რუსეთში მოღვაწე ქართველი ქართველი მილიონერი, მინდია გულუა 12 მაისს, თბილისში მასშტაბურ აქციას გეგმავს, სადაც 50 000-მდე მხარდამჭერს ელოდება. მედიისთვის გამართულ ვიდეოხიდზე მან განაცხადა, რომ უახლოეს მომავალში ეს აქცია პერმანენტულ ხასიათს მიიღებს და ყველა რეგიონს მოიცავს. წარმოშობით სოხუმელი მილიონერი განსაკუთრებულ მხარდაჭერას დევნილებისგან ელოდება.
მან დევნილების დასახმარებლად შვეიცარიაში სპეციალური ფონდი შექმნა, სადაც პირადად გადარიცხავს მილიონ დოლარს. ყველაზე მეტ მხარდაჭერას ის სწორედ დევნილებისგან ელოდება.
“აქციაში, რომელშიც ჩემი გათვლით, 50 000 ადამიანი მიიღებს მონაწილეობას, წარმოდგენილი იქნებიან დევნილები აფხაზეთიდან, ოსეთიდან, ასევე იქნებიან წარმოდგენილი სტუდენტები. მე პირადად, გამოვალ ინიციატივით, რომ დაფუძნდეს დევნილთა ფონდი, რომელიც დევნილებს დაეხმარება და ამ ფონდში მინდია გულუა, როგორც ერთი პიროვნება, მილიონ დოლარს გადავრიცხავ. მანიფესტაცია თბილისთან ერთად გაიმართება მარტვილში, წალენჯიხაში, ხობში, სენაკში, ზუგდიდში, მცხეთასა და აჭარაში. მართალია, მანიფესტაციის გამართვასთან დაკავშირებით ძალიან ბევრი პრობლემაა, თუმცა ჩვენ გვყავს გვერდით ადამიანები, რომლებიც დაგვეხმარებიან”, – განაცხადა მინდია გულუამ.
“გურია ნიუსი” პარტია “განახლებული საქართველოსთვის” მრჩეველს საქართველოსთან დაკავშირებული გეგმების შესახებ ესაუბრა.
_ ბატონო მინდია, ბოლოდროინდელი მონაცემებით, არჩევნებზე ხელისუფლებას ყველაზე დიდი მხარდაჭერა სწორედ დევნილებისგან ჰქონდა. რა გაძლევთ იმის იმედს, რომ ეს მხარდაჭერა თქვენსკენ გადმოვა. განსაკუთრებით სამეგრელოს რეგიონი მაქვს მხედველობაში.
_ არავისთვის დიდ საიდუმლოს არ წარმოადგენს, რომ სამეგრელოს რეგიონს აკონტროლებს ახალაიების დაჯგუფება, მამა და მისი შვილები. მამა პროკურორია, ერთი შვილი თავდაცვის მინისტრი და ჩემთვის გაუგებარია, მეორე შვილი არის თუ არ არის კუდის უფროსი. ხელისუფლებაში რომ მოვალ, ამას გავარკვევ ყველაფერს.
სამეგრელო, სადაც არის 342 ათასი ამომრჩეველი, მხედველობაში არ მყავს ზემო-სვანეთი რომელიც ემატება სამეგრელოს რეგიონს, დატერორებული და შეშინებული ჰყავს ამ ჯგუფს ანუ ახალაიების კლანს. მინდა გითხრათ, 12 მაისისთვის მათი თარეში დასრულდება. დარწმუნებული ვარ, ჩვენ ხალხი ამოგვიდგება. რაც შეეხება დევნილებს, გამოუჩნდებათ პატრონი. დევნილებს გაუჩნდებათ იმედი.
ჩვენი პარტია იზრუნებს საქართველოს ტერიტორიული მთლიანობისთვის და იმისთვის, რომ კანონი კანონობდეს. როგორც კი მომეცემა საშუალება, საქართველოს მოსახლეობას ვაჩვენებ, როგორ იქცევიან საქართველოს ხელისუფლების წარმომადგენლები საზღვარგარეთ სტრიპტიზ ბარებში. რა თქმა უნდა ამას ტელევიზია არ გააშუქებს, მაგრამ სხვა გზას ვიპოვით. ქართულმა საზოგადოებამ უნდა ნახოს ვინ არის ჩვენი პრეზიდენტი და რას წარმოადგენს მისი გუნდი.
