ეს ინფორმაცია “გურია ნიუსს” შპს “მედალფას” გენერალურმა დირექტორმა, ზაზა ჯაფარიძემ და მისმა მოადგილემ, ლევან ანთაძემ დაუდასტურეს. მათი თქმით, გურიაში მოქმედი ყველა სამედიცინო დაწესებულება სახელმწიფომ მართვაში კერძო კომპანიას გადასცა და ამ კომპანიამაც სახელმწიფოს წინაშე აიღო ვალდებულება.
აღნიშნულმა ცვლილებამ, გურიის რეგიონის სამივე მუნიციპალიტეტის სოფლების ამბულატორიებში მომუშავე ფიზიკური პირების უკმაყოფილება გამოიწვია. ცვლილების შესახებ სოფლის ექიმებს ზაზა ჯაფარიძემ განუცხადა. თუმცა, მედიცინის მუშაკებმა ხელშეკრულებებს ხელი არ მოაწერეს, უფრო მეტიც, გაფიცვის მოწყობა გადაწყვიტეს იმ მიზეზით, რომ ხელფასი ნაკლები ექნებოდათ და ყველაზე დაზარალებულები, ამ შემთხვევაში, ექთნები დარჩებოდნენ.
ვითარების განმუხტვას გურიის გუბერნატორი, ვალერი ჩიტაიშვილი ცდილობდა. ლევან ანთაძის თქმით, გუბერნატორი ექიმებს და ექთნებს შეპირდა, რომ სიტუაციაში გაერკვეოდა და მათ ხელფასები არ მოაკლდებოდათ. თუმცა, გაუგებარია, რა შუაშია კერძო კომპანიასთან გუბერნატორი!
“გურია ნიუსს” არა ერთი განაწყენებული ექიმი და ექთანი ესაუბრა:
_ არ ვიცით, რა ხდება. თქვეს, ჯერ გადაწყვეტილი არაფერი არ არისო. ჩამოსულები იყვნენ შპს “მედალფას” მმართველები და გვითხრეს, პირველი აპრილიდან დაექვემდებარებით “შპს მედალფას” და იქნებით ჩვენი თანამშრომლებიო. ოზურგეთის მუნიციპალიტეტის სოფლების ექიმები 2 საათზე ვიყავით დაბარებული. დილით იყვნენ ლანჩხუთის და ჩოხატაურის წარმომადგენლები. იყო გუბერნატორიც. ჯერჯერობით, ვართ ადგილზე და ველოდებით, რას დაგვირეკავენ, _ გვითხრეს ექიმებმა.
_ გადავყავართ მათ დაქვემდებარებაში, ექთნების ხელფასი მცირდება, კარგს არაფერს ველოდებით. ჯერჯერობით, მხოლოდ დაპირების იმედად ვართ და არ ვიცით, რა იქნება, _ ამბობენ მედდები.
ალეკო თავბერიძე, ოზურგეთის მუნიციპალიტეტის ნარუჯის ექიმი: _ სოფლის ამბულატორიები სამართავად გადასცეს კერძო კომპანიას. შპს “მედალფამ” განაცხადა, შესაძლებლობა არ გვაქვს, იმ ფინანსებიდან, რომელსაც ამბულატორიებისთვის გვირიცხავენ, მოგცეთ ხელფასიო. “მედალფამ” ის თანხაც შეგვიმცირა, რომელსაც სადაზღვევო კომპანიები გვიხდიდნენ _ თავიდან იყო 60 თეთრი, მერე 48 თეთრამდე შეამცირეს, ბოლოს 12 თეთრი გახდა და ახლა საერთოდ გააუქმეს. ვუთხარით, რომ არ მოგვწონს ეს პირობები. არც ჩვენ გვინდოდა ის, რაც მოხდა, მაგრამ დაგვავალეს და რა ვქნათ, ჩვენ კერძო სტრუქტურა ვართ და მეტს ვერაფერს შემოგთავაზებთო, _ გვითხრეს.
_ ბატონო ალეკო, ეს ვინ გითხრათ?
_ ეს სიტყვები, ჩვენთან შეხვედრისას, ზაზა ჯაფარიძემ თქვა. რატომ დარჩა ასე ჰაერში გამოკიდებული სოფლის ამბულატორიები? ყველა ქვეყანაში ძირითადი აქცენტი სოფლის ამბულატორიებზეა გადატანილი _ ასე კვალიფიციური დახმარება ეწევა პაციენტს. ეს პირველი რგოლი ჩვენთან “მოიქნიეს”. ვერ გეტყვით, რატომ. ამასთან დაკავშირებით გაფიცვის მოწყობაც გადაწყვიტეს. ახალი ხელშეკრულებები უნდა გაფორმებულიყო, “მედალფასთან” შეერთების გამო და ამ ყველაფერმა აღშფოთება გამოიწვია. ექიმებმა და ექთნებმა არ მოაწერეს ხელი. ბატონი გუბერნატორიც იქ იყო, რომელმაც განაცხადა, დაწყნარდით, გვადროვეთ და ყველაფერს გავარკვევთო.
_ თქვენი აზრით, მოაწერენ თუ არა ექიმები ხელს ახალ ხელშეკრულებას?
_ ჯერ ხელი არავის მოუწერია. ველოდებით, რა იქნება, წინასწარ ვერაფერს გეტყვით.
აღნიშნულ საკითხთან დაკავშირებით, “გურია ნიუსმა” რამდენჯერმე სცადა ვალერი ჩიტაიშვილთან დაკავშირება, თუმცა, ჩვენს სატელეფონო ზარებს გუბერნატორმა, როგორც ამ ბოლო დროს წესად ექცა, არ უპასუხა.
