანოს ნაშთებს მიაკვლიეს.
საქართველოს რეგიონული განვითარებისა და ინფრასტრუქტურის მინისტრის, რამაზ ნიკოლაიშვილის და საქართველოს კულტურული მემკვიდრეობის დაცვის ეროვნული სააგენტოს გენერალური დირექტორის, ნიკოლოზ ვაჩეიშვილის თქმით, უკვე დაგეგმილია ახალი აღმოჩენის დეტალური შესწავლა, რომლის შედეგად ძველი აბანოს აშენების ზუსტი თარიღის დადგენა გახდება შესაძლებელი. თანამედროვე არქიტექტურული ნაგებობების, ამ შემთხვევაში, იუსტიციის სახლის მშენებლობისას გამოვლენილი ისტორიული მემკვიდრეობა, მიწისქვეშა ძეგლები სახელმწიფოს მიერ დაცული და შენარჩუნებული იქნება.
ამ საკითხთან დაკავშირებით, ადრე თბილისიდან სპეციალისტებიც იყვნენ ჩამოსული, მაგრამ მაშინ ინფორმაციას ადგილობრივი ხელისუფლების წარმომადგენლები “გურია ნიუსთან” არ ადასტურებდნენ, უფრო მეტიც, მათ ეს ინფორმაცია უარყვეს. ათეული წლების წინ, ამ ადგილზე გურიელების სასახლის ან რომაული აბანოების ნაშთების არსებობას, აწ გარდაცვლილი ოზურგეთელი ისტორიკოსი ენვერ გოგუაძეც აღნიშნავდა.
ეს ფაქტი “თავისუფალი დემოკრატების” ლიდერმა, თემურ სალუქვაძემ გაახმაურა. მან ადგილობრივი მხარეთმცოდნეობის მუზეუმის სპეციალისტებს სთხოვა, აქტიურად ჩართულიყვნენ ამ საკითხის შესწავლაში, მოძიებასა და საზოგადოებისთვის ინფორმაციის მიწოდებაში.
“ბუნებრივია, ჭორების დონეზე ამ თემაზე ვერ ვისაუბრებთ”, _ უთხრა მაშინ “გურია ნიუსს” გურიის გუბერნატორის მოადგილემ, ლელა თავართქილაძემ.
