თან ამ ყველაფრის ხარჯები მოვაჭრეებმა უნდა გაიღონ. ჩვენთან საუბრის დროს, ამავე კომპანიის ოზურგეთის სერვის-ცენტრის მთავარი ინჟინრის, ლევან რუსიძის თქმით, ისინი არანაირად არ ერევიან მრიცხველების გადატანის საკითხში.
3 მაისს, სამი ახალგაზრდა ჯიხურებთან მივიდა და მრიცხველების გადატანას შეუდგა. ისინი “გურია ნიუსთან” კონკრეტულად არ ამბობდნენ, ვისი ბრძანებით მოქმედებდნენ და რატომ გახდა მრიცხველების გადატანა საჭირო.
_ თქვენ “ენერგო-პრო ჯორჯიას” წარმომადგენელი ბრძანდებით?
_ რა გინდა?
_ მაინტერესებს, რატომ ჭრით სადენებს?
_ დენი არ იჭრება, ძმაო, არ გცოდნიათ.
_ მაშინ, გვითხარით, რა ხდება, რატომ გედავებიან მოვაჭრეები?
_ ამის შესახებ ჩვენს უფროსთან შეგიძლიათ მიიღოთ ინფორმაცია. არ იჭრება სადენები, წესრიგდება. არაფერი ხდება შენთვის საინტერესო. თქვენ თუ გინდათ, პასუხი მიიღოთ, შეგიძლიათ, გია ნაკაიძეს ესაუბროთ, შემდეგ დაბეჭდოთ და წააკითხოთ ეს ყველაფერი ამ ხალხს.
მოვაჭრეებმა ჩვენთან ასეთი კომენტარები გააკეთეს:
_ ვითხოვთ, მრიცხველები დადგან ისეთ ადგილზე, თითოეულ მოქალაქეს გვქონდეს გაკონტროლების უფლება და საშუალება. როგორ ვიხტუნოთ ქალებმა ამ “ზაბორებზე”, სად ვეძებოთ სადღაც შემალული მრიცხველები? ისედაც იმდენი გადასახადი გვაქვს და კიდევ ეს პრობლემა გვინდა?
_ ორჯერ ვიყიდეთ მრიცხველი, თავისი სადენებით. ახლა კიდევ ჩამრთველი ნაწილი უნდა ვიყიდოთ, ამას ემატება სადენები. რა გამოვიდა _ “მეწველი ძროხები” გავხდით.
_ ზედმეტი ხარჯებია ეს ყველაფერი, ვის სიამოვნებს 20-25 ლარის გადახდა?
_ გარეთ ხომ არ ჩანს ეს მრიცხველები? თვითონ დააყენეს, ახლა მოუნდათ და გადატანას ითხოვენ. თუ საჭირო არ იყო ეს ერთიანი მრიცხველები, ერთი ბოძი დაედგათ თავის დროზე. ცალკე ინდივიდუალურად გამოგვაყვანინეს, ახლა ერთ “შკაფში” მოაქცევენ ამ მრიცხველებს. ჩვენ კანონს არ ვეწინააღმდეგებით, მაგრამ როდის უნდა დამთავრდეს ეს თამაში? არ გვინდა, რომ ასე გამოგვირთონ შუქი. მთელი დღე შუქი თუ არ გვექნება, ნაყინი და სხვა პროდუქტები გაგვიფუჭდება. რა უნდა ამ ხალხს ჩვენთან, რომ არ ამოგვასუნთქეს?
“ენერგო-პრო ჯორჯიას” ოზურგეთის სერვის-ცენტრის მთავარი ინჟინერი ლევან რუსიძე ჩვენთან საუბრის დროს ამბობს, რომ კომერციულ სტრუქტურას, სეწმეკის დადგენილებით, უნდა ჰქონდეს მოწესრიგებული მრიცხველები, მოვაჭრეებს კი არ აქვთ: _ კომპანიამ მისცა, დაეხმარა ყუთით, კარადით. ახლა ერთად უნდა იყოს მრიცხველები.
_ მოვაჭრეები ამბობენ, რომ მრიცხველების შეძენა-დამონტაჟებაში თავად გადაიხადეს ფული.
_ ფულის გადახდას კომპანია არ სთხოვს. ვიღაცამ მოიყვანა მანდ კერძო მონტიორი და მას უნდა გადაუხადონ, ალბათ, ფული. თუ უნდათ, დაპატიჟონ სადმე და ისე გააკეთებინონ, ჩემი საქმე არ არის ეს.
_ როგორც მოვაჭრეებმა გვითხრეს, მათ 20-25 ლარი უნდა გადაიხადონ მრიცხველების გადატანაში.
_ არ ვიცი, ჩვენი კომპანია არავის არ სთხოვს ფულს.
_ არც მრიცხველების გადატანას ითხოვთ?
_ მრიცხველების მოწესრიგებას ვითხოვთ.
_ თუ ადრე კომპანიამ მრიცხველები ჯიხურების წინ დადგა, ახლა რა გახდა გადატანის მიზეზი?
_ მიბრძანდით, შეგიძლიათ ნახოთ, რა ხდება. ქალაქის იერსახეს თუ შეესაბამება ის.
_ იქ ხშირად ვარ და მრიცხველები თვალშისაცემ ადგილას არ არის. ახლა რატომ შეიქნა გადატანა საჭირო?
_ ჩვენი დაყენებული არ არის ის, კერძო სტრუქტურებს ჩვენ არ ვუყენებთ მრიცხველებს.
“ენერგო-პრო ჯორჯიას” ოზურგეთის სერვის-ცენტრის მენეჯერის, გია ნაკაიძის თქმით, ეს მრიცხველები მოუწესრიგებელია: _ რომ მოწესრიგდეს, ერთ კარადაში უნდა განთავსდეს და მოვთხოვეთ უკან გადატანა. ჩვენ მოსახლეობას ვუწესრიგებთ ყველაფერს, გადატანას კი აკეთებს კერძო პირი, რადგან კერძო სტრუქტურაა. მე მაქვს ინფორმაცია, რომ ეს კერძო პირები მათგან 10 ლარს ითხოვენ და არა 20-25 ლარს, _ გვითხრა გია ნაკაიძემ.
