“გვაქვს ინფორმაცია, რომ ანტენის დადგმის შემთხვევაში, ხალხს სოცდახმარებას მოუხსნიან!”

ჩვენ უკვე გესაუბრეთ იმის შესახებ, რომ, ჩვენი წყაროს ინფორმაციით, იმ ადამიანებს, რომლებიც “გლობალ-ტვ”-ის (რომლის საშუალებითაც “მეცხრე არხის” დაჭერაა შესაძლებელი) ანტენას დაიმონტაჟებენ, სოციალურ დახმარებას მოუხსნიან. რა თქმა უნდა, აქ საუბარია სოციალურად დაუცველ ოჯახებზე. როგორც ჩანს, ხელისუფლება ასე აპირებს ოპოზიციასა და მის მხარდამჭერებზე მორიგი ზეწოლის მოხდენას. მოგეხსენებათ, “მეცხრე არხი” ბიძინა ივანიშვილის პოლიტიკური გუნდის დასაყრდენი მედია-საშუალებაა, გურიაში კი არ აღწევს სხვა არასახელისუფლო არხების მაუწყებლობა, ამიტომაც ოპოზიციისთვის “მეცხრე არხის” მოსახლეობისთვის ხელმისაწვდომობას უდიდესი მნიშვნელობა აქვს.

ჩვენი ინფორმაციით, ლანჩხუთში “გლობალ ტვ”-ის ანტენის დადგმის მოსურნეთა რაოდენობა დიდია. ამ მომსახურებას მოსახლეობას სიმბოლურ თანხად _ პირველადი 10-ლარიანი შენატანით დაუმონტაჟებენ. სწორედ ეს “არგუმენტი” იქნება ხელისუფლებისთვის ის მომენტი, რომ სოციალურად დაუცველს დახმარება მოუხსნან _ რა დახმარება გინდათ, როცა ანტენას იდგამთო! მოკლედ, სოციალურად დაუცველებმა (აშკარაა, თუ ანტენის დამდგმელთა სიაში საჯარო მოხელეებიც და სხვა დასაქმებულებიც შევლენ _ მათ მინიმუმ სამსახურს დაატოვებინებენ) მხოლოდ “მიშა-ვიზიებს” უნდა უყურონ.

აღნიშნულ საკითხზე ოფიციოზი კომენტარს არ აკეთებს და არც იმის იმედი გვქონდა, რომ ინფორმაციას დაგვიდასტურებდნენ. მეტიც, პირად საუბრებში აცხადებენ, რომ ეს ჭორია, თუმცა, საწინააღმდეგოს ამტკიცებენ “ქართული ოფისის” ლანჩხუთის ოფისში.

ამასთან, მოსახლეობაში ვრცელდება ინფორმაცია, რომ ვისაც ზემოთ ნახსენები ანტენის დამონტაჟება სურს, “ქართული ოცნების” ოფისში განცხადება უნდა დაწეროს. ჩვენი წყარო ირწმუნება, რომ ასეთი განცხადებები მრავლად დევს კოალიციის სამდივნოში.

_ იქნებ, ხელისუფლების წარმომადგენელს მოუნდეს ამ ანტენის დადგმა? როგორი საქმეა, რომ ის “ქართული ოცნების” ოფისში, განცხადებით ხელში მისული დაინახონ? მართალია, საეჭვოა, რომ ასეთი გაბედული ვინმე გამოჩნდეს, მაგრამ კითხვა ლოგიკურია და ნამდვილად არ არის კარგი, როცა ანტენის დამონტაჟების საკითხს ამა თუ იმ პოლიტპარტიის ოფისში არეგულირებენ. მით უფრო, წინდაწინვე ცნობილია, რომ “მეცხრე არხი” ბიძინა ივანიშვილის ტელეკომპანიაა და იმ ადამიანებისთვის, რომლებსაც არც “ნაციონალები ” ეხატებათ გულზე და არც “ოცნებობენ”, რა მნიშვნელობა აქვს _ “ბიძინავიზიაც” ხომ ისეთივე პოლიტიკის გამტარებელი იქნება ოპოზიციურ ფლანგზე, როგორც სახელისუფლოზე _ “მიშავიზიები”, _ ამბობს წყარო.

ჩვენ კომენტარისთვის “ქართული ოცნების” გურიის კოორდინატორს, სოსო ბოლქვაძეს დავუკავშირდით:

_ ბატონო სოსო, გვაქვს ინფორმაცია, რომ სოციალურად დაუცველებს დახმარებას მოუხსნიან, თუ “გლობალ-ტვ”-ის ანტენებს დაიდგამენ.

_ გვაქვს ეს ინფორმაცია. ამიტომაც ვთხოვთ მემონტაჟეებს, რომ ეს ოჯახები ჩააყენონ საქმის კურსში, რადგან შემდეგ მართლაც რომ მოუხსნან სოციალური დახმარება, ჩვენ არ აღმოვჩნდეთ უხერხულ მდგომარეობაში. მაგრამ თუ ამას არ შეუშინდებიან და მაინც მოითხოვენ დამონტაჟებას, რა თქმა უნდა, უარს არ ეტყვიან და დაუდგამენ ანტენას.

_ როგორ ხდება ანტენების დამონტაჟება? როგორც ვიცით, განცხადებებს თქვენთან წერს მოსახლეობა…

_ დიახ, უკვე 1500-ზე მეტი განცხადება შემოვიდა ჩვენთან _ როგორ ჩანს, მოსახლეობას ეგონა, რომ ჩვენ ვამონტაჟებდით ამ ანტენებს. ასე ნამდვილად არ არის. ჩვენ მხოლოდ დავეხმარეთ იმ ადამიანების შერჩევაში, რომლებსაც შეუძლიათ მონტაჟზე იმუშაონ. 25 კაცი მოგროვდა. ახლა ისინი თბილისში არიან და გადიან ტრენინგს. მალე, სავარაუდოდ _ მომავალ კვირაში, გაიხსნება წარმომადგენლობა და იქ მოხდება შეკვეთის მიღება. ადგილობრივებთან ერთად დამონტაჟებაზე თბილისიდან მოვლენილი სპეციალისტებიც იმუშავებენ.