ეს ხელისუფლება წააგებს, რადგან ჩვენ მოვდივართ სერიოზული პროგრამით.
_ თქვენ განაცხადეთ, რომ კრასნოდარის მხარეში, სადაც მოღვაწეობთ, ჯაშუშობის ბრალდებით, თქვენზე თვალთვალის გამო ქართველი ეროვნების ადამიანები დააკავეს. ვინ არიან ისინი?
_ მინდა გითხრათ, ერთ-ერთ რეგიონში სადაც მე ვცხოვრობ, კრასნოდარის მხარეში, დააკავეს 7 ადამიანი, რომლებიც ეწეოდნენ ჯაშუშობას. საქართველოს სპეცსამსახურების მიერ მათ დავალებული ჰქონდათ დაეზვერათ სად ვცხოვრობ, რამდენი მყავს დაცვა, მათი სახელი და გვარი, რას ვაკეთებ და ა.შ.
მე ვადასტურებ ამას. რუსეთის ფედერაციის ტერიტორიაზე, კრასნოდარის მხარეში, დაკავებულმა ქართველებმა უკვე მისცეს ჩვენება, ვინ ავალებდა და რას აკეთებდნენ. არ მაქვს უფლება დეტალებზე ვისაუბრო სანამ გამოძიება არ დასრულდება. სასამართლოს გადაწყვეტილებამდე მათი სახელისა და გვარების დასახელებისგან თავს შევიკავებ.. მიუხედავად იმისა, რომ მათ აღიარეს ჯაშუშობა ველოდები სასამართლოს გადაწყვეტილებას
აქვე ერთ დეტალზე გავამახვილებ ყურადღებას. 2010 წლის 28 დეკემბერს საკალათბურთო გუნდის მიმართ აღძრული იყო სისხლის სამართლის საქმე. ჩვენ გავაკეთეთ გასვლითი მატჩი თურქეთში, რადგან ჩვენთვის ძალიან დიდი მნიშვნელობა ჰქონდა “სოხუმის” გუნდის გასვლას ევროპაში, ქართული დროშით. გვინდოდა მსოფლიოს ენახა, რომ სოხუმი არის საქართველოს ტერიტორია და პირველად ისტორიაში ჩვენ ეს შევძელით. სამწუხაროდ, მე ვერ გავეცანი ჩემს გუნდს თურქეთში, რადგან ზოგიერთებმა თურქეთის ტერიტორიაზე ჩემი მოპარვის განკარგულება გასცეს. მე ამას ვაცხადებ სრული პასუხისმგებლობით. რადგან ყველაფერი არის დასაბუთებული. ძალიან კარგად ვიცი ვის ევალება ჩემს წინააღმდეგ მუშაობა და კონტრდაზვერვის სამსახურში ვინ გააკეთა ეს ყველაფერი.
_ თქვენ ძალიან სერიოზულ განცხადებას აკეთებთ, ვინ არიან ეს ადამიანები?
_ მე დავასახელებ მათ. ეს არის ლევან ტაბიძე, რომელმაც ყველაფერი მოახსენა მის ხელმძვანელობას, კერძოდ მაზმიშვილს. ისინი ამტკიცებენ, რომ მე ვარ შეკრული რუსეთის ხელისუფლებასთან, რაც სრული აბსურდია და ამას ვერასდროს დამიმტკიცებენ!
მინდა გადავცე შინაგან საქმეთა კონტრდაზვერვისა და კუდის სამსახურს, ასევე თავდაცვის კონტრდაზვერვის სამსახურს, რომ მე ვცხოვრობ მოსკოვში. ნუ დაავალებთ ქართველებს ჯაშუშობას ჩემს მიმართ, ვინაიდან მე არ ვცხოვრობ სახლში. ვცხოვრობ ჩაკეტილ ტერიტორიაზე, საიდანაც არ გავდივარ არსად. თუ გავდივარ დამყვება დიდი ოდენობის ესკორტი და თქვენ ვერ მოახერხებთ რამეს გაკეთებას. ვერც მომწამლავთ და ვერც რამე სხვას გამიკეთებთ.
