ოჯახის წევრებს აქვთ თუ არა რამე ქონება და კერძოდ _ რა? რა შემოსავლები აქვთ? ვინ ესწრებოდა ხელშეკრულების გაფორმებას? რატომ მოხდა კონკრეტულად ამ შპს-ზე ხელშეკრულების გაფორმება და რატომ მივიდა თქვენი წარმომადგენელი ამ მესაკუთრესთან? საიდან გაიგეთ ამ შპს-ს შესახებ და რომელ ოფისში ხდებოდა ეს? ვინ ჩაატარა რემონტი?
დღეს, კონტროლის პალატის პარტიების ფინანსური მონიტორინგის სამსახურის უფროსის მოადგილემ გიორგი ამირანაშვილმა დაკითხვაზე დაიბარა თბილისში მცხოვრები რამდენიმე ფიზიკური პირი, რომელებსაც ხელშეკრულება აქვთ გაფორმებული შპს “მენეჯმენტ სერვისთან (დირექტორი _ ბესიკ დემეტრაშვილი). სწორედ “მენეჯმენტ სერვისი” არის შუამავალი კომპანია მოიჯარეებსა და “ქართულ ოცნებასა” და მის კოალაციაში შემავალ პარტიების შორის. საუბარია საბურთალოზე, ვაკეში, ნაძალადევში და რუსთაველზე მდებარე “ქართული ოცნების” კოალიციაში შემავალი პარტიების ფართებზე.
დაბარებულებს წერილობით შეატყობინეს, რომ დღეს უნდა გამოცხადებულიყვნენ დაკითხვაზე. სულ 5 ადამიანი დაიბარეს, მათ შორის: სოფო იმნაძე, ნინო მამუკელაშვილი, მედეა ჯიქია და მედეა გველესიანი.
მედეა გველესიანი დაკითხვაზე ადვოკატ ეკა ბესელიას თანხლებით მივიდა. Dდანარჩენებმა უარი განაცხადეს ადვოკატის მომსახურებაზე: _ ზუსტად ვიცოდით რაზედაც გვიბარებდნენ და საჭიროდ არ ჩავთვალეთ ადვოკატის აყვანა, _ განუმარტეს მათ “გურია ნიუსს”.
ეკა ბესელია: “მეგონა, რომ კონტროლის პალატაში კი არა, შსს-ში ვიყავი დაბარებული. დღეს კონტროლის პალატაში დაბარებული იყო ნაძალადევის რაიონში ჩვენი პოლიტიკური კოალიციის შენობის მესაკუთრე, რომლის მოწვევის ბარათში ეწერა, გაეცა პასუხები იჯარის ხელშეკრულებასთან დაკავშირებით.
როდესაც დაიწყო დაკითხვის პროცედურა, შევამჩნიე, რომ ადგილობრივი უწყების ვიდეოკამერა იწერდა დაკითხვას. მაშინვე მოვითხოვე, ჩვენც მოგვცემოდა დაკითხვის ჩაწერის შესაძლებლობა, მაგრამ ამის გაკეთების უფლება არ მოგვცეს. Fფინანსური მონიტორინგის სამსახურის უფროსის მოადგილემ გიორგი ამირანაშვილმა განმიცხადა, რომ ამის აუცილებლობა არ იყო. თუმცა, დასაბუთებული პასუხი ვერ მივიღე, რატომ არ მაძლევდნენ ამის უფლებას. ეს შენიშვნა, როგორც კანონდარღვევა, დავაფიქსირე ოქმში. ეს იყო აბსოლუტური უკანონობა _ თუ ისინი აფიქსირებენ, რა ხდება და როგორ, ამის უფლება და შესაძლებლობა ჩვენც უნდა მოგვცემოდა. პროცედურა, რასაც ახლა აკეთებდა კონტროლის პალატა,არ იყო მისი კომპეტენცია. მათი წარმომადგენელიანა ქორიძე წარმართავდა დაკითხვას და ორგვერდიანი კითხვები ჰქონდა მომზადებული, რომლებიც ასე გამოიყურებოდა: ოჯახის წევრებს აქვთ თუ არა რამე ქონება და კერძოდ _ რა? რა შემოსავლები აქვთ? ვინ ესწრებოდა ხელშეკრულების გაფორმებას? რატომ მოხდა კონკრეტულად ამ შპს-ზე ხელშეკრულების გაფორმება და რატომ მივიდა მისი წარმომადგენელი ამ მესაკუთრესთან? საიდან გაიგო და რომელ ოფისში ხდებოდა ეს? ვინ ჩაატარა რემონტი?
ამ ყველაფერთან დაკავშირებით პროტესტი გამოვთქვი და საკმაოდ ბევრი ვიკამათე, რადგან ეს არ არის კონტროლის პალატის კომპეტენცია, მას არავინ ეკითხება, ვინ რა რემონტს ატარებს ოთახში და ვის რა ქონება აქვს, ვინ ესწრება ოფისში ამ ხელშეკრულების გაფორმებას. დეტალურად გაეცა პასუხი ყველაფერს ვინ, სად და როგორ გააფორმა ხელშეკრულება. ახლა წარმოვიდგინე, მე რომ არ ვესწრებოდე ასეთ პროცედურას და მოქალაქე ადვოკატის გარეშე ყოფილიყო, რა დღეში ჩააგდებდნენ. როცა ეს ადვოკატის გარეშე ხდებოდა რაიონებში, რამდენად რთულ პირობებში იყვნენ პირისპირ დარჩენილები კონტროლის პალატასთან. ჩვენ ავიღეთ ვალდებულება, რომ მესაკუთრეები, რომელთა ფართშიც განთავსებულა ჩვენი ოფისები, დაცვის გარეშე არ დავტოვოთ. ეს არის ყველაზე კარგი გარანტია.
ეს პროცედურა მიმართულია “ქართული ოცნების” წინააღმდეგ. აქ არაფერ შუაშიარიან ფართის მეპატრონეები. კონტროლის პალატის უნდა, გამოიყენონ მესაკუთრეები და მიიღონ მათთვის სასურველი ინფორმაცია, შეუქმნან “ქართულ ოცნებას” პრობლემები და ფინანსური ჯარიმები დააკისრონ”, _ გვითხრა ბესელიამ.
“გურია ნიუსის” კითხვაზე, შპს “მენეჯმენტ სერვისს” მიუვიდა თუ არა უწყება კონტროლის პალატიდან, ბესელიამ განაცხადა: ჯერ არა, მაგრამ დარწმუნებული ვარ, მიუვა და დაკითხვაზე დაიბარებენ.
დაკითხვაზე დაბარებული მოქალაქეები აცხადებენ, რომ ისინი არ აპირებენ მოიჯარეებთან ხელშეკრულების შეწყვეტას.
დაკითხვები კონტროლის პალატაში ამ წუთებშიც გრძელდება.