“გურია ნიუსი” დაუკავშირდა სადაზღვევო კომპანია “ალფას” და ჯანდაცვის სამინისტროს პრესსამსახურებს, რომლებმაც ჩვენს კითხვებს მოუსმინეს და გვითხრეს, რომ სიტუაციაში გაერკვეოდნენ და მოგვიანებით დაგვირეკავდნენ. თუმცა, ისინი არ შეგვეხმიანენ და არც ჩვენს სატელეფონო ზარებს აღარ უპასუხეს.
შპს “მედალფას” გენერალური დირექტორი, ზაზა ჯაფარიძე “გურია ნიუსთან” საუბარში აღნიშნავს, რომ ყველაფერი დარჩება ისე, როგორც იყო:
_ ყველაფერი არის ისე, როგორც იყო, ოღონდ მართვაში გადმოეცა კერძო კომპანიას. ცნობილია, რომ კერძო კომპანია უკეთ მართავს სტრუქტურას, ვიდრე _ სახელმწიფო.
_ ანუ, თქვენ უკეთესი მენეჯმენტი გაქვთ, ვიდრე სახელმწიფოს?
_ რა თქმა უნდა. აბა, რატომ გადმოგვეცა სასწრაფო? იმიტომ, რომ მენეჯმენტს უკეთესად აწარმოებენ კერძო კომპანიები. ამას კი არ ვიგონებ _ ეს არის ცნობილი ფაქტი. ასე ხდება ბევრ სფეროში.
_ ბატონო ზაზა, მაშინ რატომ აპროტესტებენ ექიმები და ექთნები ამ გადაწყვეტილებას? თქვენი აზრით, მათ არ იციან, კერძო კომპანიაში უკეთესი პირობები არის თუ არა?
_ ამას დრო უნდა, რომ გაიგონ. თავიდან ადამიანი ხანდახან ვერ იგებს იმას, რასაც სთავაზობენ. ეს არის აბსოლუტურად სწორი გადაწყვეტილება სახელმწიფოს მხრიდან. ჩვენ მივესალმებით ამას.
_ ბატონო ზაზა, თქვენ ექიმებს შეხვედრაზე განუცხადეთ, რომ ჩვენც არ გვინდოდა ეს მომხდარიყო, მაგრამ დაგვავალეს და მეტი გზა არ გვაქვსო… ადასტურებთ თუ არა ამ ინფორმაციას და იქნებ, გვითხრათ, ვინ დაგავალათ?
_ ვინ დაგვავალა და სახელმწიფომ _ ეს იყო სახელმწიფოს ნება. პირველი აპრილიდან სოფლის ექიმების ინსტიტუტი იქნება კერძო კომპანიის ქვემდებარე, _ გვითხრა ჯაფარიძემ.
“გურია ნიუსი” აღნიშნულ საკითხთან დაკავშირებით, შპს “მედალფას” გენერალური დირექტორის მოადგილეს, ლევან ანთაძესაც ესაუბრა:
_ სოფლის ამბულატორია ისევ ისე მოემსახურება სოფელს, როგორც ადრე. არაფერი არსად არ გადასულა _ რასაც სახელმწიფო უკვეთავდა ფიზიკურ პირებს, ექიმებს და ექთნებს, უშუალოდ გურიის რეგიონში, ისე შეუკვეთავს შპს “მედალფა” მათ. ჩვენ ვიქნებით ვალდებული სახელმწიფოს წინაშე ჯანდაცვის საქმიანობაზე, თუმცა, სახელმწიფო პროგრამა რჩება ისევ ისე.
_ ბატონო ლევან, ექიმები და ექთნები განაწყენებულები არიან. მათ, პროტესტის ნიშნად, გაფიცვის მოწყობაც გადაწყვიტეს, არ მოაწერეს ხელშეკრულებებს ხელი, სიტუაცია კი ჩიტაიშვილმა განმუხტა…
_ გაფიცვის რა მოგახსენოთ, უკმაყოფილება კი ექთნების მხრიდან ნამდვილად იყო, რადგან მათ შეიძლებოდა შეხებოდათ ხელფასის კლება. 75 ამბულატორიაა და მათ მართვას, ელემენტარულად, სჭირდება ხარჯები, რომელიც გაწერილი არ არის. თვითონ პროგრამის არსი მოიცავდა ფიზიკური პირების შეკვეთის მიცემას და შესრულებას. მცირდებოდა ექთნის ხელფასი, მაგრამ მათ შორდებოდათ კომუნალური გადასახადები. ამიტომ ექთნების მხრიდან, ნამდვილად იყო უკმაყოფილება. მოვიდა გუბერნატორიც, რომელიც დაპირდა მედპერსონალს, რომ სიტუაციას გაარკვევდა. სთხოვა მათ, თავი შეეკავებინათ ასეთი ხმაურისგან და ექთნებს რომ დღეს ხელფასები არ უმცირდება, ეს ჩიტაიშვილის აქტიური ჩარევის შედეგი და დამსახურებაა (?).
_ ესე იგი, ექთნებს და ექიმებს ხელფასი არ შეუმცირდებათ?
_ არა, ყველაფერი ისე დარჩება, როგორც იყო. ასევე იქნება ლანჩხუთისა და ჩოხატაურის მუნიციპალიტეტებშიც.
_ თქვენი აზრით, სიტუაცია დარეგულირებულია?
_ სამედიცინო ცენტრში დასარეგულირებელი არაფერი არ ყოფილა და არ არის. ყველაფერი დარეგულირებული და მოწესრიგებულია. ისეთი მომსახურება, როგორსაც გურიის მოსახლეობა ჩვენს ახალ სამედიცინო ცენტრში იღებს, დასავლეთ საქართველოში სხვაგან არსად არის.
