ჩვენი წყაროს ინფორმაციით, უკვე ცნობილი არიან ის პირები, რომლებიც მომავალ საპარლამენტო არჩევნებზე მმართველი გუნდისა და მთავარი ოპოზიციური კოალიციის მაჟორიტარი დეპუტატობის კანდიდატები იქნებიან ლანჩხუთში _ “ნაციონალური მოძრაობა” პარლამენტში გამგებელ გიორგი გოგუაძის გაყვანას შეეცდება, ხოლო “ქართული ოცნება” ფსონს “გურიის” ყოფილ კაპიტანზე, თემურ ჩხაიძეზე დადებს.
მართალია, ეს კანდიდატურები ჯერ მხოლოდ კულუარებში სახელდება და არჩევნებამდე არ არის გამორიცხული, ბევრი რამ შეიცვალოს.
რაც შეეხება უკვე დასახელებულ კანდიდატებს, თუ ინფორმაცია დადასტურდა, ეს უკვე მეორე შემთხვევა იქნება, როცა ლანჩხუთის მაჟორიტარად კენჭს საფეხბურთო სამყაროს წარმომადგენელი იყრის _ “გურიის” ექს-კაპიტნამდე ლანჩხუთელთა გულის მოგებას საქართველოს ფეხბურთის ფედერაციის მაშინდელი თავკაცი, “გურიის” ასევე ყოფილი ფეხბურთელი მერაბ ჟორდანია ცდილობდა. სხვათა შორის, მაშინ მას აქტიურად უჭერდა მხარს გიორგი გოგუაძე. 2003 წელს ჟორდანიამ წარმატებას ვერ მიაღწია.
ვინ არის თემურ ჩხაიძე? მას მკითხველებისთვის წარდგენა არ სჭირდება _ “გურიის” სახელოვანი კაპიტანი ბოლო დროს სამწვრთნელო საქმიანობას ეწეოდა. იგი მე-20 საუკუნის “გურიას” საუკეთესო ფეხბურთელია. გასულ წელს, ლანჩხუთში, “გურიას” 1986 წლის ტრიუმფიდან 25 წლის იუბილე აღნიშნეს, რასაც სკანდალი მოჰყვა _ მეორე დღეს, ცენტრალურ გაზეთებში “გურიას” ვეტერანების სახელით გამოქვეყნდა წერილი, რომლითაც ბიძინა ივანიშვილისთვის მოქალაქეობის დაბრუნებას უჭერდნენ მხარს. ხელმომწერთა შორის თემურ ჩხაიძეც გახლდათ. ამას სკანდალი მოჰყვა _ ლანჩხუთის ხელისუფლებამ მისი ქმედება უპატივცემულობად შეაფასა: აქაოდა, ასეთი ღონისძიება მოვუწყვეთ, ბანერზე მისი ფოტო გამოვფინეთ და ასეთი რამ რატომ გვაკადრა, თუ ხელისმოწერა უნდოდა, მოეწერა, მაგრამ “გურიის” ზეიმს რატომ დაამთხვიესო?! მაშინ ზოგმა უკან წაიღო ხელმოწერა, თუმცა, მათ შორის არ იყო თემურ ჩხაიძე _ ამის გამო მას “გაგრას” დატოვება მოუხდა. თემურ ჩხაიძემ ღიად დააფიქსირა, რომ კლუბიდან პოლიტიკური შეხედულების გამო გაუშვეს.
მისი კონკურენტი დიდი ალბათობით გამგებელი გიორგი გოგუაძე იქნება. არ არის გამორიცხული, ეს სახელისუფლო გათვლაც იყოს _ ჩხაიძეს ძირითადად საფეხბურთო საზოგადოების მხარდაჭერის იმედი უნდა ჰქონდეს (ფეხბურთი კი ლანჩხუთში ძალიან უყვართ), თავის მხრივ, “გურიას” დღევანდელი წარმატებები გოგუაძის სახელთანაა დაკავშირებული, ამას ემატება ისიც, რომ ლანჩხუთში ხელისუფლება გეგმავს თანამედროვე სტადიონის გაკეთებას, რასაც ასევე გამგებლის სახელს დაუკავშირებენ. ამით კი “ნაცმოძრაობა” შეეცდება თემურ ჩხაიძეს დააკარგვინოს მხარდაჭერა იმ სფეროში, სადაც სხვა კონკურენტის შემთხვევაში, უალტერნატივო უნდა ყოფილიყო.
