კოალიცია “ქართული ოცნების” ოფისი ოზურგეთში, 10 აპრილს ამავე კოალიციის საინიციატივო ჯგუფის წევრმა მანანა კობახიძემ, “თავისუფალი დემოკრატების” წევრმა ვიქტორ დოლიძემ და “რესპუბლიკური პარტიის” ერთ-ერთმა ლიდერმა დავით ბერძენიშვილმა გახსნა.
“თქვენ თქვენი სიმამაცით შეძელით და დღეს აქ მოხვედით. ეს არის ადგილი, რომელიც ფაქტიურად წარმოადგენს მომავალი ხელისუფლების ჩანასახს. მინდა გითხრათ, რომ ოქტომბერში “ქართული ოცნება” გაიმარჯვებს და ნამდვილად სწორედ დღეს ეყრება საფუძველი ქართულ ეროვნულ ხელისუფლებას, რომელსაც სურს მმართველი პარტიის პოზიციებიდან გაისტუმროს “ნაციონალური მოძრაობა”, რომელმაც ქვეყანა უკიდურესად მძიმე მდგომარეობაში ჩააყენა. ჩვენ, ყველას ერთად, თქვენთან ერთად შეგვწევს იმის უნარი, რომ ერთობლივად ოქტომბრის არჩევნებში დავამარცხოთ “ნაციონალური მოძრაობა” და “ქართული ოცნება” მოვიდეს საქართველოს პარლამენტში. ბატონი ბიძინა ივანიშვილი არის ამის გარანტია. ბატონმა ბიძინამ თავისი შემოსვლით პოლიტიკაში რეალურად მოახდინა გარდატეხა, მე მინდა გითხრათ, რომ ხელისუფლებას ძალიან ეშინია, ეშინია თქვენი, ჩვენი და ყველანაირ ზომას მიმართავს იმისთვის, რომ ხელი შეუშალოს ბატონ ბიძინას და მის თანაგუნდელებს, პოლიტიკურ ბრძოლაში ჩაერთონ აბსოლუტურად თანასწორად და იყოს ბრძოლა სამართლიანი. ეს იქნება მოქალაქეობის შეწყვეტა, ფინანსური სანქციები თუ ასე შემდეგ. თუმცა, ჩვენ ეს არ გვაშინებს, მინდა გითხრათ. ყოველდღიურად იხსნება ჩვენი ოფისები და საქართველოს ყველა რაიონში გაიხსნება “ქართული ოცნების” ოფისი. ამ ოფისიდან აბოლუტურად ყველა სოფელში მივა “ქართული ოცნების” წარმომადგენელი, ყველა მოსახლებდე, ყველა ოჯახამდე მივა ინფორმაცია “ქართული ოცნების,” ჩვენი მომავალი გეგმების შესახებ, როგორ აპირებს კოალიცია, გამოიყვანოს ჩიხიდან ქვეყანა. სამწუხაროდ, ყველა ოჯახიდან წასულია ადამიანები სამუშაოდ, მილიონობით ადამიანია წასული ფულის საშოვრად. ბატონი ბიძინა ამბობს, რომ ოქტომბრამდე მთელ საქართველოს შეკრავს ერთ მუშტად და ეს ოფისი არის ამისი გარანტია ოზურგეთში, ჩვენ ნამდვილად მოვიგებთ არჩევნებს ოზურგეთში. თქვენ იმსახურებთ ღირსეულ ცხოვრებას, თქვენ იმსახურებთ სამართლიან ქვეყანას, თქვენ იმსახურებთ იმას, რომ თქვენს ოჯახებს არ შიოდეს, ჰქონდეთ სამუშაო ადგილი და არ იყოთ ხელისუფლებისგან გადმოგდებულ (მაპატიეთ ეს სიტყვა, ) დახმარებაზე, შემწეობაზე და 20 ლარიან ვაუჩერებზე. თქვენ იმსახურებთ ღირსეულ ცხოვრებას, ღირსეულ ახალგაზრდობას და ღირსეულ სიბერეს და “ქართული ოცნება” არის სწორედ ამისი გარანტი. მინდა მოგილოცოთ ეს დღე და გითხრათ, რომ ეს არის ძალიან დიდი ბრძოლის დასაწყისში ოზურგეთში, რასაც საბოლოოდ ოქტომბრის არჩევნების შედეგებით ვნახავთ და ეს იქნება გამარჯვება კოალიცია “ქართული ოცნებისა”, _ განაცხადა მანანა კობახიძემ.
ვიქტორ დოლიძის თქმით კი, ეს ოფისი იხსნება არჩევნების გზით ხელისუფლების ცვლილების მიზნით. სამწუხაროდ, ბოლო 20 წლის განმავლობაში გურიას იმდენმა ჭირ-ვარამმა გადაუარა, რომ დროა, რეალური საქმის კეთება დაიწყოს. სწორედ ამისთვის გაიხსნა დღეს ეს ოფისი.
დავით ბერძენიშვილმა განაცხადა, რომ კოალიციაში უამრავი კვალიფიციური ადამიანია გაწევრიანებული. საქართველოში ბოლო წლების განმავლობაში წინააღმდეგობა ძალიან დიდი იყო ხელისუფლების მიმართ, მაგრამ ჩვენ ვერ შევძელით გამარჯვების უზრუნველყოფა. მე ვიცი, სად ვარ და რომელ რეგიონში ვარ, 2008 წელს საპარლამენტო არჩევნებში “ნაციონალურმა მოძრაობამ” გურიაში ყველაზე დაბალი _ 39% მიიღო. დემოკრატიის ინდექსი გურიაში ძალიან მაღალია, კვლევებითაც დასტურდება. ის რომ, ჩვენ აქ მოსაგები პოზიცია გვაქვს, ჩვენ ეს ვიცით, მაგრამ ეს მოგება არის უზრუნველსაყოფი. არ დაგიმალავთ და გეტყვით, რომ ძალიან სერიოზული განსჯის შედეგად არის შერჩეული ბატონი კოტე შარაშენიძე, ძალიან სერიოზულ კონკურენციაშია გამარჯვებული და ეს არის ავანსი და ეს ავანსი მისი გასამართლებელია. დარწმუნებული ვარ, ყველაფერი მოხერხდება, სხვებთან მჭიდრო თანამშრომლობით.
კოალიცია “ქართული ოცნების” ოზურგეთის ხელმძღვანელმა კოტე შარაშენიძემ თქვა, რომ გურია და, განსაკუთრებით, ოზურგეთი აქტიურობით გამოირჩევა პოლიტიკური თვალსაზრისით. მოგვეცემა, ალბათ, შესაძლებლობა, რომ უფრო ფართოდ გაგაცნოთ “ქართული ოცნების” პოლიტიკური და სამოქმედო გეგმა. გთხოვთ, დღეიდან ნებისმიერ დროს და ნებისმიერ სიტუაციაში მიიღოთ ოფისის მუშაობაში მონაწილეობა. დღეს დიდი ბრძოლაა საჭირო.
