21.04.2012. ლანჩხუთი. ევგრაფი შევარდნაძე. 3000 მაყურებელი
გურია _ სპარტაკი 2:1
1:0 თოდუა (30 პენ.), 1:1 შარაშენიძე (42), 2:1 ჩარგეიშვილი (71)
მატჩი მასპინძლების უპირატესობით კი დაიწყო, თუმცა, “გურიას” საწყის ნახევარ საათში მთელი ძალებით აღარ შეუტევია, როგორც ამას წინა ტურებში აკეთებდა. გურულებს, უამინდობის გამო, ფაქტობრივად მზადების პროცესი ჩაუვარდათ და ბოლომდე გაძლება უჭირთ. გიგლა იმნაძის ჩანაფიქრმა გაამართლა _ “სპარტაკმა” უფრო მეტად ანერვიულა ლანჩხუთელები, ვიდრე თუნდაც წინა ტურში “ვიტ ჯორჯიამ” და ძალები რომ არ შემოენახათ, გურულებს ძალიან გაუჭირდებოდათ.
თუმცა, “გურიამ” ხიფათები დასაწყისიდანვე შექმნა: ჯერ ტარიელ კუკულაძის ფლანგიდან ჩაწოდებულს გია თოდუამ თავი შეაგება და ცოტათი ააცილა, ხოლო მალევე უკვე ფორვარდი მოგვევლინა ასისტენტის როლში _ თოდუა მარჯვენა ფლანგზე კარგი გარღვევა განახორციელა, საჯარიმოშიც კარგად მოძებნა თავისიანი, მაგრამ თამაზ ჩარგეიშვილმა მისი გამოყენება ვერ მოახერხა.
ამის შემდეგ გურულთა მთავარმეგოლე კაპიტანმა, გიგა კვერენჩხილაძემ სცადა გატანა, მაგრამ პლეი-აუტის ბომბარდირმა “სპარტაკის” მეკარეს ვერაფერი დააკლო.
30-ე წუთზე გოლიც გავიდა: სტუმართა მცველმა გია თოდუა საჯარიმოში აკრძალული ხერხით შეაჩერა და მალხაზ ბეუქლიშვილმაც სამართლიანი გადაწყვეტილება მიიღო _ პენალტთან ერთად ლევან ჭაფოძე ყვითელი ბარათით დასაჯა. 11-მეტრიანი გოლად თოდუამვე აქცია _ 1:0.
ამის შემდეგ, “გურიამ” უპირატესობა დათმო. ამით კარგად იხეირეს სტუმრებმა _ მათ ტაიმის მიწურულს 2 კარგი ხიფათი შექმნეს, რომელთაგან ერთი გამოიყენეს კიდეც _ გიორგი ჩივაძის ფლანგური პასით კარგად გაიჭრა მელქაძე და საჯარიმოში უმეთვალყურეოდ დარჩენილ თემურ შარაშენიძეს გატანა არ გასჭირვებია _ 1:1.
მეორე ნახევარი უკვე მასპინძელთა შეტევებით დაიწყო, “სპარტაკს” თანდათან სულ უფრო უჭირდა თავის დაცვა, თუმცა, ისინი შანსს მწვავე კონტრშეტევაშიც ეძებდნენ. გურულები, ფაქტობრივად, მთელი ძალებით შეტევაზე გადაერთნენ. დასაწყისშივე შეეძლოთ მასპინძლებს დაწინაურება _ დავით მაისაშვილს ორი შანსი მიეცა: პირველ შემთხვევაში, გურულთა აქტიურმა ნახევარმცველმა ფლანგური ჩაწოდების შემდეგ მეკარეს კინაღამ დაასწრო, ხოლო შემდეგ ლაშა ჯანგიძის ჩაწოდებული კარისკენ თავით გაგზავნა, მაგრამ “სპარტაკი” ძელმა იხსნა.
71-ე წუთზე “გურიამ” გამარჯვების გოლი გაიტანა: მარჯვენა ფრთიდან, დაახლოებით 35 მეტრიდან საჯარიმო თამაზ ჩარგეიშვილმა გადაგზავნა კარისკენ, გიორგი ნადირაძე წინ გამოვიდა, ბურთი კი მის უკან ჩაეშვა _ 2:1.
ამის შემდეგ ხიფათს ისევ მხოლოდ “გურია” ქმნიდა. ბოლო ათ წუთში თორნიკე მოსიაშვილის დარტყმული ხარიხის გავლით კარს ასცდა, ხოლო მატჩის ყველაზე გამორჩეულ მოთამაშე გიგა კვერენჩხილაძეს ორჯერ შეეძლო გატანა _ პირველად დასარტყმელ პოზიციას მყოფმა ცოტათი არაზუსტად დაარტყა, ხოლო მეორედ მეკარესთან პირისპირ შეყრილმა ნადირაძეს ვერ აჯობა.
